The Ginger

မြန်မာ့ရိုးရာနည်းပညာအစစ်ဖြင့် အသက်ရှူစက်များ ထုတ်လုပ်တော့မည်ဟုဆို
-----------------------------

ကိုဗစ်ကပ်ရောဂါကူးစက်ခံရသည့်လူနာအချို့တွင် အဆုတ်ရောင်လာနိုင်သဖြင့် (လိုအပ်ခဲ့ပါက) ကုသပေးနိုင်ရန် အောက်ဆီဂျင်ပို့လွှတ်သည့် အသက်ရှူစက်များအသုံးပြုကြရသည်။ အဆိုပါစက်များအတွက် ဝယ်လိုအားသည် နိုင်ငံတကာဈေးကွက်တွင် အလွန်အမင်းမြင့်တက်လာခဲ့၍ ပိုက်ဆံရှိလျှင်ပင် ပြည်တွင်းသို့ ထပ်မံတင်သွင်းစရာ စက်ပစ္စည်းများ ရှားပါးပြတ်လပ်နိုင်ခြေနှင့် ရင်ဆိုင်လာရဖွယ်ရှိသည်။

ဤအခြေအနေတွင် ထိုပြဿနာကို မြန်မာ့ရိုးရာနည်းပညာဖြင့် ငွေကုန်ကြေးကျသက်သာစွာ ဖြေရှင်းရန် ဖြစ်နိုင်ကြောင်း မန္တလေးမြို့အခြေစိုက် UG (underground group) မှ ပြောဆိုလိုက်သည်။ ထိုအသက်ရှူစက်များ၏ အခြေခံရည်ရွယ်ချက်မှာ လေ ပေးရန်သာဖြစ်သဖြင့် လေမှုတ်သွင်းပေးနိုင်လျှင် အဆင်ပြေနိုင်ကြောင်း UG group မှ ဆရာဦးအဂ္ဂက ရှင်းပြသည်။ ထိုအတွက် လိုအပ်သည့် အဓိက အစိတ်အပိုင်းသည် အဂ္ဂိရတ် ဖိုထိုးရာတွင်သုံးစွဲသည့် ဖားဖိုသာဖြစ်ကြောင်း သိရသည်။

အဂ္ဂိရတ်သုံး ဖားဖိုများသည် ပုံမှန်အားဖြင့် မီးဖိုကို လေမှုတ်ရန် ခြေဖြင့်နင်းပြီး အသုံးပြုရသည့် လေအိတ်များဖြစ်သည်။ ထို ဖားဖိုများကို ပလတ်စတစ်ပိုက်ပျော့ အရှည်ဖြင့် ဆက်သွယ်ပြီး လူနာအခန်း၏ နံဘေးအခန်းမှနေ၍ လေ ပို့လွှတ်ပေးနိုင်မည်ဖြစ်သည်။

"မရှူနိုင် မကယ်နိုင် ဆိုတဲ့ အခြေအနေရောက်နေတဲ့ လူနာတွေကို ကယ်တင်ရတာ သိပ် မွန်မြတ်ပါတယ်။ အခုလို ကုသိုလ်ယူဖို့ဆိုတာ တော်ရုံရနိုင်တဲ့ အခွင့်အရေးမျိုးမှ မဟုတ်တာ။ ဒီတော့ မြန်မာပြည် တနံတလျားက အဂ္ဂိရတ်သမားတွေကလည်း နေ့ရော ညပါ ဖားဖို လာနင်းပေးကြပါလိမ့်မယ်။ အဘတို့အကုန် အဓိဋ္ဌာန်နဲ့ကို ဝိုင်းကူညီကြမှာ" ဟု ဦးအဂ္ဂက လက်ခမောင်းခတ် ပြောဆိုသည်။

"ဇီဝိတဒါန လုပ်ဆောင်နေတုန်း တချိန်တည်းမှာ ဓာတ်လုံးထိုးချင်လည်း ထိုးလို့ ရမယ်။ အဘတို့ အကုန်စီစဉ်ပေးသွားမယ်။ ဓာတ်လုံးထိုးဖို့ မီးဖိုထားပြီဆိုရင် လူနာကိုပေးမဲ့ လေပိုက်ကိုလည်း အပူပေးဖို့ ဘာမှ မခက်တော့ဘူး။ အေးစက်စက် လေကို ရှူစေမှာ မဟုတ်ဘူး။ နွေးအောင်အရင် လုပ်ပေးနိုင်တယ်။ ဘယ်လောက် အဆင်ပြေသလဲ။ သူတို့ အဲဒီလို လာထိုးတဲ့ ဓာတ်လုံးတွေဟာလည်း အင်မတန်သိဒ္ဓိမြောက်ပြီး အစွမ်းထက် အောင်မြင်ကြဖို့ရှိတယ်။ အဲဒီအခါမှာ သတ္တဝါတွေ ထပ်ပြီး ချမ်းသာကြဦးမယ်။ တချက်ခုတ် ဘယ်နှချက်ပြတ်တုန်း။" ဟု အားတက်သရော ရှင်းပြသည်။

