Rahi Group

۔ تازہ غزل
۔ شر کسی کا تھا سر ہمارے گٸے
ہم کسی دوسرے پہ وارے گیۓ

اس سے بڑھ کر بہادری کیا ہے
کچھ نہتوں کے سر اتارے گٸے

اُس طرف فرض اور اِدھر تھا عشق
ہم تو دونوں طرف سے مارے گٸے

اب بتاٸیں خسارہ کس کا ہوا
آپ کی شب مرے ستارے گٸے

پہلے مقتل کو میں گیا تنہا
اس کے بعد ایک ساتھ سارے گٸے

پہلے اعلان ِآشتی ہوا پھر
بتیاں بجھ گٸیں اشارے گٸے

میرے بچوں کے خون سے گلشن
سالہاسال تک سنوارے گٸے
فرحت عباس 26 nov