Beta store

وراء كل رجل عظيم امراة عظيمة💃😌✨

يلا دة عندهم هناك اما نحن عندنا
- وراء كل هاتف عظيم انوية قوية 💪🔥

ايوة زي ما بقول ليك اي تلفون جامد و أداءه جبار وراءه أنوية قوية😁✨ وإذا عاوز تعرف تلفونك من التلفونات العظيمة ولا لأ تابع معاي🏃

الانوية يا عزيزي هي البتقوم بالعمليات في المعالج و بتتقسم على حسب التردد و المهام الحتقوم بيها كل نواة.
مكاوي 🙇 : كيف ما فهمت ؟! تعال اوريك كيف....🚶
🔶 افرض يا عزيزي مكاوي عندك مصنع ، فالعمال 👷 البيقومو بالشغل هم الانوية ، وتأثير عدد الانوية زي لو عندك 4 عمال ، طبعا حيكون شغلهم اسرع من عاملين صح؟! و لو 8 اكيد حيكونو اسرع من ال 4 وهكذا .
مكاوي : اممممم ، و طيب التردد الوريتنا ليه في المنشور الفات وين و بأثر في شنو؟!
- اخيرا سؤال في وقته 😁 ، و عشان الصورة توضح ليك اكتر ......... إذا فرضنا انو بتبني في عمارة 🏢 و العامل 👷 بيعمل 2 مليار عملية في الثانية (( اللي هو التردد 2GHz)) هل حيكون زي البيعمل 1.5 مليار عملية في الثانية (( اللي هو العردد 1.5 GHz )) ؟! طيب ال 4 عمال شغلهم حيكون نفس شغل ال 8 و بنتهوا في زمن واحد؟؟! أكييد لأ!!
🔶 هنا عدد الانوية هو عدد العمال و التردد هو عدد العمليات البقوم بيها العامل في الثانية ، يبقى كلما زادت الانوية ↖️ و زاد التردد ↖️ المعالج حينجز المهام اسرع و حيقدر يأدي مهام اكتر واداؤه حيكون اعلى🔥 ، وضح؟!
مكاوي 🙇 : طيب ليه في اختلاف تردد في الانوية و بتكون مقسمة علي مجموعتين و مرات تلاتة؟!
🔶 حلو!! ، عندنا الانوية اللي هي ضربنا بيها مثل بالعمال ، طبعا العمال ما حيكونو كلهم بنفس القوة 💪و نفس الامكانيات فحتلاقي بعضهم قوي وبتحمل الشغل الشاق ✊و بعضهم ضعيف🤏 و ما بيقدر غير علي المهام البسيطة و بنفس الفهم بيتم تقسيم الانوية وتعال ناخد مثال :

- نفرض عندنا المعالجين X,Y عشان نقرب الفهم :
🔶 X = Mk1 Octa-core( 4×1.5GHz cortex a53 ,
4×2.2GHz cortex a57)
* ملاحظة : mk1 هو نوع المعالج وقد يكون ( dimensity , snapdragon , Kirin.....)
و دة معناه👇
- المعالج X معالج ثماني النواة (اي فيهو 8 انوية) مقسم علي مجموعتين ( 4 انوية بتردد 1.5 للمهام البسيطة ، و ال 4 التانيات بتردد 2.2 للمهام الثقيلة )

🔶 Y= Mk2 Octa-core (1×3.0 GHz cortex-A78 & 3×2.6 GHz cortex-A78 & 4×2.0 GHz cortex-A55)
و دة معناه👇
- المعالج Y برضه معالج ثماني النواة مقسم علي 3 مجموعات { (4) انوية بتردد 2.2 GHz للمهام البسيطة + (3) انوية بتردد 2.6 GHzللمهام المتوسطة + نواة واحدة (1) بتردد 3 GHz للمهام الثقيلة }

مكاوي 🙇 : بس كدة دة ياهو معنى الارقام و الكلام البكون مع مواصفات المعالج؟!😂
🔶 ايوة بس كدة😁.
مكاوي 🙇 : يااخ والله كان عندي منو فوبيا عديل كل ما يلاقيني كنت بتخطاهو🥲 لكن من اليوم و تاني ما حتخطاهو وقت طلع ساهل كدة😌🙏 طيب سؤال اخير ...
عرفنا التردد و الانوية و قياسهم ، طيب التقسيم دة لشنو ما يخلوهم كلهم بنفس التردد أو يكون ترددهم عالي ليه انوية ترددها عالي و انوية اقل ليه مقسمة كدة؟!

