Migrant Rights Promotion Working Group - MRPWG

၂၀၂၆ ခုနှစ်၊ မေလ (၁) ရက်နေ့တွင် ကျရောက်သော အပြည်ပြည်ဆိုင်ရာကမ္ဘာ့အလုပ်သမားနေ့ကို ဂုဏ်ပြုသောအားဖြင့် MRPWG ကွန်ယက် နှင့် ရွှေ့ပြောင်းအလုပ်သမားများ စုပေါင်း၍ ထူးခြားသည့် လှုပ်ရှားမှုတစ်ရပ်ကို ပြုလုပ်ခဲ့ကြသည်။

ယနေ့ ကျရောက်သည့် (၁၃၆) ကြိမ်မြောက် အပြည်ပြည်ဆိုင်ရာ ကမ္ဘာ့အလုပ်သမားနေ့ (May Day) အထိမ်းအမှတ်အဖြစ် MRPWG (Migrant Rights Promotion Working Group) ကွန်ယက် ဦးဆောင်မှုဖြင့် ရွှေ့ပြောင်းအလုပ်သမား ရာပေါင်းများစွာသည် မယ်တောင်မိုင်ကျေးရွာတွင် စုပေါင်း၍ အလုပ်သမားအခွင့်အရေး လှုပ်ရှားမှုတစ်ရပ်ကို စည်ကားသိုက်မြိုက်စွာ ကျင်းပခဲ့ကြသည်။ အခမ်းအနားတွင် မေဒေးသမိုင်းကြောင်း၊ MRPWG ကွန်ယက်အကြောင်းမိတ်ဆက်ခြင်း၊ သံချပ်များဖြင့် ဖျော်ဖြေခြင်း၊ ၁၃၆ ကြိမ်မြောက် ကမ္ဘာ့အလုပ်သမားနေ့ ထုတ်ပြန်ကြေညာချက်ဖတ်ကြားခြင်း၊
Burmese Women’s Union(BWU) မှ Panel discussion ပြုလုပ်ခြင်း၊ အလုပ်ရှင်၊ အလုပ်သမားနှင့် သက်ဆိုင်သည့် ပဟေဠိ မေးခွန်း နှင့် အဖြေများပြုလုပ်ခြင်းနှင့် ရခိုင်တိုင်းရင်းသား အကများဖြင့် ဖျော်ဖြေခဲ့ကြပါသည်။

အခမ်းအနား၏ အဓိကရည်ရွယ်ချက်များ

ဒီနေ့ လှုပ်ရှားမှုဟာ ရိုးရိုးပွဲတော်တစ်ခုထက်မကဘဲ ရွှေ့ပြောင်းအလုပ်သမားတွေရဲ့ ဘဝလုံခြုံရေးနဲ့ တန်းတူညီမျှမှုကို ဖော်ဆောင်ဖို့ ရည်ရွယ်ထားတာဖြစ်ပါတယ်။ အဓိကအားဖြင့် -

• အခွင့်အရေးတောင်းဆိုခြင်း: လုပ်ငန်းခွင်အတွင်း ဘေးကင်းလုံခြုံမှုနှင့် ထိုက်တန်သည့် လုပ်ခလစာ ရရှိရေး။

• စည်းလုံးညီညွတ်မှု: ရွှေ့ပြောင်းအလုပ်သမားအချင်းချင်းကြား ရိုင်းပင်းကူညီမှု ကွန်ယက် ပိုမိုခိုင်မာလာစေရေး။

• အသိပညာပေးခြင်း: ရွှေ့ပြောင်းသွားလာနေထိုင်ခြင်းဆိုင်ရာ ဥပဒေများနှင့် မိမိတို့ ခံစားခွင့်ရှိသည့် အခွင့်အရေးများကို မျှဝေခြင်း။

၁၃၆ ကြိမ်မြောက် ကမ္ဘာ့အလုပ်သမားနေ့ ထုတ်ပြန်ကြေညာချက်
ရက်စွဲ။ ။ ၂၀၂၆ ခုနှစ်၊ မေလ (၁) ရက် ကြေညာချက် အမှတ်။ ။ (၁/၂၀၂၆)

