UP Clark-Subic Student Council

Uring Manggagawa, Hukbong Mapagpalaya!

Sa bawat patak ng pawis at bawat oras ng paggawa, isinusulat ng anakpawis ang tunay na kasaysayan ng bayan. Hindi sila tahimik na puwersa kundi lakas na nagpapatakbo sa lipunan. Ngunit sa kabila nito, sila ang patuloy na binabarat sa sahod, ikinukulong sa kontraktuwalisasyon, at pinagkakaitan ng seguridad at dignidad.

Sa baluktot na tatsulok ng lipunan, ang nasa tuktok ang nagpapakasasa sa yaman na hindi nila nilikha, habang ang manggagawa at magsasaka ang bumubuhat sa pundasyon, pasan ang bigat ng produksyon ngunit nananatiling api at pinagsasamantalahan.

Sa harap ng garapalang paglabag sa karapatan ng manggagawa, malinaw na walang kusang ibinibigay ang naghaharing uri. Ang bawat tagumpay ay bunga ng sama-samang pakikibaka. Kaya tungkulin nating makiisa at makibaka kasama ang uring manggagawa sa pagsusulong ng makatarungang sahod, regular na trabaho, at ganap na karapatan.

Kaisa ang UPDEPPO Student Council sa walang humpay na pakikibaka ng uring manggagawa para sa makatarungang sahod, tunay na pagpapababa ng presyo ng mga batayang bilihin, at pagkakaroon ng makatao, ligtas, at nakabubuhay na trabaho.

SAHOD ITAAS, PRESYO IBABA!

HUSTISYA PARA KAY ALYSSA ALANO!

Mariing kinokondena ng UPD EPPO Student Council kasama ang iba’t ibang organisasyon sa UPD EPPO, ang patuloy na karahasan, eksploytasyon, militarisasyon, at mga paglabag sa karapatang pantao na nagaganap sa mga Isla ng Negros.

Noong ika-19 ng Abril 2026, lumalabas sa mga ulat mula sa mga lokal na network, human rights groups, at mga residente hinggil sa mga aerial strafing sa Barangay Salamanca, Toboso, Negros Occidental. Ang lantad na paggamit ng marahas at mapanupil na taktika ay nagdulot ng matinding takot at pagkawasak sa komunidad, na nagresulta sa sapilitang paglikas ng mga sibilyan. Ayon kay Mayor Richard Jaojoco ng Toboso, mahigit 168 na pamilya at 600 na mga residente ang ang napilitang lumikas mula sa kanilang mga tahanan bunsod ng insidenteng ito.

Kasabay nito ay ang pagkasawi ng kapwa lider-estudyante na si Alyssa Alano. Isang estudyante ng UP Diliman at konsehal ng UPD University Student Council. Si Alyssa ay nakipamuhay at nakisalamuha sa mga komunidad upang lubos na maintindihan ang lagay ng magsasaka sa Negros Occidental. Ngunit ang kanyang pagkamatay ay hindi mahihiwalay sa mas malawak na konteksto ng patuloy na militarisasyon at panunupil sa mga komunidad at indibidwal na nakikibahagi sa gawaing masa at pagtatanggol sa karapatan ng mamamayan.

Sa lumalang agresyon at marahas na pagtrato sa mga sibilyan, malinaw ang tahasang pagtapak sa karapatang pantao. Ang pag-aaral sa lipunan, pakikisalamuha sa mga komunidad, at paglilingkod sa mga sektor na matagal nang nakararanas ng marginalisasyon ay hindi kailanman maituturing na krimen o terorismo.

Ang ganitong karahasan ay dagdag lamang sa matagal nang kasaysayan ng pang-aapi at pagsasamantala sa Negros. Sa kabila ng malalim na ugat ng armadong tunggalian, kahirapan, at kawalan ng hustisyang panlipunan, patuloy na tinutugunan ng mga suliraning ito sa pamamagitan ng dahas at militarisasyon. Sa halip na magbigay ng makatao at makatarungang solusyon sa krisis, lalo lamang nitong pinatitindi ang takot, pagdurusa, at kawalan ng pananagutan.

Naninindigan kami sa panawagan para sa hustisya para kay Alyssa Alano at para sa lahat ng biktima ng karahasan at paglabag sa karapatang pantao sa Negros. Nanawagan kami ng agarang pananagutan, independiyenteng imbestigasyon, at pagtatapos sa mga operasyong militar na naglalagay sa panganib ng buhay at kabuhayan ng mga sibilyan.

Bilang mga iskolar ng bayan, naninindigan kaming buong tapang at buong tatag na ipagpatuloy ang laban para sa hustisyang panlipunan at tunay na katarungan para sa lahat ng biktima ng pasismo, panunupil, at mga abuso ng kasalukuyang bulok na sistema.

Hustisya para kay Alyssa Alano!
Uphold International Humanitarian Law!
Militar sa Kanayunan, Palayasin!
Inutang na Dugo ng Pasistang Rehimen, Singilin, Singilin, Pagbayarin!