Commissioner Gilgit Division

کمشنر گلگت ڈویژن جناب توقیر حیدر کاظمی کی زیر صدارت آئندہ ماہِ مقدس رمضان المبارک کی تیاریوں کے حوالے سے ایک اہم اجلاس کمشنر آفس گلگت میں منعقد ہوا۔

اجلاس میں ڈی آئی جی گلگت راجہ مرزا حسن، چیف انجینئر واٹر اینڈ پاور، ڈائریکٹر فوڈ، ڈپٹی کمشنر گلگت اور ایس ایس پی گلگت نے بالمشافہ شرکت کی، جبکہ ڈپٹی کمشنر ہنزہ، ڈپٹی کمشنر نگر اور ڈپٹی کمشنر غذر نے بذریعہ زوم اجلاس میں شرکت کی۔

اجلاس کے دوران ماہِ رمضان میں سکیورٹی انتظامات، اشیائے خوردونوش کی بلا تعطل فراہمی، قیمتوں کے کنٹرول اور موثر مانیٹرنگ میکنزم پر تفصیلی غور و خوض کیا گیا۔ متعلقہ افسران نے اپنے اپنے محکموں کی تیاریوں اور لائحہ عمل سے آگاہ کیا۔

کمشنر گلگت ڈویژن نے ہدایت کی کہ رمضان المبارک کے دوران عوام کو ہر ممکن ریلیف فراہم کیا جائے، اشیائے ضروریہ کی دستیابی یقینی بنائی جائے اور گراں فروشی و ذخیرہ اندوزی کے خلاف سخت قانونی کارروائی عمل میں لائی جائے۔ انہوں نے واضح کیا کہ کسی بھی قسم کی ناجائز منافع خوری ہرگز برداشت نہیں کی جائے گی اور ضلعی انتظامیہ باقاعدہ چیکنگ اور پرائس کنٹرول مہم کو موثر انداز میں جاری رکھے۔

اجلاس میں فیصلہ کیا گیا کہ تمام اضلاع میں سکیورٹی، بازاروں کی نگرانی، اور اشیائے خوردونوش کی سپلائی کے نظام کو مربوط انداز میں یقینی بنایا جائے گا تاکہ عوام کو ماہِ مقدس کے دوران سہولت اور اطمینان میسر آ سکے۔

کمشنر گلگت ڈویژن جناب توقیر حیدر کاظمی نے آج پاکستان سویٹ ہوم گلگت کا دورہ کیا، جو پاکستان بیت المال کے زیرِ انتظام چلایا جا رہا ہے۔ ڈائریکٹر پاکستان بیت المال ڈاکٹر محمد نثار الحق کیانی اور اُن کی ٹیم نے کمشنر گلگت ڈویژن کا پُرتپاک استقبال کیا، جبکہ ننھے بچوں نے پھولوں کا گلدستہ پیش کرکے خوش آمدید کہا۔

کمشنر گلگت ڈویژن نے سویٹ ہوم کے مختلف کمروں کا معائنہ کیا اور وہاں مقیم بچوں سے ملاقات کی۔ انہوں نے بچوں کی تعلیم، دلچسپیوں اور روزمرہ سرگرمیوں کے بارے میں دریافت کیا۔ اس موقع پر کمشنر گلگت ڈویژن نے سردیوں کے لیے بچوں میں سویٹرز اور دستانے بھی تحفے کے طور پر تقسیم کیے۔

بعد ازاں کمشنر گلگت ڈویژن نے بچوں کے ساتھ دوپہر کا کھانا بھی تناول کیا اور اُن کے ساتھ خوشگوار وقت گزارا۔ انہوں نے پاکستان سویٹ ہوم کی جانب سے یتیم بچوں کی کفالت اور اُن کی بہترین نگہداشت کے لیے کی جانے والی کاوشوں کو سراہا۔

کمشنر گلگت ڈویژن نے مستقبل میں پاکستان سویٹ ہوم کی سرگرمیوں اور پروگرامز کے لیے بھرپور تعاون کی یقین دہانی بھی کرائی۔

اس دورے کا مقصد معاشرے کے نادار اور یتیم بچوں کے لیے حکومتی سرپرستی کو مزید مضبوط بنانا تھا، تاکہ وہ بہتر مستقبل کی طرف قدم بڑھا سکیں۔