ကမ္ဘာ့သမိုင်းတွင် နိုင်ငံတကာအလုပ်သမားထုသည် အလုပ်သမားများ၏ အခြေခံရပိုင်ခွင့်အတွက် အသက်၊ ချွေး၊ သွေးနှင့် တိုက်ပွဲဝင်လာခဲ့ရင်း တနေ့အလုပ်ချိန် ၈ နာရီ သတ်မှတ်ရေး တိုက်ပွဲကို ဂုဏ်ပြုလျက် ကမ္ဘာ့အလုပ်သမားနေ့ သတ်မှတ် ကျင်းပခဲ့ကြသည်မှာ ၁၃၆ ကြိမ်မြောက်သို့ ရောက်ရှိပြီဖြစ်သည်။ သို့ရာတွင် မြန်မာရွှေ့ပြောင်းအလုပ်သမားများ အပါအဝင် အလုပ်သမားထုကြီးမှာ တနေ့အလုပ်ချိန် ၈ နာရီအပါအဝင် အခြေခံအခွင့်အရေးများ အပြည့်အဝရရှိရေးမှာ အလုပ်သမားအများစုအတွက် အလှမ်းဝေးနေဆဲဖြစ်သည်။

နိုင်ငံခြားသားအလုပ်သမား (သို့) ရွှေ့ပြောင်းအလုပ်သမားများကို လက်ခံအလုပ်လုပ်ကိုင်စေသည့် နိုင်ငံများ၏ လုပ်ငန်းခွင်များတွင် ဥပဒေနှင့်အညီ ပေးဆောင်ရန် သတ်မှတ်ထားသည့် အခြေခံလုပ်အားခကိုပင် ပြည့်ပြည့်ဝဝ မရရှိခြင်း၊ အလုပ်ကြမ်းများဖြစ်သည့် ညစ်ပတ်သည့်အလုပ်၊ အသက်အန္တရာယ်ရှိသည့်အလုပ်နှင့် လုပ်ငန်းခွင် ခက်ခဲသည့်အလုပ်များကိုသာ အများစု လုပ်ကိုင်နေကြရခြင်း၊ လုပ်ငန်းခွင် ဘေးကင်းလုံခြုံရေးနှင့် လုပ်ငန်းခွင် အာမခံမှုများမှာလည်း သေချာရေရာမှုမရှိသည့်အတွက် ကြိုတင်အကြောင်းမကြားဘဲ အကြောင်းမဲ့ အလုပ်ရပ်စဲခံရခြင်း၊ လုပ်အားခ မပေးဘဲ အလုပ်ထုတ်ပယ်ခံရခြင်းနှင့် လုပ်ငန်းခွင် ပိတ်သိမ်းပြီး တာဝန်ယူမှု တာဝန်ခံမှုမရှိဘဲ လုပ်ငန်းရှင်ဘက်က တိမ်းရှောင်သွားသည့် ဖြစ်ရပ်များကိုလည်း အလုပ်သမားများ ကြုံတွေ့နေရဆဲဖြစ်သည်။

ထို့ပြင် အလုပ်ရှင်အလုပ်သမား လုပ်ငန်းခွင်သဘောတူညီချက်ဆိုရာတွင် လုပ်ငန်းရှင်ဘက်က သူတို့နိုင်ငံ ဘာသာစကားဖြင့် ကြိုတင်ရေးဆွဲထားသည့် အချက်များကိုသာ အလုပ်သမားက (နားလည်သိရှိ ရှင်းလင်းမှုမရှိဘဲ) လက်မှတ်ရေးထိုးစေခြင်းမျိုးဖြစ်ပြီး အဆိုပါ လုပ်ဆောင်မှုသည် အလုပ်သမားများ၏ အားနည်းချက်ကို အလွဲသုံးစားလုပ်ခြင်းဖြစ်ပြီး နောက်ဆက်တွဲအနေဖြင့် လုပ်ငန်းရှင်ဘက်က လုပ်ငန်းခွင် သဘောတူညီချက်ပါ အချက်များကို အလုပ်သမားက ချိုးဖောက်သည်ဟု စွပ်စွဲပြီး အလုပ်က ထုတ်ပယ်ခြင်း၊ လုပ်အားခ မပေးဆောင်ဘဲ အလုပ်မှရပ်စဲခြင်းနှင့် အလုပ်သမားများကို ကုန်ထုတ်လုပ်မှုအရည်အသွေး ပြည့်မီစေရန်ဟုဆိုကာ အတင်းအကြပ် အချိန်ပို... နေဆိုင်း၊ ညဆိုင်းများ ခွဲကာ လုပ်ကိုင်စေခြင်း၊ အလုပ်ချိန် တိုးမြှင့်ခိုင်းစေခြင်း၊ ဖိအားပေး ခိုင်းစေခြင်း၊ အလုပ်သမားများ၏ ကိုယ်ပိုင် အထောက်အထားလက်မှတ်များကို လုပ်ငန်းခွင်တာဝန်ရှိသူများက သိမ်းဆည်းထားခြင်းနှင့် အလုပ်သမားများ သွားလာလှုပ်ရှားမှုကို ကန့်သတ်ထားခြင်းများကိုလည်း ရွှေ့ပြောင်းအလုပ်သမား အများစု ရင်ဆိုင်နေကြရသည်။
လက်ရှိအချိန်တွင် ရွှေ့ပြောင်းအလုပ်သမားများ ရင်ဆိုင်နေရသည့် အခက်အခဲမှာ တရားဝင်မှုဆိုင်ရာ အထောက်အထားလက်မှတ်နှင့် work permit ကိစ္စရပ်များမှာလည်း ထိုင်းနိုင်ငံ၏ ပေါ်လစီနှင့် ပြဋ္ဌာန်းချက်ဆိုင်ရာ အပြောင်းအလဲများ၊ ကန့်သတ်ချက်များ၊ ရှုပ်ထွေးသည့် အစီအစဉ်များကြောင့် ပွဲစားများအပေါ် မှီခိုလာကြရကာ အဆမတန် ဈေးကြီးမြင့်မှုတို့ကြောင့် တရားဝင်အစီအစဉ် ရှိနေသည့် ရွှေ့ပြောင်းအလုပ်သမားများကနေ တရားမဝင်ဖြစ်ရသည့် အခြေအနေများလည်း ရှိနေသည်။

