Fk Studio

کراچی کے علاقے سعود آباد میں ایک انتہائی افسوسناک واقعہ پیش آیا ہے جہاں ایک شخص نے نام نہاد غیرت اور مالی لین دین کے تنازع پر عدالت سے واپسی پر فائرنگ کرکے اپنی سگی بہن اور بہنوئی کو قتل کر دیا۔ پولیس حکام کے مطابق مقتولہ نادیہ نے اپنی پسند سے نبی اللہ نامی شخص سے شادی کی تھی، جس پر مقتولہ کا بھائی شدید برہم تھا۔ ملزم نے اپنے ویڈیو بیان میں اعتراف کیا ہے کہ اس نے اپنی بہن کی منگنی ساڑھے تین لاکھ روپے کے عوض طے کروائی تھی، تاہم نادیہ کی جانب سے پسند کی شادی کیے جانے کے بعد اس لڑکی کے مبینہ بھائی نے رقم واپسی کا تقاضا کیا تو رنجش پر اس نے ملیر کورٹ سے واپسی پر دونوں کو نشانہ بنایا۔
یہ لرزہ خیز واقعہ ایک بار پھر معاشرے میں غیرت کے نام پر ہونے والے جرائم، جبری رشتوں اور خواتین کو محض ایک تجارتی شے سمجھنے والی فرسودہ ذہنیت کو بے نقاب کرتا ہے۔ جب خواتین اپنی مرضی اور قانونی حق کا استعمال کرتے ہوئے زندگی کے فیصلے کرتی ہیں، تو اکثر اوقات انہیں خاندانی انا اور مالی مفادات کی بھینٹ چڑھا دیا جاتا ہے۔ سماجی ماہرین کے مطابق ایسے جرائم کو غیرت کا نام دینا دراصل ایک کھلے جرم کو چھپانے کی کوشش ہے، اور جب تک معاشرتی خاموشی اور کمزور سماجی رویے ایسے قاتلوں کو تحفظ فراہم کرتے رہیں گے، تب تک عورت کی زندگی، مرضی اور حقوق اسی طرح پامال ہوتے رہیں گے۔