ဆေးရုံသုံး စက်များသည် လူနာ၏ အသက်ရှူနှုန်း၊ သွေးထဲရှိ အောက်ဆီဂျင်ပမာဏ စသည်များကို စဉ်ဆက်မပြတ်တိုင်းတာပြီး အသုံးပြုသင့်သည့် လေဖိအားနှင့် ပို့လွှတ်ရမည့်
အောက်ဆီဂျင်ထုထည်ကို လိုအပ်သလို တွက်ချက်ထိန်းညှိပေးရသည်။ ထို့အတွက် sensor များနှင့် ကွန်ပျူတာများကို ချိတ်ဆက်ထားရသည်။ အလိုအလျောက် ပြုပြင်ပေးရန်မဖြစ်နိုင်ပါက ကျွမ်းကျင် သူနာပြု ဆရာဝန်များကို အချက်ပေးမည့်စနစ်များလည်း ပါဝင်ရသည်။

အခြေခံ လေပို့လွှတ်သည့် လုပ်ငန်းစဉ်သည် အလွန်အမင်း မခဲယဉ်းသော်လည်း လူနာ၏ အခြေအနေကို စဉ်ဆက်မပြတ်စောင့်ကြည့်ပေးမည့် စနစ်မျိုး မပါဝင်ပါက အန္တရာယ်များသည့်ကိစ္စဖြစ်ကြောင်း ကျန်းမာရေးပညာရှင်များက စိုးရိမ်နေကြသည်။ ထို့အပြင် အချိန်နှင့်အမျှ လည်ပတ်နိုင်မည့် အားထားရသည့် စက်မျိုးဖြစ်ရန်လည်း အထူးလိုအပ်သည်။ အမှားအယွင်းမရှိရန်၊ စက်ပိုင်းဆိုင်ရာ ချို့ယွင်းခြင်းမရှိရန်အတွက် နှစ်ပေါင်းများစွာ စောင့်ကြည့် စမ်းသပ်ပြီး အကြိမ်ကြိမ် စမ်းသပ်မွမ်းမံထားရသည့် စက်များဖြစ်၍ အချိန်တိုနှင့် လိုက်လံထုတ်လုပ်ရန်မှာ အလွန်ခက်ခဲကြောင်း ထောက်ပြကြသည်။

သို့သော် UG underground group ဘက်မှမူ ၎င်းတို့၏ စနစ်အတွက် စိတ်ပူစရာမရှိကြောင်း ပြောပြသည်။ သမထ အားကောင်းသည့် ဝါရင့်ပုဂ္ဂိုလ်များကို ပင့်ဖိတ်၍ အာရုံခံ ကြီးကြပ်ပေးမည်ဖြစ်သဖြင့် အလွန် စိတ်ချရသည်ဟုဆိုသည်။ အမှားမခံသည့်ကိစ္စဖြစ်၍လည်း စိတ်ချသထက် စိတ်ချရအောင် ၎င်းတို့အားလုံး သက်သတ်လွတ် အဓိဋ္ဌာန်ဝင်ကြဦးမည်ဟု အာမခံသည်။

"ဝင်လေထွက်လေနဲ့ ဖောင်း/ပိန် စတာတွေကို ရှုမှတ်နေကျ ပုဂ္ဂိုလ်တွေ အဘတို့တိုင်းပြည်မှာ အများကြီးရှိပါတယ်။ အသက်ရှူတယ်ဆိုတာ အာနာပါန၊ သမထ နဲ့ ဝိပဿနာကျင့်ဖူးတဲ့လူတွေအတွက် ထမင်းစားရေသောက်အလုပ်ပဲဖြစ်တယ်။ ဒီအတွက် အဘတို့ မြန်မာတွေကရော ဘာပြုလို့ ဇီဝိတဒါန အသက်ကယ်စက်မျိုး မတီထွင်နိုင်ရမလဲ။ အဘတို့ဟာ မွေးကတည်းက တသက်လုံး အသက်ရှူလာတဲ့လူမျိုးဖြစ်တယ်နော်" ဟုလည်း ဦးအဂ္ဂက ထောက်ပြသည်။

