Sublime Torch Publication

𝐋𝐢𝐭𝐞𝐫𝐚𝐫𝐲 | 𝐒𝐀𝐑𝐋𝐈𝐍𝐆 𝐎𝐑𝐀𝐒
‎Ni: Teresa Lindo

‎Bawat daang tinatahak,
‎nais ay makamit ang minimithing pangarap.
‎Bawat yapak na may kasamang luha’t pawis na pumapatak,
‎‘di alintana sa taong kaginhawaan ang hanap.
‎
‎Subalit mundo’y hindi perpekto.
‎Kayang ipagkaloob sa mga tao’y hindi pare-pareho.
‎
‎Kagaya na lamang ng mga estudyanteng "irregular" kung tawagin.
‎Mga kalimitang nahuhusgahan at pinagtatawanan.
‎
‎Subalit, mali bang sila ay may ibang daan kumpara sa karamihan?
‎Bawal bang magpatuloy sa pag-aaral nang hindi pareho sa oras na nakasanayan?
‎
‎Sa mundong sanay magbilang ng taon,
‎tila kasalanan ang hindi pagsabay sa agos.
‎
‎Habang isa-isang umaalis sa silid ang mga pamilyar na mukha,
‎sila ay nananatili, bitbit pa rin ang parehong pangarap ngunit ibang kabanata na ang hinaharap.
‎
‎Kapag ang iba'y abala sa paghahanda para sa pagtatapos,
‎sila nama'y muling nakikipagsapalaran sa panibagong semestre—
‎nasa pagkuha pa lamang ng mga naiwang asignatura
‎at nag-aabang ng mabubuksang klase.
‎
‎Minsan, hindi ang mga requirements ang pinakamabigat dalhin.
‎Kundi ang tanong na paulit-ulit mong naririnig:
‎"Hindi ka pa ba ga-graduate?"
‎Isang simpleng tanong,
‎ngunit kayang ipaalala ang lahat ng pagkakataong naramdaman mong nahuhuli ka na.
‎Sa panahon ng social media,
‎isang pindot lamang ang pagitan mo sa mga tagumpay ng iba.
‎
‎May bagong graduate.
‎May bagong empleyado.
‎May bagong nakapasa sa board exam.
‎At habang binabati mo sila sa comment section,
‎tahimik mong itinatanong sa sarili:
‎"Kailan kaya ang pagkakataon ko?"
‎
‎Ngunit sino ba ang nagsabing pare-pareho ang oras na inilaan sa bawat tao?
‎Hindi lahat ay may parehong laban.
‎May mga estudyanteng kasabay ng pag-aaral ang pagtatrabaho.
‎May mga umuuwi sa bahay na puno ng bigat at problema.
‎May mga minsang piniling unahin ang pamilya bago ang sarili.
‎At mayroon ding mga pagkakataong ang buhay mismo ang nagdikta ng paghinto,
‎hindi dahil gusto nila, kundi dahil kinakailangan.
‎
‎Kaya marahil ang pagiging irregular ay hindi tanda ng pagkukulang.
‎Marahil isa itong patunay ng katatagan.
‎Patunay na kahit ilang ulit kang nagpaliban,
‎pinili mo pa rin ang bumalik.
‎Kahit ilang beses kang nakaramdam ng hiya,
‎pinili mo pa rin ang mangarap.
‎At kahit ilang beses kang napag-iwanan,
‎pinili mo pa rin ang magpatuloy.
‎
‎Sapagkat ang tunay na tagumpay ay hindi nasusukat sa bilis ng pagdating o pagtatapos.
‎Kundi sa tapang ng pagpapatuloy.
‎Kaya ito ay para sa mga estudyanteng tila naligaw ng paroroonan ngunit hindi nawalan ng direksiyon.
‎
‎Para sa mga naiwan ng batch ngunit hindi iniwan ang kanilang mga pangarap.
‎At para sa lahat ng patuloy na lumalaban kahit pakiramdam nila'y nauuna na ang mundo.
‎Hindi ka nahuhuli.
‎Hindi ka kulang.
‎At hindi kailanman magiging kahihiyan ang pag-abot sa pangarap sa sarili mong oras.
‎
🎨 | 𝐑𝐚𝐜𝐤𝐲 𝐑𝐚𝐦𝐨𝐬, 𝐀𝐫𝐭 𝐃𝐢𝐫𝐞𝐜𝐭𝐨𝐫

