UNPAZ MEDIA Center

𝐏𝐀𝐌 𝐀𝐈𝐋𝐄𝐔 𝐇𝐔𝐒𝐔 𝐄𝐒𝐓𝐔𝐃𝐀𝐍𝐓𝐄 𝐏𝐀𝐊 𝐒𝐈𝐑𝐀 𝐀𝐓𝐔 𝐏𝐑𝐄𝐏𝐀𝐑𝐀 𝐀𝐍 𝐁𝐀 𝐅𝐔𝐓𝐔𝐑𝐔

Aileu, 07 Maiu 2026 – Universidade da Paz (UNPAZ) liuhusi Kordenador Jeral Programa Pratika Aprendizajen Kampu (PAK) Municipiu Aileu hamutuk ho Kordenador Postu Administrativu sira entrega estudante nain 76 ba Presidente Autoridade Munisípiu Aileu hodi hala’o Pratika Aprendizajen Kampu durante fulan ida iha Munisípiu Aileu.

Kordenador Jeral PAK Munisípiu Aileu, Dr. Leonito Ribeiro, SH.,MH.hato’o agradesementu ba Presidente Autoridade Munisípiu Aileu ho nia estrutura tomak tamba bele simu estudante sira ho di’ak iha Munisípiu refere.

Nia esplika katak, programa PAK mak programa foun ida ne’ebé importante tebes tamba bele ajuda Autoridade sira halo levantamentu dadus kona-ba problema no rekursu iha kada suku no aldeia iha teritoriu Munisípiu tomak.

Koordedor ne'e mos hateten tan katak, UNPAZ distribui estudante sira fila fali ba ida-idak nia moris fatin atu implementa materia ne’ebé sira aprende iha kampus durante semestre lima liuhusi servisu direta iha komunidade nia le’et.

Kordenador Jeral PAK Aileu mós husu ba estudante sira atu hatudu disiplina no atitude di’ak durante hala’o atividade iha komunidade, nune’e bele kria relasaun di’ak ho autoridade no fasilita prosesu levantamentu dadus. Nia hatutan katak programa PAK ne’e liga diretamente ho lema UNPAZ nian “Sapientia et Humanismus”, ne’ebé signifika siénsia no koñesimentu ne’ebé hetan iha universidade sei lori fila ba komunidade atu servi no dezenvolve povu.

Iha oportunidade hanesan, Presidente Autoridade Munisípiu Aileu, João Bosco do Santos, hateten katak, tinan-tinan UNPAZ sempre mai Aileu atu hala’o estajiu no atividade akademika. Nia konsidera katak programa PAK tinan ida ne’e di’ak liu tamba estudante sira, liuliu Aileu oan sira, fila fali ba sira nia suku no aldeia rasik atu hala’o pratika aprendizajen kampu.

PAM Aileu agradese tebes ba UNPAZ tamba iha tinan kotuk estudante sira mos halo ona pratika iha Aileu no konsege identifika problema barak ne’ebé depois hakerek iha livru ida no apresenta iha semináriu antes entrega ba parte Munisípiu. Programa ne’e ajuda tebes governu lokal atu identifika difikuldade no nesesidade komunidade sira nian.

Presidente Autoridade Munisípiu Aileu mos husu ba estudante sira atu tau-an hanesan estudante exemplár durante hala’o atividade iha terenu, atu labele estraga UNPAZ nia naran iha públiku nia matan.

Nia hatutan tan katak, UNPAZ nu’udar Universidade privada ida ne’ebé di’ak no respeitadu, tanba ne’e estudante sira tenke kuidadu ho sira nia atitude no komportamentu durante atividade iha komunidade, karik iha problema ruma durante atividade iha terenu, estudante sira tenke informa kedas ba xefe suku ka xefe aldeia atu bele buka solusaun hamutuk.

PAM Aileu espera katak, prezensa estudante sira bele ajuda komunidade liuhusi partilla informasaun importante, liuliu kona-ba sistema ekonomia, agrikultura no area seluk ne’ebé útil ba povu.

Iha sorin seluk, Kordenador Postu Administrativu Aileu Vila, apresente estudante hamutuk 48 ba Administrador Postu Administrativu Aileu Vila.

-UNPAZ #

𝐄𝐒𝐓𝐔𝐃𝐀𝐍𝐓𝐄 𝐔𝐍𝐏𝐀𝐙 𝐍𝐀𝐈𝐍 𝟐𝟑𝟖 𝐇𝐀𝐍𝐄𝐒𝐀𝐍 𝐁𝐎𝐁𝐎𝐍𝐀𝐑𝐎 𝐎𝐀𝐍 𝐒𝐄𝐈 𝐇𝐀𝐋𝐀𝐎 𝐀𝐓𝐈𝐕𝐈𝐃𝐀𝐃𝐄 𝐏𝐀𝐊 𝐈𝐇𝐀 𝐍𝐈𝐀 𝐌𝐔𝐍𝐈𝐒𝐈́𝐏𝐈𝐔

Bobonaro, 06 Maiu 2026 – Universidade da Paz (UNPAZ), liuhusi Koordenador Jerál Programa Prátika Aprendizajen Kampu (PAK) Munisípiu Bobonaro, Cipriano do Rosário Pacheco, AMG. Lic.SP.,M.Kes, entrega estudante UNPAZ nain 238, Presidente Autoridade Munisípiu Bobonaro, atu hala’o atividade PAK durante fulan ida iha Munisípiu Bobonaro, Serimónia ne'e entrega iha edifísiu Autoridade Munisípiu Bobonaro.

