Fas Media Production

يو يو يو 🤟😁
رجعنا تاني يا مكنات 👏
شايفين المكنات الفي الصورة تحت ديل 👇😃
انتو امكن منهم 😄 ... ايوه ده تطبيل.. المهم

المرة دي حنتكلم في مجال الهيب هوب
و ب التحديد في فنون الهيب هوب..
و منها نختار فن الراب 🔥🧡
ارحكم..🚶

أولاً .. العايش وسط مجتمع الرابرز في اي مكان
حيلاحظ حاجة غريبة شديد
حيلاحظ انو غالبية الرابرز
م عندهم معرفة ب المعلومات الأساسية ب فن الراب 😄
و ده لأنو معظم الرابرز بغنو كده ب الفطرة 😉
و ب الفطرة دي م معناها بتولدو رابرز.. لأ
بلفطرة دي مقصود بيها بتعلمو
( عن طريق الإستماع .. بتعلمو بي طريقة عفوية )
و دي ولله حاجة جميلة جدا يا شباب 🧡✨
بس ضروري الناس تعرف الأساسيات دي لانها مهمة..

طيب يلا نبدا 🤞
اول حاجة يعني شنو راب ؟؟ 🤔
الراب هو فن من فنون الهيب هوب 🎤
كلمة راب rap اساسا ﺍﺧﺘﺼﺎﺭ لي Rhythm and poetry
و معناها ﺷِﻌﺮ ﻭﺇﻳﻘﺎﻉ 🥁
و ده بلضبط البيعملو الرابر
بيرتب كلماته ( شعر )
على اللحن او ال Beat ( إيقاع )

اها و الراب ده بدا متين؟؟ 😐
الراب ﺑﺪا في ﺳﺒﻌﻴﻨﻴﺎﺕ ﺍﻟﻘﺮﻥ ﺍﻟﻤﺎﺿﻲ
قالو في مغني جاميكي اسمه Kool Herc
المغني ده هو اول زول دخًل الراب
في ﺣﻲ ﺍﻟﺒﺮﻭﻧﻜﺲ في ي ولاية ﻧﻴﻮﻳﻮﺭﻙ !!

ي زول..يعني الراب ده ما اخترعو تباك شاكور ؟؟ 😳
- لالا ما اخترعو توباك شاكور 😂
الراب ما عنده زول معين إخترعو لانو إتمرحل
و شارك في صناعته مجموعه من الناس
ولله ده كلام ياه 😂
اها و الجماعه الصنعو الراب ديل اكيد كانو شفاتة صح؟؟
كانو بلعبو قوافي دسيسة و فلواتهم جامدة صح؟؟ 😀

اه وين 😂
في البداية ﻛﺎﻥ ﺍﻹﻟﻘﺎﺀ عشوائي
دون اي قوافي أو فلوات..
كان ﺍﻟﺮﺍﺑﺮ بجي كده و بجدع ﻛﻠﻤﺎﺕ ﺗﺸﺠﻴﻌﻴﺔ
وﺍﻟﺠﻤﻬﻮﺭ بتفاعل معاهو و مستمتعين شديد 😌
بس ﻣﻊ ﻣﺮﻭﺭ الزمن، بقو بغنو بي قوافي و إيقاع

بعدها الراب ﺃﺛﺒﺖ جدارتو ﺗﺠﺎﺭﻳًﺎ لما ﺃﺻﺪﺭﺕ
ﻓﺮﻗﺔ The Sugarhill Gang’s
أ ﻏﻨﻴﺔ بعنوان Rapper’s Delight
ﻭﺃﺻﺪﺭ Kurtis ” Blow’s
أﻏﻨﻴﺔ بعنوان The Breaks
ﻭ دي قالو بقت ترند في الزمن داك 😁

بعدها ﺟﺎﺕ ﻓﺘﺮﺓ ﺍﻟﺘﺴﻌﻴﻨﺎﺕ ﻭﺍﺯﺩﻫﺮﺕ ﺻﻨﺎﻋﺔ ﺍﻟﺮﺍﺏ
و بقت ﻣﻨﺘﺸﺮ شديد 🧡🔥
اها الراب ده عنده انواع كتيرة صح؟؟ 😐
= ايوه ..الراب عنده اكتر من عشرين نوع و مدرسة مختلفة لكن أشهرها

