Dr Nauman Rafi Rajput Official

😂 "باجی! تُہاڈے نوں کی ہو گیا اے؟" — ایک دلچسپ مگر سبق آموز کلینک کی گفتگو

کل میرے کلینک میں ایک مریضہ فالو اَپ کے لیے آئیں۔ انہیں ذیابیطس تھی، وزن بھی کافی زیادہ تھا، اس لیے میں نے شوگر کی ایسی دوا شروع کی تھی جو وزن کم کرنے میں بھی مدد دیتی ہے۔ ساتھ میں متوازن غذا اور روزانہ واک کی ہدایت بھی دی تھی۔
جیسے ہی وہ بیٹھیں، بولیں: "ڈاکٹر صاحب! مسئلہ ہو گیا ہے!"
میں گھبرا گیا، پوچھا: "شوگر بڑھ گئی؟ طبیعت خراب ہے؟"
وہ بولیں: "نہیں جی... پانچ کلو وزن کم ہو گیا ہے!"
میں نے مسکرا کر کہا: "ماشاء اللہ! یہ تو خوشخبری ہے!"
وہ فوراً بولیں: "پر ڈاکٹر صاحب، محلے والی ہر آنٹی کہتی ہے: 'باجی تُہانوں کی ہو گیا اے؟ بہت کمزور لگ رہے او!' ایک نے تو پوچھ لیا کہیں کوئی بڑی بیماری تو نہیں؟"
میں ہنس پڑا اور عرض کیا: "باجی! ہمارے معاشرے میں اگر پیٹ نکل آئے تو کہتے ہیں 'صحت بہت اچھی ہے'، اور اگر سائنسی طریقے سے وزن کم ہو جائے تو فوراً سمجھتے ہیں کہ بندہ بیمار ہو گیا ہے!"
حقیقت یہ ہے کہ موٹاپا صحت کی علامت نہیں، بلکہ بہت سی بیماریوں کی جڑ ہے۔ ذیابیطس، ہائی بلڈ پریشر، دل کے امراض، فالج، جوڑوں کا درد اور فیٹی لیور—یہ سب اضافی وزن سے جڑے ہوئے ہیں۔
اگر ڈاکٹر کی نگرانی میں مناسب غذا، باقاعدہ واک اور درست ادویات کے ذریعے وزن کم ہو رہا ہے، شوگر کنٹرول میں آ رہی ہے، جسم ہلکا، متحرک اور توانا محسوس ہو رہا ہے تو یہ کمزوری نہیں بلکہ صحت کی طرف واپسی ہے۔
لہٰذا آئیں، لوگوں کو یہ نہ کہیں: "آپ بہت کمزور لگ رہے ہیں!"
بلکہ کہیں: "ماشاء اللہ! آپ پہلے سے زیادہ فِٹ، اسمارٹ اور صحت مند لگ رہے ہیں۔"
صحت کا مطلب زیادہ وزن نہیں، بلکہ مضبوط جسم، اچھی پٹھوں کی طاقت، فعال زندگی اور بیماریوں سے محفوظ رہنا ہے۔

ڈاکٹر نعمان رفیع راجپوت
میڈیکل اسپیشلسٹ | ذیابیطس اسپیشلسٹ | مصنف | کالم نگار | ٹرینر | ویلیو کریئیٹر
📞 0321-6266658
Dr Nauman Rafi Rajput Official