Comrade Baba Jan

بابا جان کا گلگت بلتستان اسمبلی انتخابات میں حصہ لینے کا اعلان

علی آباد (ہنزہ): 18 اپریل 2026

عوامی ورکرز پارٹی گلگت بلتستان کے ہیڈکوارٹر علی آباد سے پیر کے روز جاری کردہ پریس ریلیز کے مطابق، پارٹی کے صدر بابا جان نے آئندہ گلگت بلتستان اسمبلی انتخابات میں حصہ لینے کا اعلان کر دیا ہے۔

پریس ریلیز میں کہا گیا ہے کہ بابا جان حلقہ جی بی ایل اے 6 (ہنزہ) سے عوامی ورکرز پارٹی کے ٹکٹ پر انتخاب لڑیں گے۔

بابا جان، جو ایک بائیں بازو کے رہنما کے طور پر جانے جاتے ہیں، انسانی حقوق، گلگت بلتستان کے آئینی حقوق اور عوامی مسائل کے لیے مسلسل جدوجہد کر رہے ہیں۔ وہ خطے میں متنازعہ لینڈ ریفارمز ایکٹ اور مائنز اینڈ منرلز بل کے ناقد رہے ہیں اور انہیں گلگت بلتستان کے قدرتی وسائل کے استحصال کے مترادف قرار دیتے ہیں۔

بابا جان ماحولیاتی مسائل، بالخصوص موسمیاتی تبدیلی، قدرتی آفات اور خطے کے نازک ماحولیاتی نظام کے تحفظ کے حوالے سے آواز بلند کرنے میں نمایا ہے۔

الیکشن کمیشن گلگت بلتستان کے جاری کردہ شیڈول کے مطابق کاغذاتِ نامزدگی 16 سے 20 اپریل تک جمع کروائے جا سکتے ہیں جبکہ پولنگ 7 جون 2026 کو متوقع ہے۔

بابا جان ماضی میں بھی اسی حلقے سے انتخاب لڑ چکے ہیں۔ 2015 کے انتخابات میں انہوں نے جیل میں رہتے ہوئے حصہ لیا تھا اور چند ووٹوں کی فوق سے دوسرے نمبر پر آئے تھے۔ تاہم 2020 کے انتخابات میں انہیں حصہ لینے سے روک دیا گیا تھا اور وہ انتخابی عمل مکمل ہونے کے ایک ہفتے بعد رہا ہوئے تھے۔

وہ 2010 کے عطا آباد لینڈ سلائیڈ متاثرین کے حقوق کے لیے سرگرم رہے ہیں اور 2011 میں احتجاجی مظاہروں کے بعد انہیں گرفتار کیا گیا تھا۔ بعد ازاں وہ 2020 میں دیگر کارکنوں کے ساتھ رہا ہوئے۔

بابا جان نے گراس روٹ لیول سے اپنے سیاسی سفر کا آغاز کیا۔ وہ پروگریسو یوتھ فرنٹ کے پیلٹ فارم سے علاقے کے مسائل کو اجاگر کرتے رہے ہیں۔ باباجان لیبر پارٹی میں بہت محترک تھے جسے 2012 میں عوامی ورکرز پارٹی میں زم کردیاگیا۔ شروع دن سے باباجان مظلوموں کے لیے آواز بلند کرتے رہے ہیں اور نوجوانوں کی سیاسی تربیت کا عمل جاری ہے۔

بابا جان کو گلگت بلتستان کی ایک مؤثر آواز کے طور پر دیکھا جاتا ہے، جو آئینی حقوق، قدرتی وسائل کے تحفظ اور ماحولیاتی انصاف کے لیے سرگرم ہیں۔ وہ عوامی ایکشن کمیٹی گلگت بلتستان کے بھی سینئر رکن ہیں، جو مختلف سیاسی جماعتوں کے اتحاد پر مشتمل ہے۔

عوامی ورکرز پارٹی نے آئندہ انتخابات میں فعال شرکت کے عزم کا اظہار کیا ہے۔