Akha Newcreation Studio

Miqyaer pyeuf-eu Yeqsur-anr noeqkeuv-awq
25-05-2026การตระหนักรู้ถึงความเป็นองค์พระผู้เป็นเจ้าของพระองค์

“Aqyuif aqnyir deuq-or! Nymq-mr ngar, nawmaf-anr Miqyaer-euq aqlaf-euq lafkhoer hawr-eu aqyawf-euq guiqlanq yawdzanr-euq dawq-euq lafkhoer a’naeq-awr bi jawryaf ma. Guiqlanq yawdzanr-euq dawq khoer-aq, nawmaf-anr bihuiq bi manrlar nya-awr, lavshawr-euq tsawrhaq dawqtawvluf naeq-aer, nawmaf tiqkawv lof-aer jeqbir za’nya-eu mae.”
(‭‭Ghaqkhaer‬ ‭20‬:‭32‬)

Nawr, Yeqsur Kali-euq lafkhoer jawr-eu nar-aq, Khoer-aq. dawqtawvl luf daefzir yawshuif mae, Sanqpaq Yeqsur nawq-eu Sanqpaq pyeuf-eu daefzir mae, Aefkhawf kalizaq ghawqmya ghaq Sanqpaq Yeqsur Aqyawf maf-eu daefzir lafkhoer Miqayer pyeuf-eu gar maqnoeq keuv-a, Nawr, Sanqpaq Yeqsur-aq, nawq-eu Miqyaer ma laer aernar-aq, Khoer-aq. Miqyaer-euq yaerdawq nawq-eu daefzir lafkhoer Baoq bijav ma laer aer aermawf-eu gar dur-eu mae

Sanqpaq Yeqsur aqyawf Miqyaer pyeuf-eu khoer-aq, Miqyaer-euq yaerdawq-anr nae mawrlar-eu mae, Nawr, Aqyawf-eu yaerdawq-anr maq hageuf nar-aq, Nawr, Aqyawf uvlanr-eu lafkhoer yawdaef maqdaef nya-a, Yaerdawq-aq, Guiqlanq yawdzanr-eu dawq pyeufmae laer Yaerbof-eu lafkhoer aertaq-euq mae, Khoer-aq, nawq-eu daef bae-awr, nawq-anr ghaq bif-awr Kali-euq lafkhoer anr-eu nawq-eu jeqbir bizmq nya-eu mae

Teubaqda mirnae, Nawr uqduq tanqnymr aqgeu gar khawf ir-awr, aqgeu jeq khawf narhaq ma laer maqngeur-a, Miqyaer-euq yaerdawq maeq-eu aqgeu gar khawf nawq-anr bihuiq bimanr lar nya-eu laer maqngeur-a, “guiqlanq yawdzanr-euq dawq-aq, Kali-anr panmaeq-eu mae, Yeqsur kali nae mrluiv-eu jeq panmaeq naeq-eu mae, Khoernar-aq, nawq-eu nuijan lanqlar-awr, Nawr khaqduq ni ghaelar-eu uqtaf Nawr, jav-eu jeqbir-anr siqnya lar-eu mae, Heu-aq, Nawr, Sanqpaq Yeqsur Nawq-eu Miqyaer pyeuf-eu lafkhoer yawdaef daefnya-awr, ghaq khavlar-eu mae

Teumirnae Baoq heu-eu lafkhoer nae nae yawdaef daefma laer noeqtsaev-awq, Nawr Miqayer-euq yaerdawq-anr ngaeq-aer hageuf nar-aq, Nawr Sanqpaq Yeqsur-anr ngaeq-aer siqnya lar-awr, Miqayer-euq yawshaef khanqsaer Nawq-eu daefzir lafkhoer nae dovle-awr, Nawq-eu daefzir khawf yawdzer dzaq-anr navluf lanqlar-eu mae

mr-eu jan-eu dawq
Ngar, Miqyaer-euq yaerdawq-eu Baoq-anr tiqbyan tiqlof hageuf ma, Guiqlanq yawdzanr-eu dawq khoer-aq Ngaq-anr ghaq bifnaeq laf-awr bihuiq bimanr lar-eu uqtaf kali-euq lafkhoer ngaq-eu jeqbir-anr bi siqnya-eu mae, Ngar-aq huiqlar luf-awr maeqhu paw taef-aer can davlef luf-eu ma, Miqyaer-euq yawshaef khanqsaer byaqhaw naeq-eu ma, Aqjeqmirnae aernar-aq, Ngar Miqyaer-euq yaerdawq-anr mrcaw-eu ma, Miqyaer-euq yaerdawq-aq ngaq-eu daef-eu jeq pyeuf-awr, yawqjeq navluf pyeuf-eu mae Haleluya

Heugar guilanq nya-eu mae
Gawrlawrsaer 3:16/ Yawkov 1:21/ 2Tirmorseq 3:16-17

Tsaq-awr dawr-eu nuinoeq
17-05-2016 จิตสำนึกแห่งความชอบธรรม

“Kali-aq, iqbax tiqpawf-iq maqanr-eu khawf, aqdui-euq gharduq Miqyaer, aqyawf-anr iqbax bipyeuf-ir-euq mae. Khoermirnae, Kali-euq lafkhoer aqdui, Miqyaer-euq tsaq-awr dawr-eu tsawrhaq pyeuflar-euq ma.”
‭‭(2 Gawrliqtu‬ ‭5‬:‭21‬)