ထို့အပြင် တိုင်းတပါးသားအများစုသည် အသက်ရှူစက်ကိုသာ တီထွင်နိုင်ပြီး၊ အသက်ရှူရင်း နိဗ္ဗာန်ရောက်နိုင်သည့် တရားမှတ်ခြင်းနည်းစနစ်ကို စိုးစဉ်းမျှ မသိကြသူများဖြစ်သည်ဟု ဦးအဂ္ဂက သုံးသပ်သည်။
ထိုအတွက် အသက်ရှူသည့်အပိုင်းတွင် မြန်မာတို့က သာနိုင်သည်ဟုလည်း အဆိုပြုသည်။ ၎င်းတို့၏ ဖားဖိုသည်လည်း
ခေတ်ရှေ့ပြေးသည့်နည်းပညာမဖြစ်လျှင်သာရှိမည်၊ ရှေ့ပြေးပုံစံများကိုမူ စမ်းသပ်အောင်မြင်ထားပြီဟု ၎င်းက အားကြိုးမာန်တက် ရှင်းပြခဲ့သည်။

လစာယူပြီးအလုပ်မလုပ်သူများ အရိုက်ခံရသဖြင့် အစိုးရယန္တရားရပ်တန့်လုနီးပါးဖြစ်ခဲ့ရ

အချိန်တန်လျှင် ပုံမှန်လစာထုတ်ယူပြီး အလုပ်မလုပ်သူများအား စိတ်ဆိုးဒေါသဖြင့် ရိုက်နှက်ခဲ့ကြသဖြင့် အစိုးရယန္တရားတစ်ခုလုံး ရပ်ဆိုင်းလုနီးပါး ဖြစ်ခဲ့ရသည်ဟုဆိုသည်။
အရပ်ဘက် စစ်ဘက် ဌာနဆိုင်ရာ အမှုထမ်း အရာထမ်းများအပြင် လွှတ်တော်အမတ်များပါ အရိုက်ခံခဲ့ရခြင်းဖြစ်ကြောင်း သတင်းရရှိသည်။

အစိုးရဝန်ထမ်းတစ်ဦးလျှင် လစဉ် ကျပ်၁၅၀၀၀၀မှ ၅၀၀၀၀၀ ခန့်အထိနှင့်၊ အမတ်တဦးလျှင် လစာငွေ ကျပ်ဆယ်သိန်းအထိ ခံစားနေကြခြင်းဖြစ်သည်။

"ပွင့်ပွင့်လင်းလင်းပြောရရင် ကျွန်တော်တို့ရဲ့ လခ တစ်လခဟာ ကျားဖောင်လုပ်သားတစ်ယောက်ရဲ့ ကိုးလဆယ်လကြာ တစ်ရာသီစာ ဝင်ငွေထက်များနေပါတယ်။ ကြိုက်ကြိုက် မကြိုက်ကြိုက်ဗျာ။ အချိန်တန်ရင် ပြည်သူတွေဘက်က အခွန်ဆောင်ထားရပြီ။ ဒီပြည်သူ့ဘဏ္ဍာတွေနဲ့ ခန့်ထားတဲ့ ဝန်ထမ်းတွေကိုလဲ အလုပ်လုပ်နေတာကို မြင်ချင်ကြမှာပဲ။ နောက်ပြီး ကျွန်တော်တို့ တိုင်းပြည်မှာလဲ ရည်မှန်းချက် မျှော်မှန်းချက်တွေရှိတယ်ဗျာ။ ဆိုပါတော့ နောက်ထပ် ဆယ့်ရှစ်နှစ်လောက်ဆိုရင်ကို စင်္ကာပူနိုင်ငံကို ကျော်ချင်တယ်မို့လား။ ဒီတော့ အမတ်တွေအားလုံး ဝန်ထမ်းတွေအားလုံး အလုပ်လုပ်ဖို့ လိုပါတယ်။ ပိုက်ဆံကျယူထားပြီး ပျင်းနေတယ်၊ အိပ်ပဲနေတယ်ဆို ဒေါသထွက်လာကြမှာပဲ။ မျှော်မှန်းချက်ပြည့်မီအောင် အလုပ်မလုပ်ကြတဲ့အခါမှာ စိတ်ဆိုး ဒေါသထွက်လာပြီး ရိုက်ချင် နှက်ချင်တွေ ဖြစ်လာတတ်တာဟာ လူ့သဘာဝပါပဲ။" ဟု လူ့အခွင့်အရေးကော်မရှင်မှ ဦးအန္ဓက ရှင်းပြသည်။ "ဒီကိစ္စ လူ့အခွင့်အရေးကော်မရှင်ကို အားမကိုးပါနဲ့။ ကျွန်တော်တို့ကိုယ်တိုင် အခွင့်အရေး ဆုံးရှုံးနေပါတယ်။ ဒီမှာလုပ်တာ ၈ နှစ်ကြာပြီ၊ အခုထိ လစာ နဲ့ အောက်ဆိုဒ် ‌ကလွဲလို့ ကော်မရှင်ဆိုလို့ အပို တပြားတချပ်မှ မရဖူးပါဘူး။ ဒီနိုင်ငံမှာလဲ လူ့အခွင့်အရေးပြည့်ဝမှပဲ ကျနော်တို့ ကော်မရှင်ရတော့မယ် ထင်ပါတယ်ဗျာ .. ဟူးးး " ဟု ဦးအန္ဓက ရှင်းပြသည်။ ၄င်းသည် ကော်မရှင်ကြေးရမည်အမှတ်ဖြင့် ဤရာထူးကို ရယူခဲ့သူဖြစ်သည်။

