Daily Updates

نگران وزیر اعلیٰ گلگت بلتستان جسٹس (ر) یار محمد کا شب برأت کے موقع پر خصوصی پیغام!!
نگران وزیر اعلیٰ گلگت بلتستان جسٹس (ر) یار محمد نے شب برأت کے موقع پر میڈیا کو جاری اپنے خصوصی پیغام میں کہا ہے کہ شب برأت اللہ کی طرف سے رحمت، مغفرت اور بخشش والی عظیم رات ہے جس میں عبادت، توبہ اور استغفار کی خصوصی فضلیت ہے۔ یہ رات ہمیں اپنے اعمال کا محاسبہ کرنے اور اللہ تعالیٰ سے معافی مانگنے کے علاوہ اسلامی شعار کے ساتھ زندگی گزارنے کا موقع دیتی ہے۔ نگران وزیر اعلیٰ نے کہا ہے کہ اس بابرکت رات میں ہمیں ملک و قوم، گلگت بلتستان کے امن، ترقی اور خوشحالی کیلئے خصوصی دعائیں مانگنی چاہئے۔ شب برأت ہمیں دوسروں کے حقوق ادا کرنے،معاشرتی ہم آہنگی قائم رکھنے اور مستحق افراد کا خیال رکھنے کا درس دیتی ہے۔ نگران وزیر اعلیٰ نے کہا ہے کہ اللہ تعالیٰ اس مقدس رات کے طفیل ہماری عبادات قبول فرمائے، ہمیں امن،سلامتی اور خوشحال مستقبل عطاء کرے اور گلگت بلتستان و پاکستان کو ہر قسم کے آفات اور مشکلات سے محفوظ رکھے۔
Chief Minister Gilgit-Baltistan House Gilgit

گلگت: محکمہ خوراک کے افسران کو سیاسی دباؤ کے ذریعے پوسٹنگ لینے سے گریز کی ہدایت، خلاف ورزی پر سخت کارروائی کا انتباہ
گلگت بلتستان حکومت کے محکمہ خوراک نے افسران اور اہلکاروں کی جانب سے سیاسی یا دیگر ذرائع استعمال کرتے ہوئے من پسند تعیناتیوں اور تبادلوں کے حصول کے رجحان کا سختی سے نوٹس لیتے ہوئے باقاعدہ سرکولر جاری کر دیا ہے۔
جاری کردہ سرکولر کے مطابق یہ مشاہدہ کیا گیا ہے کہ بعض افسران اور اہلکار مطلوبہ پوسٹنگ حاصل کرنے کے لیے سیاسی دباؤ اور دیگر غیر رسمی طریقے اختیار کر رہے ہیں، جسے مجاز اتھارٹی نے غیر قانونی اور غیر اخلاقی قرار دیا ہے۔
محکمہ نے تمام افسران اور ملازمین کو متنبہ کیا ہے کہ وہ فوری طور پر اس عمل سے باز رہیں، بصورت دیگر ان کے خلاف سخت محکمانہ کارروائی عمل میں لائی جائے گی۔ مزید برآں ایسی خلاف ورزیوں کو ان کی سالانہ کارکردگی رپورٹس (ACRs/PERs) میں بھی شامل کیا جائے گا۔
سرکولر میں واضح کیا گیا ہے کہ اسے حتمی وارننگ تصور کیا جائے اور تمام منسلک و ذیلی دفاتر کے سربراہان کو ہدایت کی گئی ہے کہ وہ اپنے ماتحت افسران و اہلکاروں تک یہ احکامات پہنچائیں۔
Food Department GB