တရားဝင်မှုဆိုင်ရာ အထောက်အထားလက်မှတ် မရှိသည့်အခါ လူမှုဖူလုံရေးထည့်ဝင်မှုနှင့် ခံစားခွင့်ဆိုင်ရာများ ဆုံးရှုံးနစ်နာရသလို ကျန်းမာရေး၊ ပညာရေး၊ လူမှုရေးကိစ္စရပ်များ၊ အလုပ်အကိုင်အခွင့်အလမ်း ကိစ္စရပ်များ၊ မိသားစုဆိုင်ရာ စီစဉ်ဆောင်ရွက်ရသည့် ကိစ္စရပ်များ အားလုံးအတွက်ပါ သွားရေး လာရေး အခက်တွေ့ကာ အားလုံး လက်လှမ်းမမီ ဖြစ်ကြရသည့်အပြင် ရွှေ့ပြောင်းအလုပ်သမားများအတွက် ဘဏ်စာအုပ်လုပ်ခြင်း၊ ယာဉ်မောင်းလိုင်စင်လုပ်ခြင်း စသည့် အခွင့်အရေးများ ဆုံးရှုံးကြရသည်။ နောက်ဆက်တွဲအနေဖြင့် အာဏာပိုင်များ၏ နေထိုင်ခွင့်၊ အလုပ်လုပ်ကိုင်ခွင့်ဆိုင်ရာ အထောက်အထားလက်မှတ် စစ်ဆေးမှုများနှင့် ရင်ဆိုင်ရသည့်အခါ ဖမ်းဆီး အရေးယူမှုများကို အကျိုးဆက်အဖြစ် ခံစားကြရသည်။

အထက်ပါ ရွှေ့ပြောင်းအလုပ်သမားများ ကြုံတွေ့နေရသည့် အခက်အခဲများ ဖြစ်ရသည့် အကြောင်းအရင်းခံမှာ ရွှေ့ပြောင်းအလုပ်သမားများကို လက်ခံ အလုပ်လုပ်ကိုင်စေသည့် အိမ်ရှင်နိုင်ငံနှင့် မိမိတို့နိုင်ငံ၏ နိုင်ငံရေးအခြေအနေကြောင့်သာ ဖြစ်နေရခြင်း ဖြစ်ကြောင်း သုံးသပ်တွေ့ရှိရသည်။ သို့ပါ၍ အဆိုပါ အခက်အခဲများကို ကျော်လွှားနိုင်ရန်မှာ မေဒေးစိတ်ဓါတ်ဖြင့် အလုပ်သမားထု သွေးစည်းညီညွတ်စွာ နိုးထ ရုန်းကန်ရန်နှင့် အမိမြန်မာနိုင်ငံရေး အပြောင်းအလဲများတွင် မဖြစ်မနေ တထောင့်တနေရာက ပါဝင်လှုပ်ရှားကြရန် အထူးပင်လိုအပ်ပါသည်။

မေဒေးစိတ်ဓါတ်ဖြင့် ရုန်းထကြ အလုပ်သမားအခွင့်အရေး လူ့အခွင့်အရေး နိုင်ငံတကာအလုပ်သမားထု သွေးစည်းညီညွတ်ကြ . . . . ။

