Ladawan

Naupos na Kandila"
[Tula•Tigaonon]
ni Adrian Dones

Namumundo an mga kalag
Sani na tigkalagan mapuyo an kampo santo
Mapuyo an pagsiyak san mga tawo para makabisita
Sa inda mga ginkakamuot na humali na

Singhot an baho sin nagmara na lumot
Nag-ingkod ako sa usad na puntod
Gin-aakseptar tanan na kapuyuan na naglulukop sa sementeryo
Na dapat kay wara sa adlaw san amon mga sinadto

Kapot an kwarta hali sa akon ama, diretso ako kadto sa kampo santo
Para magbakal san mga kun anano na naruruyagan san mga bata
Simple lang na nag-iilaw na bracelet an binakal ko
Kaupod an mga kababata na nagdadalagan sa mga singit, nabubunggo maski sin'o.

Di man maaksepatar ini na kabuangan, pero nangawat kami san pagkaon
Tukdo sa kada usad kun sino an mangunguha
Aram ko na maraot an amon ginhimo
Pero bata lang kami sadto, nano an amon mahihimo?

Kakanam, kaupod an mga bata kag dayo hali sa iba na lugar
Nangawat kami san mga kandila
Makaharadlok madakop sin mga parak
Pero mas masakit man kan nanay an aabuton ko na sapak.

Kalaksi san dalagan sin panahon
Nano kay dili ko na pinahalagahan sin maayo
Maski usad na lalaki sa akon buhay
Sumabay sa dalagan sin panahon, bigla naging sinadto

Sani na tigkalagan, mapuyo an kampo santo.
Ginbutang ko an kandila sa puntod sin akon ama
Nangadyi, kag naghali kaupod an mga tawo na parehos ko
Nagbilin sin kandila para sa mga nakaupod kasadto

Sira sa amon mga binilin na kandila
May maging ilaw sinda sa dulom
Mga naupos na kandila sa ilarom sin duta
Sira gabayan niyo kami sa maagi na tadhana

Mga naupos na kandila, mapuyo na hangin
Naghali ako paluwas sa sementeryo
Sira sa akon pagbalik utro tuig
An ruyag sin mga kalag kay magbalik.

A Short Spoken Word Poetry Film para sani na UNDAS 🕊🕊🕊

Disclaimer: Baground Music used "American Pie (Instrumental Version)"