Cordon Police Station

PNP NAGBIGAY NG PAALALA SA KALIGTASAN NG MGA BIBIYAHE NGAYONG SEMANA SANTA

Habang maraming Pilipino ang naghahanda para sa taunang paggunita ng Semana Santa, muling pinaalalahanan ng Philippine National Police (PNP) ang lahat ng biyahero—mga nagmamaneho at mga commuter—na unahin ang kaligtasan at mag-ingat sa kanilang paglalakbay.

Dahil inaasahan ang dagsa ng mga taong uuwi sa probinsya, pupunta sa mga pilgrimage sites at iba’t ibang destinasyon, muling nananawagan ang PNP ng maayos na paggamit ng kalsada at pakikiisa sa mga awtoridad upang masiguro ang mapayapa at ligtas na Semana Santa para sa lahat.

Para sa mga magmamaneho ng kanilang sasakyan, pinaaalalahanan ang publiko na sundin ang mga batas trapiko at tiyaking nasa maayos na kondisyon ang sasakyan bago bumiyahe. Paalala rin ng PNP na sundin ang BLOWBAGETS bago bumiyahe: Brake, Light, Oil, Water, Battery, Air (gulong), Gas, Engine,Tires, Sarili (kalagayan ng driver).

Noong 2023, nakapagtala ang PNP Highway Patrol Group (HPG) ng 19 na insidente ng aksidente sa kalsada sa panahon ng Kwaresma. Sa 2024, bumaba ito sa 17, na nagpapakita ng positibong trend pero patuloy pa ring kailangan ang pagiging maingat para maiwasan ang aksidente mula sa publiko.

Para naman sa mga commuter, pinapayuhan ang lahat na maging mapagmatyag sa mga terminal at pampublikong lugar, bantayan ang mga gamit, at agad na i-report sa mga awtoridad ang anumang kahina-hinalang aktibidad. Magkakaroon ng presensya ng mga pulis sa mga bus terminals, pantalan, paliparan, at iba pang matataong lugar para tumulong at magbantay ng seguridad.

Binigyang-diin ni PNP Chief, Police General Rommel Francisco D. Marbil, ang kahalagahan ng kooperasyon ng publiko ngayong Semana Santa:

“Nakikiusap kami sa publiko na maging alerto, disiplinado, at sumunod sa batas trapiko at seguridad. Layunin natin na maging tahimik at ligtas ang Semana Santa para sa lahat. Siguraduhing maayos ang inyong sasakyan bago bumiyahe, at iwasan ang pabigla-biglang pagmamaneho. Sa mga commuter, bantayan ang inyong gamit at maging mapanuri sa paligid. Sama-sama nating gawing ligtas at makahulugan ang Semana Santa ngayong taon.”

Mananatiling naka-alerto ang PNP sa buong panahon ng Kwaresma. Bukas din ang mga help desks at assistance centers sa buong bansa upang tumugon sa anumang pangangailangan o insidente.