أولد اسكول - Old school
نيو اسكول - New school
بووم باااب - Boom bap
جنجستا راب - Gangsta rap
تراب - trap

كده احكي لينا عن الأنواع دي 👏
ح احكي ليكم عنها بس في مرة تانية ..
حنتكلم عن كل نوع في منشور براهو ان شاءالله 😊

- اسمعني في مصطلحات بسمع بيها و م عارف معناها 😐
زي شنو؟؟
زي ام سي .. ام سي دي معناها شنو؟؟ 😐

ام سي Mc دي اختصار لي Master of Ceremonies
معناها ب العربي ملك الحفلات 😁 ( بس ما زمبار ها..)
لقب Mc دي زمان كانت بتتقال للزول المسؤل عن ال Dj
و بعدها بقت تتقال للرابر المحترف

اهااا.. و رايم يعني شنو؟؟ 😐
رايم Rhyme دي يعني قافية زي قوافي ابيات الشعر
يعني كل كذا سطر يتوافقو في النهاية بتاعتها

و فلو يعني شنو؟؟ 🤔
فلو Flow دي بتعني جريان او تدفق الكلمات
و هي انواع كثيرة و غالبا كل رابر بكون ليهو انواع معينه
من الفلوات بستخدمها في اغنياته

أها و البار؟؟ 😁
البار Bar ده ﻫﻮ ﺍﻟﺒﻴﺖ ﺑﺸﻜﻞ ﻛﺎﻣﻞ
ﻭ عادة بتكون ﻣﻦ ﻻﻳﻨﻴﻦ ﺗﺤﺖ ﺑﻌﺾ

و لاين Line يعني شنو؟؟ 😁
لاين يعني سطر

و لايركس يعني شنو؟؟ 😁
لايركس Lyrics دي كلمات الاغنية

و بنش لاين؟؟ 🤞
بنش لاين دي اقوى جزء في الاغنية

و بسسس كده..
لحدي هنا بنكون خلصنا موضوع اليلة 😊
بتمنا تكون المعلومات بسيطة و واضحة ..
لو المنشور اضاف ليك حاجة جديدة اضغط لايك
و شارك المنشور عشان غيرك يستفيد..
و لو عندك معلومة داير تعلق عليها او عندك اي سؤال او استفسار
ممكن تكتب في التعليقات او ترسل في الخاصالخاص
و حيتم الرد عليك في فترة وجيزة إن شاءالله😊🧡

سلام ✋

أثناء العمل في الاستوديو إكتشفنا حاجة مهمة.. ☝
اكتشفنا إنو في ناس كتيرة من الفاشر أصواتهم حلوة
و عندهم الموهبة و حابين يغنو و يبقو فنانين
بس غالبية الناس دي بتواجههم مشكلتين اساسيتين :

1- المشكلة الأولى إنهم ما عارفين يبدأو من وين!!
زي إنهم يغنو شنو أو يختارو أي نوع 😕
2 - المشكلة التانية إنهم ما عارفين كيف يعملو Upgrade
و يكتسبو مهارات تطور من أدائهم في المجال 💪

- المشكلتين ليها اسباب كتيرة و ليها حلول كتيرة كمان..
بس في الموضوع ده ح نركز على المشكلة الأولى
و هي إنك تبدأ من وين و كيف تختار نوع الغناء البناسبك 😊

اولاً في أربعة عوامل أساسية بتأثر على اختيارك لنوع الغناء و هي 👇
1 - زوقك و ميولك الفني و الموسيقي
2 - قدرتك على الإبداع في النوع الموسيقي
3 - مدى صوتك
4 - جمهورك المستهدف

- اول حاجة زوقك و ميولك الفني و الموسيقي 🎻
اي زول عنده نوع موسيقى بحبو شديد اكتر من باقي الانواع و ده بيرجع لي اسباب كتيرة.. مثلا بتلقى واحد بحب يسمع راب، و التاني بحب يسمع ريقي، و واحد تاني بحب يسمع شعبي و التاني بحب يسمع افرو..الخ
ف الطبيعي انك لمن تجي تغني ح تغني اكتر نوع انتا بتحبه
و بتحس بإرتياح لما تسمعه 😌