Yawshawr saflar panmaeq-eu pawnae Ghaqkhaer Pawrluf zanqler paq-aer ghae-eu dawq ngaeq-euq mae, Khoer-aq, Aqda Miqyaer Sanqpaq Yeqsur iqbax tiqpawf-iq maqanr-eu gar Aqdui-euq gharduq iqbax bipyeuf-ir-euq mae, Aqdui Miqyaer-euq tsaq-awr dawr-eu tsawrhaq pyeuflar-eu gharduq mae, Heu-aq, zawr-aer zanqler paq-aer ghae-eu mae, Aqyawf aqdui-euq gharduq darkawq lafyaq-eu khoertav iqbax pyeuf-ir-euq mae, Aqyawf-aq aqdir aqdui-euq iqbax gharduq danzar pyeuf-ir-euq mae

Heu-aq, Miqayer yeqsur-anr iqbax maqanr nga laer aer-eu nav maqtser pyeuf-eu mae, Khoernav maqtser naf-eu dawq mae, Khoer-aq. Sanqpaq Yeqsur aqyawf yawqha iqbax maqanr laer siqnya-eu mae, Aqyawf-aq. iqbax lafkhoer marbyawf maqbaw laer yawduq baw-eu lafkhoer yawdaef dawf-euq mae,

Teubaqda mirnae aqdui tsaq-awr dawr-eu nuinoeq anr-eu teu-aq, aryaer huiqdui dui-eu jeq pyeufmae, Sanqpaq Yeqsur aqyawf yawqha iqbax tiqpawf-ir maqanr laer noeq-awr nae yawdaef daef-euq nar-aq, Nawr khawf aqyawf-eu tsaq-awr dawr-euq tsawrhaq pyeuf mirnae aqyawf-eu lafkhoer tsaq-awr dawr tsawrhaq ma laer noeq-awr yawdaef yadaef-eu mae, Miqyaer nawq-anr aqyawf-eu lafkhoer bitsaq bidawr lar-euq taef maqngeur-aq, Aerkhawf nawq-anr Miqyaer-euq tsaq-awr dawr-eu tsawrhaq bipyeuf lar-euq mae, Nawr-aq. aqdir Miqyaer-euq tsaq-aer dawr-eu jeq byaqhaw naeq-eu tsawrhaq pyeuflar-euq mae, Nawr-aq, tsawrhaqzaq-eu mawrdo lafkhoer ur-awr canluf-eu Miqyaer-euq tsaq-awr dawr-eu jeq mae

Nawr, heu-anr ghovshaw nya nar-aq, Heujeq nawq-eu daefzir-anr lavpar-eu mae, Nawr, yawqhar yawqha buq-ir-euq iqbax zaq tiqghaq le laer maqpar haw-eu mae, Aerkhawf Nawr-aq, aqdir Miqyaer-euq zaq pyeuf-awr mirtsaq khoertav Miqayer-euq byankuf-eu lafkhoer, shawr-eu lafkhoer hawr-eu Miqyaer-euq yawshaef khanqsaer lafkhoer nae yawdaef daef-eu mae,
Heu-aq. Nawr, aqdir pyeuf-eu ghaq mae, Miqyaer Irsaqyar 54:17-anr aertaq-eu” Aqyawfmaf-eu tsaq-awr dawr-eu jeq-aq, Ngaq-anr nae oe-euq mae… laer aertaq-euq mae

Teumirnae Ghaqkhaer Pawrluv khawf (Pilrpiv 3:8-9) lafkhoer heulof-aer aertaq-euq mae…“Ngar, Kali-euq lafkhoer jawrnya’ni khoerlof-aer sawxtaq-euq ma. Zanrdawq-anr taf-eu ngaq-euq tsaq-awr dawr-eu jeq maqjav. Aerkhawf, Kali-euq lafkhoer jan-eu jeq-euq baqda’nae tsaq-awr dawr-eu jeq jav ma. Tsaq-awr dawr-eu heujeq-aq, jan-eu mirnae, Miqyaer-anr nae za-euq tsaq-awr dawr-eu jeq pyeuf-eu mae.”laer aertaq-euq mae, Aqmyanluf Kali-euq lafkhoer nawq-eu tsaq-awr dawr-eu jeq-anr noeqkeuv-awq, Nawr, heulof-aer noeqnar-aq, Nawq-eu daefzir lafkhoer nuima khaqlar-awr shaqzanq yawqjeq navluf-anr uvlanr nya-eu mae, Miqyaer guiqlanq-anr jaceuq ma


Ngamaf-anr Gaqdui dui-eu Aqda Miqyaer-or, kali-euq lafkhoer Ngamaf-eu tsaq-awr dawr-eu jeq-anr panmaeq naeqlaf-euq mirnae guiqlanq huiqma, Ngamaf-aq, aqmyanluf Miqyaer-euq tsaq-awr dawr-eu tsawrhaq pyeuf-awr marbyawf maqbaw-eu shawr-eu tsawrhaq ma laer noeqkeuv-eu ma, Ngamaf aqmyanluf uvlanr-eu lafkhoer yawdaef daef-awr, Miqayer-euq saevdzeuf byaqhaw naeq-eu ma, hawr-eu ngamaf-eu daefzir lafkhoer Miqyaer nae khaertaq-euq Miqyaer nuima tsaq-eu jeq mrluiv nya ma, Yeqsur Kali tsawrmyanr lafkhoer nae shar-eu ma, Aqmeq

Heugar guilanq nya-eu mae
Lormav 5:17/ Lormav 5:1/ 1Gawrliqtu 1:30