Iha okaziáun ne’e, Koordenador Jerál PAK, Cipriano do Rosário Pacheco, AMG, Lic.SP.M.Kes, hateten katak, objetivu husi sorumutu ne’e mak atu entrega estudante sira ba Autoridade Munisípiu hodi halo prátika aprendizajen kampu iha suku no aldeia sira iha Bobonaro. Programa PAK ne’e realiza kada tinan ba estudante semester V, ho objetivu atu sira bele aplika no demonstra abilidade ne’ebé hetan iha prosesu aprendizajen durante tempu eskola, no mós halo levantamentu dadus iha komunidade.

Nia hatutan tan katak, husi total estudante nain 238 ne’ebé entrega, maioria mai husi Munisípiu Bobonaro rasik, maski iha estudante balun husi Munisípiu seluk ne’ebé muda mai halo PAK iha Bobonaro tamba razaun sira ne’ebé la permite atu sira hala’o atividade iha sira nia fatin orijin.

Koordenador ne’e mós hato’o apresiasaun ba Autoridade Munisípiu Bobonaro ba nia disponibilidade no apoiu simu estudante sira, maski iha ajenda servisu ne’ebé barak.

Iha parte seluk, Presidente Autoridade Munisípiu Bobonaro, Paulo Moniz Maia hateten katak, sei halo koordenasaun ho administrador Postu Administrativu sira hodi organiza xefe suku no xefe aldeia sira atu simu estudante sira iha nivel lokal.

Nia husu ba estudante sira atu hatudu hahalok di’ak no respeitu komunidade, atu nune’e bele fasilita prosesu rekolla dadus ho di’ak durante fulan ida iha terenu hamutuk ho Komunidade sira.

Prezidente Autoridade Municípiu ne’e mós fó orientasaun katak, karik mosu dezentendimentu ruma durante atividade PAK, estudante sira tenke halo koordenasaun ho xefe aldeia, xefe suku no mós OPS hodi buka solusaun ne’ebé di’ak liu.

Nia enfátiza importánsia koperasaun di’ak ho komunidade, inklui joven sira, no husu ba estudante Bobonaro oan sira atu labele halo diferénsia ho estudante sira husi Munisípiu seluk, tanba hotu-hotu mai iha rai Bobonaro, Timor oan ida de’it.

Aleinde intrega estudante sira iha nivel Municipal Dosente orientador sira mos akompaña estudante sira hodi ba intrega ba iha administrador postu sira hanesan postu administrador Cailaco, Postu Atabae, postu Balibo, postu Bobonaro, postu Maliana Vila

Partisipa iha sorumutu ne’e mak Presidente Autoridade Munisípiu Bobonaro, dosente orientador PAK iha kada postu administrativu, no mós koordenador estudante sira.

-UNPAZ #

DEPARTAMENTU KONSERVASAUN REKURSU NATURAIS REALIZA PRÁTIKA HO ONG RAEBIA TIMOR-LESTE

Díli, 6 Maiu 2026 – Estudante sira husi Fakuldade Teknolojia Agríkola, Departamentu Konservasaun Rekursu Naturais, semester VII, Universidade da Paz (UNPAZ), realiza atividade prátika iha ONG RAEBIA Timor-Leste nu’udar parte husi prosesu aprendizajen akademiku.

Atividade prátika ida ne’e foka ba utilizasaun ai-matenek ba konstrusaun terasu no produsaun kompostu orgániku, ne’ebé integra prinsipiu sustentabilidade no jestaun rekursu naturais.

Durante atividade ne’e, estudante sira hetan orientasaun direta husi Koordenadora Tekniku RAEBIA, Leonora da Conceição, ne’ebé hatete katak, profisionál iha área konservasaun tenke prontu atu servisu iha terenu, no bele aplika konhesimentu teóriku no prátiku ne’ebé aprende iha ambiente universitáriu.

Atividade ne’e mós hetan apoiu husi fasilitador sira, Bentolino no Argentino, ne’ebé fó akompanhamentu tékniku durante implementasaun prátika iha kampu.

Prátika ida ne’e organiza husi dosente responsável ba disiplina, Eng. Romaldo Martins, M.Agr., nu’udar parte esensiál husi kuríkulu estudante semester VII, ho objetivu atu fortalece ligasaun entre abordajen teóriku sientífiku no aplikasaun prátika iha terenu.

Rezultadu husi atividade ida ne’e espera atu fó kontribuisaun importante ba dezenvolvimentu politika no prátika jestaun rekursu naturais iha Timor-Leste.

-UNPAZ #