အရေအတွက်များပြားလှသော လွှတ်တော်အမတ်နှင့် စစ်ဘက် အရပ်ဘက်အရာရှိကြီးများကို လိုက်လံရိုက်နှက်ရန်မှာ လွယ်ကူသောကိစ္စမဟုတ်သဖြင့် ရှေးဦးစွာ ထောင်ထွက်လူမိုက်များကို ပိုက်ဆံပေးငှားရမ်းခိုင်းစေခဲ့ကြသည်ဟု ဆိုသည်။

"တပြည်လုံးအတိုင်းအတာနဲ့ဆို ရိုက်ရမဲ့လူကလဲ အရမ်းကို များတယ်။ တယောက်ကိုရိုက်ပေးရင် ဘယ်လောက်ဆိုပြီးလဲ မပေးနိုင်ကြဘူး။ ဒီတော့ လိုက်ရိုက်ဖို့ကို လခ သဘောမျိုးပေးခန့်ပြီး ခိုင်းရတယ်ဗျာ။"

သို့သော် လူမိုက်များမှလည်း အခ ကြေးငွေကိုသာလက်ခံပြီး ၄င်းတို့အား အမှန်တကယ် ရိုက်နှက်ခြင်းမလုပ်ခဲ့ကြသဖြင့် အနည်းငယ် သက်သာခဲ့ရသည်ဟု သိရသည်။ နောက်ပိုင်းတွင် တာဝန်သိပြည်သူအချို့မှ ကိုယ့်ထမင်းကိုယ်စား၍ လိုက်လံရိုက်နှက်ခဲ့ရခြင်းဟု ဆိုသည်။

"လူဆိုးလူမိုက်ဆိုတာမျိုးကလဲ များသောအားဖြင့် စကတည်းက ထမင်းတလုတ်ကို ကောင်းကောင်းမွန်မွန်ရှာစားချင်တတ်တာမှမဟုတ်ပဲ။ ပိုက်ဆံလက်ခံထားပြီး တကယ် မရိုက်ဘူးပေါ့။ ဝတ်ကျေတန်းကျေ တအား ကြုံမှ တယောက်နှစ်ယောက်ကို တချက်တလေပဲ ရိုက်ပေးတယ်။"

ထိုသို့ဖြင့်လူမိုက်အချို့လည်း ပြည်သူ့ အရိုက်အနှက်ခံရပြီး နေပြည်တော် ကုတင်တစ်ထောင် ဆေးရုံသို့ ရောက်နေကြကာ တာဝန်ပျက်ကွက်ကြသည့် ကုတင်နီးချင်းများအကြား ခင်မင်နေသူများပင်ရှိသည်။

ယခုတလော အဖြစ်အပျက် များကြောင့် ပြည်နယ်နှင့်တိုင်းဒေသကြီး အစိုးရအဖွဲ့ဝင်များ နှင့် ပြည်ထောင်စုအစိုးရအဖွဲ့ဝင်များ ရိုက်နှက်မခံရစေရန် လုံခြုံရေးတင်းကျပ်ထားပြီး သူတို့၏ လုံခြုံရေးတာဝန်ယူထားသော သူများပေါ့လျော့ပါက လုံခြုံရေးတပ်ဖွဲ့ဝင်များကိုပါ ရိုက်နှက်ဒဏ်ပေးမည်ဖြစ်ကြောင်း သတိပေးချက် ထုတ်ပြန်ထားသည်ဟု သိရပါသည် ။

(ဂင်္ဂါ အယ်ဒီတာအဖွဲ့၏ မှတ်ချက် - အင်တာဗျူး ဖြေဆိုသူ ဦးအန္ဓတွင် သွားအချို့ကျိုးပြီး ဖူးရောင်ဒဏ်ရာများရရှိထားသဖြင့် ၄င်း၏ ဖြေဆိုမှုများကို တတ်နိုင်သမျှ နီးစပ်မှန်ကန်ရန် ကြိုးစား ဖော်ပြထားသည့်ကြားမှ အမှားအယွင်းအချို့ ပါရှိနိုင်ပါသည်။)