𝐋𝐈𝐓𝐄𝐑𝐀𝐑𝐘 | 𝐖𝐞 𝐃𝐞𝐬𝐞𝐫𝐯𝐞 𝐒𝐮𝐧𝐬𝐡𝐢𝐧𝐞
‎Ni: Jude Apolinario · 𝘚𝘢𝘭𝘦𝘯 𝘞𝘳𝘦𝘮
‎
‎Sabi nila,
‎ang bahaghari ay lumalabas lang pagkatapos ng ulan.
‎Kaya matagal kong inisip
‎kung kailangan ko bang mabasa muna ng lungkot
‎bago maging makulay.
‎
‎Noong bata pa ako,
‎pinagpa-praktisan ko ang paglalakad sa pagitan ng mga salitang
‎"bawal" at "nakakahiya."
‎Parang may guhit sa sahig ng bahay
‎na ako lang ang nakakakita.
‎
‎Kapag tumawid ako, may mawawala.
‎Kapag bumalik ako, ako naman ang mawawala.
‎
‎May mga gabi na pinapatulog ko ang sarili ko gamit ang parehong tanong:
‎Paano kung ang bakla ay hindi pagkakamali,
‎kundi isa lamang pangungusap na mali ang pagkakabasa ng mundo?
‎
‎Hindi ko maintindihan kung bakit kailangan kong magpaliwanag.
‎Hindi naman pinapagalitan ang dagat sa pagpili nitong maging maalat.
‎
‎Minsan naiisip ko, paano kung napapagod din ang salitang "bakla"?
‎Paano kung gusto rin nitong umuwi at humiga sa tabi ng iba pang salita nang hindi tinatawag na insulto?
‎Paano kung sawa na rin itong gamitin bilang bato gayong ginawa naman ito bilang isang bulaklak?
‎
‎At kung may natutunan ako sa mahabang pakikipagtalo sa sarili, ito iyon:
‎Hindi pala kailangang humingi ng pahintulot ang liwanag upang sumikat.
‎Hindi kailangang patunayan ng bahaghari kung bakit pito ang kulay nito.
‎At hindi kailangang maging malungkot muna ang isang tao para maging karapat-dapat sa pag-ibig.
‎
‎Kaya ito ay para sa mga pusong natutong manahimik bago pa man turuang magsalita;
‎para sa mga halik na kailangang itago sa pagitan ng mga anino,
‎para sa mga pangalang hindi mabigkas nang malaya sa sariling tahanan o sa lansangan,
‎para sa mga pag-ibig na laging sinusukat kung "tama ba," "pwede ba," o "hanggang saan lang"—parang laging nauuna ang mundo bago pa man sila makapili ng sarili nilang katotohanan.
‎
‎Para sa mga bakla.
‎Para sa mga tomboy.
‎Para sa mga baklang nanay.
‎Para sa mga baklang nagdarasal gabi-gabi na sana ay mahalin sila ng mundo nang hindi kalahati.
‎Para sa batang bakla na hindi pa kilala ng mundo.
‎
‎Malaya kang magmamahal, hindi ka kailanman masusukat sa kung paano mo tinitignan ang iyong siko at mga kuko.
‎Hindi ka kasalanan, hindi ka iba, may lugar ka rito, may araw na sisikat para sa'yo.
‎At mula sa musika ng bandang Wolf Parade, naniniwala akong "we all deserve sunshine."
‎
‎DAHIL MABUHAY ANG MGA BAKLA, MASAYA PAG MAY BAKLA, DAPAT MAY BAKLA!

🎨 | 𝐉𝐮𝐝𝐞 𝐀𝐩𝐨𝐥𝐢𝐧𝐚𝐫𝐢𝐨, 𝐒𝐭𝐚𝐟𝐟 𝐀𝐫𝐭𝐢𝐬𝐭

𝐆𝐫𝐚𝐝𝐮𝐚𝐭𝐢𝐧𝐠 𝐬𝐭𝐮𝐝𝐞𝐧𝐭𝐬 𝐧𝐠 𝐌𝐂, 𝐝𝐢𝐬𝐦𝐚𝐲𝐚𝐝𝐨 𝐬𝐚 𝐠𝐫𝐚𝐝 𝐬𝐨𝐧𝐠; 𝐚𝐝𝐦𝐢𝐧𝐢𝐬𝐭𝐫𝐚𝐬𝐲𝐨𝐧, 𝐧𝐚𝐠-𝐚𝐛𝐨𝐭 𝐧𝐠 𝐩𝐚𝐡𝐚𝐲𝐚𝐠