🔶 حنقول ليك الليلة كفاية لحدي هنا عشان طولنا عليكم😊 و المرة الجاية حنتكلم عن (( توزيع المهام علي الانوية و ليه اصلا بتتقسم وما بتكون نفس التردد او ترددها كلها يكون عالي)) تابعونا....😉🧡.
🧡📱بيتا استور مرجعك الالكتروني🖥️🧡.

قول بسم الله و ادخل برجلك اليمين قصدي اصبعك اليمين 😁‼️.
-----------------------------------------

عرفنا انو المعالج أهم قطعة في الهاتف 📱، و كل العمليات في الهاتف بتتم عن طريق المعالج من فتح تطبيقات لتشغيلها ، لتخزين ، لتصوير 📸، لتشغيل العاب🕹️ ، و إنو سرعة الهاتف ودقة الشاشة و التصوير و السلاسة في الاستعمال كله من المعالج ، و كل ما المعالج كان اقوى زادت امكانيات التلفون و العكس كلما كان المعالج ضعيف حتى لو امكانيات التلفون عالية ما حتديك الاداء الكامل و المرضي وقد يكون سئ بعض الاحيان.

- طيب يا عزيزي لمن تكون عاوز تشتري تلفون من ضمن المواصفات حتلقى المعالج وهو محور سلستنا ، و دايما بتلقى اسم غريب ومعاه ارقام غريبة ومرات حروف ما فاهم قصتها شنو صح؟! طيب تعال نخت الكورة واطة و نشوف قصتها شنو🚶.

يلا يا عزيزي نسمي بالله و نبدأ ونقول في الغالب اسم المعالج بيتكون من 3 عناصر اساسية :
◀️ التردد.
◀️ المعمارية.
◀️ عدد الأنوية.
- (ما عدا iPhone بتصنع معالجات مختلفة لأسباب حنتكلم عنها لقدام ان شاء الله )

⁉️ يلا نجي نتكلم عن اول حاجة محتاجين نعرفها وابسط حاجة هي التردد ، شنو هو التردد و يقاس كيف؟!
(*ملاحظة : عشان الإسم ما يلخبطك أو يعقد الشرح اعتبر انه التردد هو سرعة المعالج و يلا نتابع علي ألأساس دة...🏃)
🔶 التردد زي ما مر علينا في مراحلنا الدراسية هو عدد الدورات في الثانية / عدد اللفات في الثانية وهكذا لكن هنا التردد هو (( عدد العمليات البيقوم بيها المعالج في الثانية الواحدة )) ، و تقدر تتخيل عزيزي المتابع المعالج بيقوم بكم عملية في الثانية؟!🤔
- 100 عملية ؟! ، 200 عملية ؟! ، 500 عملية ؟! ،الف عملية ؟! ، 10الف عملية ؟! لا لا لا دة فوق ما تتخيل عزيزي المتابع😬 ، متوسط الانوية بتشتغل بتردد 2 GHz عارف دي معناها كم عملية؟! دي معناها 2 مليار عملية في الثانية!!😳 ودة بتقوم بيه نواة واحدة فقط و اغلب الاجهزة حاليا بتتكون من 4 انوية في الاجهزة من الفئة التالتة او الاقتصادية يعني 8 مليار عملية في الثانية!! و في اجهزة قد يصل ترددها ل 3 GHz في النواة الواحدة.

🔶 و يختلف تردد الانوية عن بعضها حسب المهام البتقوم بيها من مهام خفيفة زي التصغح و تشغيل التطبيقات الى متوسطة مثل التصوير وتعديل الصور الى ثقيلة كالتصميم و الالعاب وحنعرف التفاصيل في المنشوران الجاية إن شاء الله.