- ثانيا قدرتك على الإبداع في النوع الموسيقي ✨
الإبداع مادة مهمة في اي نوع من انواع الفن و بدونه الفنان حيلقى صعوبة في الاستمرار و حيواجهو معوقات كتيرة ممكن تصل بيهو لانه يعتزل الفن تماما..
و ب التالي لما تجي تختار نوع الغناء المناسب لازم تختار نوع انتا قادر تبدع فيهو عشان تقدر تستمر تنتج و تقدم اعمال ليها قيمة فنية كويسة 👌

- ثالثا مدى صوتك 🎤
اي انسان في الدنيا عنده مدى صوتي معين ( من- و إلى )
و مستحيل تقدر تتجاوز المدى الصوتي بتاعك صعودا
او نزولاً ، ف ضروري تعرف حدود صوتك و تتقن الغناء عليهو و دي بتتم ب التدريب المستمر!!

* إتعلم اساسيات الغناء
* احضر كورسات صوت
* اتعلم سلالم صوتية
* إتمرن بإستمرار و حسن صوتك و طور من نفسك في اداء النوع الإنتا إخترته 💪

- ممكن تختار نوع موسيقي في حدود صوتك 🤝
نوع موسيقي صوتك فيهو يكون مرتاح و انت بتغنيهو..
بس ما تنسى انو التدريب المستمر و التعلم ماف مفر منه بغض النظر عن النوع الموسيقي ☝

- رابعا جمهورك المستهدف 🎯
إنتا ك فنان صاعد و يدوبك داخل المجال ده في البداية
إختار لونك الموسيقي فقط بناءً على العوامل الثلاثة السابقة بالترتيب - لازم تصنف نفسك ك مغني راب او مغني جاز او مغني ريقي او مغني افرو او غيره.. لازم تحدد مجال معين تتخصص فيهو و تكون فيو الشفت الممسح ب الزفت 🙃

- طيب لمن تقرر تعمل كده حتسمع زول هنااااك بيقول ليك : لالالا يا مكنة 🙂.. عشان تنجح في مجال الغناء و الموسيقى لازم تكون جوكر و تغني اي حاجة 💪

( و فعلا كلامو صحيح )

بس ركز معاي .. أنا قلت تصنف نفسك و تتخصص
بس ما قلت تحصر نفسك ☝

في فرق كبير بين التصنيف و التخصص و بين الحصر!
ممكن تكون انتا رابر و مصنف على انك مغني راب
بس مرات بتغني R&B و العكس صحيح !!!
طيب دي بتفيدك في شنو؟؟
- دي يا معلم بتفيدك لمن تجي تتعاقد مع شركات الإنتاج الفني 🎤🎥
ايوه زي فاس ميديا كده بلضبط..
لأنك ممكن وكتها ح تضطر تغير مجالك لي مجال تاني خالص المنتجين بحددوها ليك!
ليه؟؟
ببساطة لأنو عندهم جمهور مستهدف عاوزين يوصلو ليهم رسالة معينةمعينة او فكرة معينة و الرسالة دي بتصل اسرع لمن يستخدمو نوع معين من الغناء!! ف ب التالي ح يحددو ليك تغني اي نوع و دي بتكون بناءً على حاجات كتيرة هم بيعرفوها 👏

و بس كده.. دي الزتونه كلها 😊🤞
- بتمنى الموضوع يكون أفاد و نور طريق اي زول عاوز يغني بس ما عارف يبدا من وين او يختار اي نوع من الغناء 🎤
- لو الموضوع عجبك ما تنسا تتفاعل و تعلق و تشارك المنشور عشان غيرك يستفيد ✨
- و لو في اي سؤال او إستفسار بتمنى تطرحو في التعليقات هنا أو في الخاص و ح تلقى الرد عندك في فترة وجيزة إن شاءالله 🤞

أبقو عافيه 😊🧡

ملخص نتيجة الجولة الثانية من تحدي فاس 🔥🎤
بلتوفيق للمؤهلين للجولة الأخيرة ...