‎Umani ng ilang negatibong saloobin sa social media ang mga napiling graduation songs para sa darating na 86th Commencement Rites ng Mabini Colleges.
‎
‎Ito ay matapos mapansin ng mga estudyanteng magsisipagtapos na ang opisyal na dalawang awiting napili na may mga pamagat na "We made it through" at "Tagumpay na aming hinintay", ay 'di umano'y nilikha gamit ang Artificial Intelligence (AI).
‎
‎Paliwanag ni Mr. Nestor Alagbate, pinuno ng komite na nakatalagang pumili ng graduation songs, ang pagpili sa dalawang kanta ay nakabatay sa tatlong salik: lyrics, singability, at recency.
‎
‎Ayon sa criteria, ang mga nabanggit na kanta ang pinakaangkop sa tema ng okasyon.
‎
‎Kabilang din aniya ang mga Dekano sa pagpili ng mga awiting isinumite ng bawat departamento, at ang mga pinagpilian ay nanggaling mismo sa mga magsisipagtapos.
‎
‎Giit pa niya, bagama’t nababasa nila ang hinaing ng mga estudyante sa social media, walang nagpasa ng pormal na reklamo sa opisina ng Vice President for Academic Affairs (VPAA) kung kaya't naging pinal ang naging desisyon patungkol sa graduation songs.
‎
‎Ayon naman sa pribadong mensaheng natanggap ng pahayagan mula sa isang graduating student ng College of Education na tumangging mapangalanan, hindi nila agad nalaman ang desisyon tungkol sa pagpili ng graduation songs.
‎
‎Wala rin aniyang naglakas ng loob sa kanilang klase na magsumite ng complaint sa tanggapan ng VPAA dahil iniiwasan nila ang anumang komplikasyon laban sa administrasyon.
‎
‎"Nung ibinigay ang final song for graduation, walang nakakaalam kung paano at saan kami pwedeng mag-file ng complaint kaya ang pinaka-accessible na outlet ay through online. Kaya din sya anonymous kasi ayaw namin ng ano pang uri ng repercussions."
‎
‎Sa ngayon, may iilan pa ring kumukuwestiyon sa nasabing pinal na desisyon sa pagbabakasakaling mapakinggan ng administrasyon ang kanilang hinaing na mapalitan ang mga nabanggit na awitin.
‎
‎Magaganap ang graduation ceremony sa ika-17 hanggang ika-19 ng Hunyo na dadaluhan ng mga magsisipagtapos mula sa Graduate School, College of Education, College of Criminal Justice Education, College of Nursing, College of Business Administration and Accountancy, College of Computer Studies, at College of Liberal Arts.

✍️ | 𝐌𝐚. 𝐊𝐚𝐭𝐫𝐢𝐧𝐚 𝐍𝐚𝐯𝐚𝐥, 𝐌𝐚𝐧𝐚𝐠𝐢𝐧𝐠 𝐄𝐝𝐢𝐭𝐨𝐫
🎨 | 𝐓𝐫𝐨𝐲 𝐀𝐧𝐝𝐫𝐞𝐰 𝐄. 𝐃𝐚𝐭𝐢𝐧𝐠𝐚𝐥𝐢𝐧𝐠, 𝐋𝐚𝐲𝐨𝐮𝐭 𝐀𝐫𝐭𝐢𝐬𝐭

𝐇𝐀𝐏𝐏𝐘 𝐁𝐈𝐑𝐓𝐇𝐃𝐀𝐘 to our 𝐀𝐬𝐬𝐨𝐜𝐢𝐚𝐭𝐞 𝐄𝐝𝐢𝐭𝐨𝐫, 𝐂𝐚𝐫𝐥 𝐈𝐯𝐚𝐧 𝐌𝐚𝐥𝐥𝐚𝐩𝐫𝐞!

Your creativity and dedication have greatly contributed to the publication and beyond your skills as an editor, your talent as an artist continues to inspire those around you, bringing ideas to life with passion and imagination.

As you celebrate another year and prepare to embark on a new chapter as a graduating student, we wish you success in all your future endeavors.

Keep sharing your creativity, laughter, and positivity wherever life takes you. Warm wishes for a joyful birthday, a memorable graduation journey, and a bright future ahead! ♡