Lungmili Post

Mizoram Ah Tilian Leiminhnak Chuak I Chungkhar 80 Leng A Himnak Ah An I Ṭhial Hna
=========
𝐋𝐮𝐧𝐠𝐦𝐢𝐢𝐥𝐢 𝐏𝐨𝐬𝐭 | 𝐂𝐡𝐢𝐚𝐩𝐚 13 | 2026

India, Mizoram ramkulh chung i hmun 29 ah zarhkhat chung deng pehzulh in ruahpi a sur ruang ah tilian le leiminhnak a chuak i chungkhar 80 leng cu innlo chuahtaak in an himnak hmun ah an zaam hna kong, theih a si.

Mizoram nawlngeitu nih cun, "Lunglei pengkomh chung i a um mi Khawthlangtuipui tiva a lianh ruang ah atu bantukin tualchung mi cheukhat a himnak hmun kawl in an zaam hi si," tiah July 10 ah an thanh.

Tilian nih Bangladesh ramri i a um mi Tlabung khuapi faak ngaiin a den i umnak inn cheukhat cu ti nih a phum ruang ah chungkhar 42 cu a himnak hmun ah an zaam. Cu pin ah Tlabung peng chung i a um mi Tipperaghat khua in chungkhar 40 zong tilian ruang ah a himnak hmun ah an i ṭhialkam, tiah theih a si.

Mizoram ramkulh hmun kip ah cat lo in ruahpi a sur ruang ah hin tilian le leiminhnak a tam ngai nain tualchung mi a nunnak liam mi an um hraw lo, tiah theih a si.

"Cat lo in ruah a sur ruang ah pehtlaihnak lam cheukhat zong an rawk. Lunglei pengkomh, Bualte khua pawng zong ah faak ngaiin leiminhnak a chuak i National Highway lampi No. 54 (NH-54) cu caan karlak chung a kham chung ruang ah a luancia ni 4 chung ah khan khualtlawng tam ngai an i hreng. Lawngtlai le Siaha pengkomh zong ah Mizoram ramkulh le hmunram dang pehtlaihnak lam pawl a rawk ngai ve," tiah Mizoram nawlngeitu nih an langhter.

Hi kong he pehtlai in Lawngtlai ah aa dor mi ralzaam pakhat zong nih, "Pehzulh in ruahpi a sur ruang ah hin pehtlaihnak lam pawl an rawk ngai i khualtlawng minung tam ngai zong a kham hna," tiah a chim ve.

Cu bantuk ṭhiam in Aizawl khuapi thlanglei, Ngaizel zong ah leiminhnak a chuak i, Aizawrl–Thenzawl–Lunglei kalnak lampi cu an kham chung. Atu bantukin rawhralnak a tam ruang ah harsatnak a tong mi chungkhar hna cu ramkulh cozah nih ri a khiah mi phunglam ning tein bawmhnak tangka le thilri dang pawl zong a rannak in phawtzamh an si lai, tiah Mizoram nawlngeitu pawl nih cun an chim.

Lungmili Post

Malaysia Ah Chinmi Cheukhat Telh In Ramdang Mi 1,000 Leng Tlaih An Tong Ṭhan
=========
𝐋𝐮𝐧𝐠𝐦𝐢𝐢𝐥𝐢 𝐏𝐨𝐬𝐭 | 𝐂𝐡𝐢𝐚𝐩𝐚 13 | 2026

Malaysia, Selangor ramkulh, Klang khuapi i minung an chah ngainak Klang bus station pawngkam cu nizan July 12 ah Malaysia nawlngeitu pawl thazaang 250 hrawng nih luhhnawh in chekhlatnak an tuah i, Chinmi cheukhat telh in ramdang mi 1,000 leng tlaih an tong kong, Malaysia thawngzamhnak nih an thanh mi le Chin Refugee Committee (CRC Malaysia) in ṭuanvo ngeitu nih an chim mi in theih a si.

Chin Refugee Committee (CRC Malaysia) Chairman Paul Ngun Luai Thang nih cun, "Myanmar ram mi, Nepal ram mi, Pakistan ram mi le Indonesia ram mi tiin an dihlak fonh minung 1,000 leng an tlaih hna i, cu chung ah a tlawm bik Chinmi 4/5 hrawng zong an i tel ve tiin kan theih ca ah pehzulh in kan hlathlai cuahmah lio a si," tiah Khumiland News ah a chim.