الخلاصة 💁🏻‍♂️ :
التردد هو عدد العمليات البيعملها المعالج في الثانية الواحدة و كل ما زاد التردد حيأدي مهام اكتر و حيكون اداء الهاتف اسرع و أخف ✅.

بعض الناس قد تكون ما اتضحت ليها الصورة كاملة ، وان شاء الله بعد نتعرف علي الانوية والمعمارية وتركيبة المعالج حتتضح الصورة الكاملة فتابعنا عشان تعرف اكتر😉✅.
🧡📱بيتا استور مرجعك الالكتروني🖥️🧡.

العقل الإلكتروني........🧑‍💻🫣✴️.
------------------------------------

اذا زول سألك قال ليك عاوز اشتري تلفون ودايرك توريني اهم حاجة في التلفون حتقول ليه شنو...؟!🤔
- البطارية🔋 ، الرام 💾، الكاميرا📸 ، اذا كان جوابك واحد من ديل فحابي اقول ليك اي نعم ديل مهمات بس ما اهم حاجة في التلفون ، حتسألني اهم حاجة شنو حقول ليك المعالج طبعا ، ولو مستغرب تعال اوريك ليه المعالج اهم حاجة👇.

🔶 اذا قلت البطارية حقول ليك إنو شحن البطارية واستهلاكها بيعتمد على نوع المعالج 🤷 ، فبتلقى معالجات أداءها عالي و بتستهلك بطارية و في معالجات أداءها متوسط و بتحافظ علي استهلاك البطارية و كمان قد تلقى معالج أداءه عالي و ما بيستهلك بطارية🌟 و بيختلف باختلاف المعالج و الغرض منه وكله حنجي ليه إن شاء الله ، حتى الشحن بتلقى معالجات بتشحن 10 وات فقط و حتلقى شحن سريع 15 وات و 22 وات و 45 وات و 67 وات وكله بيحكمه المعالج.
🔶 إذا قلت الرام فحقول ليك أعرف إنو الرام عبارة عن ذاكرة وصول والغرض منها تسهيل العمليات على المعالج يعني العمل ألأساسي والتنفيذ كله بيقوم بيه المعالج و الرام بيساعده في الوصول وبرضه حنتكلم عنه إن شاء الله🙇.
🔶 اذا قلت الكاميرا حقول ليك انو اداء الكاميرا بيعتمد على المعالج وكل ما كان أداءه عالي حتلاقي تصويره احسن و اوضح ، و عادي تلقى في المواصفات لمن تجي تشتري الكاميرا 90،60، او حتى اكتر من 100 ميغا بكسل بس تصويره بكون ما مرضي🤷 وحاصلة كتير و برضه بسبب المعالج و اكبر دليل كاميرا الايفون✔️.

الخلاصة 💁 :
ممكن تشبه المعالج بالدماغ البشري🧠 ، يعني اي معلومة واي شي بيحصل في الجسم لازم يمر بالدماغ عن طريق النواقل العصبية وتتم معالجته حتى مرة تانية اخراج الاوامر 🔙 عن طريق النواقل العصبية للعضو المراد تحريكه و تنفيذ الامر✅ ، وكلما زاد ذكاء الزول بتزيد المهام البقدر يأديها مثله مثل المعالج اي عملية بتحصل في الهاتف بغض النظر عن نوعها بتمر بالمعالج وتتم معالجتها داخله و من ثم تنفيذها وكلما زادت قوة المعالج كان اداء الهاتف أقوى و أفضل 💪✅.

طيب يا عزيزي بما انو عرفت انو المعالج اهم حاجة في الهاتف هل
- بتعرف انواع المعالجات؟!!
- بتعرف امكانيات المعالج من إسمه بس؟!!
- بتعرف تفرق بين المعالجات وتقارن بينهم؟!!
- بتعرف افضل المعالجات؟!!

إذا ما بتعرف دة كله فتابعنا و حتتعرف معانا علي المعالجات بالتفصيل و تتعرف علي امكانيات معالجك و تفرق بين المعالجات و إذا عاوز تشتري تلفون تعرف كيف تختار معالج مناسب يديك افضل إمكانيات✅ ، وبكدة دي حتكون اول سلسلة لينا ان شاء الله في بيتا استور وهي (معالجات الهواتف📱) نتمنى تستفيدوا منها🧡🤍.
🧡📱بيتا استور مرجعك الالكتروني🖥️🧡.

