Centre for Human Rights and Development

Хүний Эрх Хөгжил төвийн харьяа Дорноговь аймгийн Хатанбулаг, Даланжаргалан, Улаанбадрах, Дорнод аймгийн Баяндун, Өвөрхангай аймгийн Арвайхээр зэрэг 5 сумын бүлгийн гишүүд өөрсдийн сум орон нутагт 2025 оны 10-р сараас 11-р сарын хооронд “Монгол улсын улсын зарим хууль, бодлогын хэрэгжилтийг үнэлэх удирдамж”-ийн дагуу тус газруудад үйл ажиллагаа явуулж байгаа төрийн болон хувийн хэвшлийн байгууллагуудад мониторинг хийлээ.

Мониторингийн хүрээнд а) Хүний Эрх хамгаалагчийн эрх зүйн байдлын тухай хуулийн 9.1.6 заалт, б) Гамшгаас хамгаалах тухай хуулийн 51 дүгээр зүйлийн 51.2, 51.4 заалт, в) ЗГ-ын Бизнес ба Хүний эрхийн төлөвлөгөөний 2023-2024 онд хэрэгжүүлэх зарим арга хэмжээг хамруулав.

Мониторингийн дүнг орон нутагт олон талын оролцоотой хэлэлцүүлсэн ба 2025 оны 12-р сарын 10-ны өдөр зохион байгуулагдсан “Хүний эрхийн форум-2025”-ын “Бизнес ба хүний эрх” салбар хуралдаанд Дорноговь аймгийн Даланжаргалан сумын бүлгийн дарга Ө.Оюунцэцэг Бизнесийн орчинд хүний эрхийг хамгаалах төлөвлөгөөний хэрэгжилтийн мониторингийн дүнгээр илтгэл тавьсан бол Дорнод аймгийн Баяндун сумын МХБХ-ны дарга Я. Мөнхзул уур амьсгалын өөрчлөлтийн улмаас давтамж нь олширч, хамрах хүрээ нь өсч байгаа гамшигт үзэгдлийн улмаас малчид, ногоочдын амьжиргааг хамгаалахад тустай Гамшгаас хамгаалах тухай хуулийн хэрэгжилтийн мониторингийн дүгнэлт, зөвлөмжийг форумын зөвлөмжийг хэлэлцэх нэгдсэн хуралдаад мэдээллээ.

Мөн 2025 оны 12-р сарын 23-ны өдөр Улсын Их Хурлын Хүний эрхийн дэд хорооны хуралдаанд ХЭХТ-ийн харьяа Дорноговь аймгийн Хатанбулаг сумын бүлгийн дарга Б.Навчаа Хүний эрх хамгаалагчийн эрх зүйн байдлын тухай хуулийн хэрэгжилт, ХЭХТ-ийн харьяа Дорнод аймгийн Баяндун сумын МХБХ-ны Удирдах Зөвлөлийн гишүүн Д. Хишигт Гамшгаас хамгаалах тухай хуулийн хуулийн хэрэгжилтийн үнэлгээний дүгнэлт, хэрэгжилтийг сайжруулах зөвлөмжийг танилцууллаа.

Хуралдааны тухай парламентийн сайтад тавьсан мэдээлэлд “... цаашид төрийн бүх шатны байгууллагууд хуулийн хэрэгжилтийг сайжруулах, үйл ажиллагааны төлөвлөгөө, хөтөлбөрт хүний эрх хамгаалах асуудлыг тусган хэрэгжүүлэх, тайлагнадаг байх шаардлагатай байгааг онцлон тэмдэглэжээ. Мөн танилцуулгатай холбогдуулан гишүүд санал хэлж, асуулт асуув. Улсын Их Хурлын гишүүн, Дэд хорооны дарга С.Эрдэнэболд Хууль зүйн байнгын хороо, Хүний эрхийн дэд хорооноос дээрх танилцуулгад дурдагдсан асуудлуудыг шийдвэрлэхэд Хүний эрхийн Үндэсний Комисстой хамтран ажиллах шаардлагатай байгааг дурдаж, шийдлээ хүлээж буй олон асуудлын шалтгаан нөхцөлийг тодорхойлж, хуулийн хэрэгжилтийг хангуулах чиглэлээр ажиллана гэдгээ илэрхийллээ” гэжээ.

Хүний Эрхийн Дэд хорооны хуралдаанд Дорноговь аймгийн Хатанбулаг сумаас Б.Навчаа, Ц. Баттулга, А.Баярсайхан, Дорноговь аймгийн Даланжаргалан сумаас Ө.Оюунцэцэг, Дорноговь аймгийн Улаанбадрах сумаас Д.Гантөр, Дорнод аймгийн Баяндун сумаас Д.Хишигт, Өвөрхангай аймгийн Арвайхээр сумаас Г.Сүхбаатар нар идэвхтэй оролцож хуралдааны өмнө ба дараа нь орон нутгаас сонгогдсон УИХ-ын гишүүдтэй уулзан өөрсдийн байр сууриа илэрхийллээ.