Malaysia nawlngeitu pawl nih Operasi an luh lai ah hin phungning lo in a lut mi ramdang mi hna an zaam khawh nakding lam paoh cu an kham/phih hmasa i, cu hnu ah an luhhnawh hna hi a si. Cucaah a zaam mi cheukhat zong an tlaih khawh ṭhan hna. Atu bantukin an tlaih mi hna ramdang mi 1,000 leng cu phungning tein dantatnak pek hna ding ah pehzulh in an hren hna i chekhlatnak an tuah cuahmah hna, tiah Malaysia thawngzamhnak nih an thanh mi ah cun an langhter mi ah cun an langhter.

2026 k*m January 1 in June 30 tiang, thla 6 chung lawng ah Malaysia nawl ngeitu pawl nih Malaysia ram hmun kip ah chekhlatnak voi 6,237 an tuah i, minung 84,464 checkhlatnak an tuah hna. Cu chung ah hngalhpinak catlap zeihmanh ngeih lo bu in phungning lo in kan ram chung ah a lut mi ramdang mi 36,900 tlaih an si, tiah Malaysia Immigration zung nih nizan ah an thanh.

Lungmili Post

Chinram Thlanglei Ah SSPC Ralkap Nih Motor 50 Hrawng In Thazaang An Chap Ṭhan I Sidoktaya Peng An Phan Cang
=========
𝐋𝐮𝐧𝐠𝐦𝐢𝐢𝐥𝐢 𝐏𝐨𝐬𝐭 | 𝐂𝐡𝐢𝐚𝐩𝐚 13 | 2026

Magway ramṭhen, Magway khuapi in motor 50 hrawng he a chuak mi Division 99 SSPC ralkap pawl cu Laungshey khuapi ah hrambunh mi Defense Industry Factory (DIF) panh in an kal cuahmah i atu hi Sidoktaya peng an phan cang. Pehzulh in Chinram thlanglei ah an kai lai, tiah an zumh kong, ral lei thawng laaknak hrampi nih an chim.

"Atu i motor 50 hrawng he a chuak mi Division 99 SSPC ralkap pawl hi Magway–Minbu–Saku lampi in Pwintbyu peng ah an lut i, atu hi Salin peng, Kanpyar–Sidoktaya peng an phan cang. Motor 40 hrawng nih SSPC ralkap an phurh hna i, a taang mi motor 10 nih hriamnam le thilri pawl an phurh," tiah ral lei thawng laaknak hrampi nih cun an chim.

Laungshey khuapi panh in SSPC ralkap thazaang tam ngai nih pehzulh in rallam an sial ruang ah hin Laungshey–Saw lampi cung le a pawngkam i a um mi tualchung mi hna cu ralring tein um a herh, tiah Magway Pah-Kah-Phah nih tualchung mi ralrinnak an pek ve hna.

Cu pin ah July 10 ah khan Chinram thlanglei ah thazaang chap ding in Magway ramṭhen, Pauk peng hrambunh Defense Industry Factory (DIF) in a chuak mi SSPC ralkap 400 hrawng zong Pauk–Kyaukhtu lampi in Saw peng chung ah an lut cang, tiah People's Spring nih a langhter ve.

"SSPC ralkap nih hin thazaang 1,000 hrawng an hman i Chinram thlanglei, Mindat khuapi an nam cuahmah. Cu bantuk ṭhiam in Kanpetlet khuapi zong SSPC ralkap thazaang 800 hrawng nih an nam cuahmah ve. May thla cenceo thawk khan July thla a zarh hnihnak tiang lawng ah SSPC ralkap nih Chinram thlanglei ah cunglei kahdohnak voi 300 deng an tuah cang," tiah a chim.

Chinram thlanglei Mindat le Kanpetlet peng chung ah SSPC ralkap thazaang a thong leng nih pehzulh in rallam an sial ca ah kaphnih kar kahdohnak pehzulh in a faak i SSPC ralkap za leng an thi cang. Cu pin ah SSPC ralkap za leng nih hliamhma an tuar i hriamnam tam ngai zong ṭangṭi phu hna nih an laak chih khawh ca ah SSPC ralkap nih duhpaoh in cunglei kahdohnak zong nifatin tein an tuah chih ruang ah nu le ngakchia telh in sualnak ngei lo tualchung mi a nunnak liam mi, hliamhma tuar mi le innlo rawk mi zong a um, tiah CB chungtel CPU/CPA nih an thanh.

Lungmili Post