مكاوي🙋 .......و بيتا 🏪🧡.
-----------------------------------

مكاوي بسأل : قبل ما اعمل متابعة هل متجركم زي باقي المتاجر ولا مختلف؟!
- لأ طبعا ، في Beta معانا حتأخد جودة منتج و تجربة و محتوى🧡✨.

مكاوي : منتج وتجربة عرفناهم ، محتوى دة شنو؟!!
(للناس الما بتعرف مكاوي ، كل زول في حياته عنده مكاوي، ومكاوي دة الشخصية الفضولية البتسأل كتير ربنا يقدرنا عليه😁💔)
- طيب بما انو صفحتنا متخصصة في الالكترونيات و التكنولوجيا فغير منتجاتنا الجودة ، فحيكون عندنا كم سلسلة عن التكنولوجيا، حاجات ما كنت بتعرفها حتعرفها معانا و حنشرحها ليك بطريقة مبسطة و ساهلة ان شاء الله و متأكدين حتفيدك🙏.

مكاوي : كلام جميل!! ، طيب المحتوى دة حيكون عن شنو؟!
- السلسلة الاولى حنبدا معاك عن الهواتف و حتكون سلسلة خفيفة وظريفة زيك كدة🧡.

مكاوي : يا سلام!!😁 وحتتكلموا عن شنو في الهواتف؟!
- يلا عن شنو دي حتعرفها في البوست الجاي خليك متابع و نتلاقا في البوست الجاي .....🏃
🧡📱بيتا استور مرجعك الالكتروني🖥️🧡.

Beta store🧡✨

- انحنا منو....؟🙋🏼‍♂️
----------------

اعزائنا عائلة بيتا استور للناس الما بتعرفنا نحن مجموعة من الاصحاب 👬 ، قبل الحرب فكرنا انو نبدا مشروعنا الخاص زي اي شباب ، قعدنا مع بعض وطلعنا بفكرة المتجر الا وهو — BETA STORE —.
و كان افتتاح المتجر بعد العيد مباشرة و فجأة حصلت الحرب وحدث ما حدث 😔💔 و لا نقول الا قدر الله وما شاء فعل، كله وقف واتعطل و حتى تيمنا اتفرق💔 ، حال كل الناس الاتفرقت ربنا يرجع اللمة ان شاء الله وترجع البيوت بناسها وضحكتها وفرحتها و الشوارع بحركتها🧡.

🔸 ويبقى السؤال.....🤔 هل دة حيوقفنا؟!!
- طبعآ لأ!! ، بل وراجعين بقوة كمان💪 ، لذلك قررنا انو نفتتح متجرنا و متجركم اخيرا بحمد الله وفضله🧡.

- وبما انو أخيرا حنبدا وعشان نصل لأكبر ناس ، ما عاوزين منك غير لايك للمنشور واخيرا الشير ، بس كدة؟!! ايوة كدة يا جميل و تكون كفيت ووفيت🙏 وانتظر المتعة😎🧡.

- وان شاء الله نوعدكم حتشوفوا متجر مختلف بمحتوى مختلف و محتوى جميل جدا جدا و خدمات تليق بكم🧡✨
انتظرونا.......😉.
🧡📱بيتا استور مرجعك الالكتروني🖥️🧡.

BETA STORE🧡✨
نرحب بيكم في متجرنا و متجركم بيتا استور ، وهو متجر أونلاين حنقدم ليكم فيه كل ما يختص بالإلكترونيات البتحتاجو ليها من هواتف بانواعها📱 ، سماعات بانواعها ، أجهزة لابتوب بانواعها 🖥️ و ملحقاتهم.
وعن قريب حيكون من اكبر المتاجر في السودان 🇸🇩 ، والاجمل في Beta Store حنقدم ليكم تجربة نوعية و خدمة ممتازة نتمنى تعجبكم🧡✨