MRPWG ကွန်ယက်

အသက်အရွယ်မရွေး ၊ လူမျိုးမရွေး ပြည်သူများအားလုံး ( ထိုင်းနိုင်ငံသားနှင့် နိုင်ငံခြားသားများအားလုံး ကာကွယ်ဆေးထိုးနှံသည့် ဝန်ဆောင်မှု ရယူနိုင်ပါသည်။

(အသေးစိတ်ကို ပုံတွင်ဖတ်ပေးကြရန် မေတ္တာရပ်ခံအပ်ပါသည်)

source :https://www.facebook.com/photo?fbid=1532610032202385&set=a.747545990708797

crd : photo

အလုပ်ခွင် ဓာတ်မတည့်ရောဂါ (Office Allergy) – အလုပ်လုပ်ကိုင်သူတိုင်း သတိထားရမည့် အဖြစ်များသောရောဂါ

ယခုတလော အလုပ်ခွင်သို့ ရောက်ရှိချိန်၌ ဖျားနာရလွယ်ကူခြင်း၊ နှာစေးခြင်း၊ ဖျားခြင်း၊ ခန္ဓာကိုယ်အနှံ့ နာကျင်ကိုက်ခဲခြင်း စသည့် လက္ခဏာများကို ခံစားရပါက၊ ယင်းသည် အလုပ်ခွင် ဓာတ်မတည့်ရောဂါ (Office Allergy) ၏ လက္ခဏာများ ဖြစ်နိုင်ပါသည်။ ဤရောဂါသည် အလုပ်လုပ်ကိုင်သူတိုင်း သတိထားရမည့် အဖြစ်များသောရောဂါဖြစ်ပြီး၊ ကာကွယ်ရန် အကြံပြုချက်များကို လိုက်နာခြင်းဖြင့် မိမိ၏ ကျန်းမာရေးကို အကာအကွယ်ပေးနိုင်ပါသည်။

အလုပ်ခွင် ဓာတ်မတည့်ရောဂါ (Sick Building Syndrome) ဖြစ်ပွားရသည့် အကြောင်းရင်းများ

ညစ်ညမ်းသောပတ်ဝန်းကျင်ရှိသည့် အဆောက်အဦးအတွင်း အမြဲတမ်း နေထိုင်ရခြင်း: အလုပ်ခွင်အတွင်း လေအရည်အသွေး မကောင်းခြင်း၊ ဖုန်မှုန့်နှင့် အမှုန်အမွှားများ ပျံ့လွင့်နေခြင်း၊ ဓာတုပစ္စည်းများ အသုံးပြုခြင်း စသည့် အကြောင်းရင်းများကြောင့် ရောဂါဖြစ်ပွားနိုင်ပါသည်။

ညစ်ပတ်ပြီး အချိန်ကြာမြင့်စွာ မသန့်ရှင်းရသေးသော အေးစက်စက် လေအေးပေးစက်: လေအေးပေးစက်အတွင်း ပိုးမွှားများနှင့် ဖုန်မှုန့်များ စုဆောင်းနေခြင်းကြောင့် လေအရည်အသွေး ညစ်ညမ်းစေပြီး ရောဂါဖြစ်ပွားနိုင်ပါသည်။

အလင်းရောင် နည်းပါးခြင်းနှင့် လေဝင်လေထွက် မကောင်းသောနေရာ: အလင်းရောင် နည်းပါးခြင်းကြောင့် မျက်လုံးပင်ပန်းမှုကို ဖြစ်စေပြီး၊ လေဝင်လေထွက် မကောင်းခြင်းကြောင့် လေအရည်အသွေး ညစ်ညမ်းစေပြီး ရောဂါဖြစ်ပွားနိုင်ပါသည်။

အလုပ်ခွင် ဓာတ်မတည့်ရောဂါ၏ လက္ခဏာများ
ဦးခေါင်းနှင့် အာရုံကြော: ခေါင်းကိုက်ခြင်း၊ ခေါင်းမူးခြင်း၊ ခေါင်းကိုက်ခြင်း၊ ပျို့အန်ခြင်း၊ အားအင်ကုန်ခမ်းခြင်း၊ အာရုံစူးစိုက်မှုမရှိခြင်း

မျက်လုံးနှင့် နှာခေါင်း: မျက်လုံး/နှာခေါင်း ခြောက်သွေ့ခြင်း၊ မျက်လုံးပူခြင်း၊ နှာပိတ်ခြင်း၊ နှာရည်ယိုခြင်း၊ အရေပြားခြောက်သွေ့ခြင်း

