1990

نيالك شقد بتقدر تتحمل وتسكت !
أكتر جملة بخاف اسمعا ، انا مش حجر ..
بمرحلة بحياتك ، بتصل لمرحلة كبت عظيم ، كلام مخبى جواتك ، وحكي ما بيخلص ، عتب ، شوق ، زعل ، حب وقتا بس ما رح تحكي شعورك ..
بس بفكرك هاد الكبت رح يبقى جواتك ؟
صدقني غلطان كتير ، هاد الكبت بيبلش يطلع ع اشكال تانية غير الحكي ، نقص وزنك ، عيونك الي صار حواليها سواد بسواد ، هدوئك المرعب ، بتصير حدا تاني ما بتشبه حقيقتك ..
رح ينحكالك متغير ، لا تستغرب انت تغيرت بطريقة انت مو ملاحظ ع حالك ..
وقف قدام المراية ، اتطلع بحالك منيح ، رح تشوف تفاصيل ما بتشتبهك ، رح تشوف شيب بشعرك بس كالعادة ما رح تحكي حرف او تقوم باي ردة فعل ..
مع الوقت رح يجيك اتصالات كتيرة من ناس كانت تعرفك ، ارقام كتيرة واسماء مسجلة بتلفونك بس ما منها فايدة ، حتى رح تصير تحاول تتذكر اشكال هي الاشخاص كيف ؟
رح تفوت بعدة مراحل ، اكتئاب طويل ، كتمان ، كبت ما بيخلص ، هدوء وسلام ، لامبالاة ، ورح تتختما بالقُبول ، رح تصير تشوف كلشي بعيونك بس ما بقى رح يأثر عليك ..
ما تخاف ، هي مراحل الكل رح يمرق فيا ، لانو بحاجة يمرق فيا ..
نفسك بحاجة تتغير ، حساباتك ، اشخاصك ، شخصيتك ، وعقليتك ..
رح تفكر بيوم انك مجرد شخص بائس ما عندو هدف ، صدقني هي مراحل تطوير للذات ...
بس تخلص من هي المراحل رح تلاقي حالك حدا تاني ، حدا قادر يحب بطريقة صح ، والأشخاص الي حواليه كلن صح ، ع الرغم انو رح يكون عددن قليل ، بس فيك تتعتبرن النخبة او الأفضل ..
كلو رح يختلف عليك ، ذوقك الموسيقي ، احساسك الأدبي ، ثقافتك ، منهجيتك بالتعامل مع الناس ، واختيار الاشخاص ..