FOM

Hebrews 12:6
Kay disiplinahon sa Dios ang tanan nga iyang gihigugma, ug kastigohon ang tanan niyang anak nga iyang giila.

Ang Hebrews 12:6 kini nagpadayag, nagtudlo kanato sa kamatuoran nga ang disiplina sa Dios usa ka pahayag sa Iyang dakong gugma ug pag-amuma alang sa atong kalag. Ang pagdisiplina sa Dios dili usa ka silot, kondili usa ka giya aron kita mas mobalik sa dalan sa pagkamatarung ug makasuod pagbalik sa Iyang gugma.

Usahay, tungod sa atong kalingawan sa mga butang ning kalibutan, dili nato mabantayan nga hinay-hinay na diay kitang nalayo sa plano sa Ginoo. Ang atong kasingkasing ug ang atong mga binuhatan mahimong makalimot sa Iyang kabubut-on ug magbag-o ang atong panan-aw bahin sa atong pag-alagad Kaniya. Busa, importante kaayo nga ato kanunayng ipasusi ang atong kaugalingon ngadto sa Dios, kay sa Iyang atubangan, dayag ang tanang butang ug walay matago.

Mao kini ang usa ka paagi sa pagtul-id sa atong kinabuhi ug sa paghinumdom nga ang gugma sa Dios nagpabilin bisan sa mga pagsulay. Ang disiplina sa Dios mahimong sakit ug lisud sa usahay, apan kini ang paagi nga Iya kitang gimold ug gi-andam alang sa mas labaw pa nga mga butang.

Kanunay natung pangayuon sa Amahan nga ang atung kinabuhi, ug ang atung Kasing² kanunay kini nga ipasusi sa matag panahon❤️.

Galatians 6:4
Ang matag usa kinahanglan magmatngon sa ilang kaugalingong binuhatan. Unya makapanghambog sila sa ilang kaugalingon nga walay pagtandi sa uban.

Matthew 24:12
Tungod sa pagdagsa sa pagkadautan, ang gugma sa kadaghanan mabugnaw.

-Hinumdumi nga gitawag kita nga magmatngon sa atong kaugalingon ug motubo sa atong kaugalingong pagtuo atubangan sa Dios. Ayaw itugot nga ang pagkamakasala sa kalibutan magpauga sa imong gugma sa Diyos. Ug Ayaw pagtandi sa imong kaugalingon sa uban. Hinuon, magpokus ka sa imong personal nga relasyon sa Diyos. Padayon nga buhi-a ang imong gugma ug pagkamaayo bisan pa sa dihang bugnaw ang gugma sa kalibutan.