အသက်ရှူလမ်းကြောင်း: ချောင်းဆိုးခြင်း၊ နှာချေခြင်း၊ ရင်ဘတ်အောင့်ခြင်း၊ အသက်ရှူရခက်ခဲခြင်း၊ ပန်းနာရင်ကျပ်ရောဂါနှင့်တူသော လက္ခဏာများ

ခန္ဓာကိုယ်: ခန္ဓာကိုယ်အနှံ့ နာကျင်ကိုက်ခဲခြင်း၊ ဖျားခြင်း၊ ချမ်းတုန်ခြင်း၊ နေထိုင်မကောင်းခြင်း

ကာကွယ်ရန် အကြံပြုချက် ၃ ချက်
၁။ အလုပ်ခွင် ပတ်ဝန်းကျင်ကို သန့်ရှင်းလတ်ဆတ်စေရန်
အလုပ်စားပွဲကို သန့်ရှင်းရေးလုပ်ပါ: ပိုးမွှားနှင့် ဖုန်မှုန့်များ ကင်းစင်အောင် နေ့စဉ် သန့်ရှင်းရေးလုပ်ပါ။

လေသန့်စင်ရန် သစ်ပင်များ စိုက်ပါ: အလုပ်ခွင်အတွင်း လေသန့်စင်မှု ကောင်းမွန်စေရန် သဘာဝသစ်ပင်များကို အသုံးပြုပါ။

လုံလောက်သော အလင်းရောင်ရအောင် စီစဉ်ပါ: မျက်လုံးပင်ပန်းမှုကို လျော့ချရန်နှင့် စိတ်ဖိစီးမှုကို လျော့ချရန် သဘာဝအလင်းရောင်ကို အသုံးပြုပါ။

၂။ အလုပ်ခွင်အတွင်း လေအရည်အသွေးကို ဂရုစိုက်ပါ
လေအေးပေးစက်ကို ပုံမှန်ဆေးကြောပါ: လေသန့်စင်မှု ကောင်းမွန်စေရန် အေးစက်စက် လေအေးပေးစက်ကို ၃-၆ လတစ်ကြိမ် ဆေးကြောပါ။

လေဝင်လေထွက်ကောင်းစေရန် ပြတင်းပေါက်များကို ဖွင့်ပါ: နေ့စဉ် အနည်းဆုံး ၁၅-၂၀ မိနစ် ပြတင်းပေါက်များကို ဖွင့်၍ လေဝင်လေထွက် ကောင်းမွန်အောင်လုပ်ပါ။

ဓာတုပစ္စည်းများ အသုံးပြုခြင်းကို ရှောင်ကြဉ်ပါ: အလုပ်ခွင်အတွင်း ဓာတုပစ္စည်းများ၊ ဖျန်းဆေးများနှင့် ပိုးသတ်ဆေးများကို အသုံးပြုခြင်းကို ရှောင်ကြဉ်ပါ။

၃။ မိမိ၏ ကျန်းမာရေးနှင့် လူနေမှုဘဝကို ဂရုစိုက်ပါ
လုံလောက်စွာ အိပ်စက်အနားယူပါ: ခန္ဓာကိုယ်၏ ခုခံအားစနစ် ကောင်းမွန်စေရန် နေ့စဉ် ၇-၈ နာရီ အိပ်စက်ပါ။

ရေများများသောက်ပါ: အရေပြားခြောက်သွေ့ခြင်းကို ကာကွယ်ရန်နှင့် ခန္ဓာကိုယ်ကို ရေဓာတ်ပြည့်ဝစေရန် နေ့စဉ် ရေများများသောက်ပါ။

အပြင်ထွက်ပြီး လတ်ဆတ်သောလေကို ရှူရှိုက်ပါ: အသက်ရှူလမ်းကြောင်း ကောင်းမွန်စေရန်နှင့် စိတ်ဖိစီးမှုကို လျော့ချရန် အပြင်ထွက်ပြီး လတ်ဆတ်သောလေကို ရှူရှိုက်ပါ။

ရင်းမြစ်: အလုပ်ခွင်နှင့် ပတ်ဝန်းကျင်ဆိုင်ရာ ရောဂါထိန်းချုပ်ရေးဗဟိုဌာန၊ ရောဂါထိန်းချုပ်ရေးဦးစီးဌာန

မူရင်းလင့်
https://www.facebook.com/photo/?fbid=1346333367538621&set=a.448108010694499