BOLOR MN

ЗТЯ: 100 ХУВЬ ЦАХИЛГААН ХӨДӨЛГҮҮРТЭЙ АВТОМАШИНД НОГООН УЛСЫН ДУГААР ОЛГОЖ, ДУГААРЫН ХЯЗГААРЛАЛТАД ХАМРУУЛАХГҮЙ

Засгийн газраас хэрэгжүүлж буй “Чөлөөлье” санаачилгын хүрээнд цахилгаан хөдөлгүүртэй автомашины хэрэглээг дэмжих, цахилгаан тээврийн хэрэгслийн хэрэглээг нэмэгдүүлэх бодлого шийдвэрийн хүрээнд цахилгаан тээврийн хэрэгслийг тодорхой ангиллын дагуу дугаарын хязгаарлалтад хамруулахгүй ногоон дугаар олгох талаар Зам, тээврийн яамны Автотээврийн бодлого зохицуулалтын газрын дарга Э.Мөнхнасан мэдээлэл хийлээ.

Тухайлбал, дэлхий нийтэд шатахууны хомсдол үүсэх эрсдэл нэмэгдэж буй энэ үед цахилгаан тээврийн хэрэгслийн хэрэглээг дэмжих, хамрах хүрээг өргөжүүлэх зорилгоор автотээврийн хэрэгсэлд ногоон улсын дугаар олгох асуудлыг Монгол Улсын Засгийн газрын 2026 оны 4 дүгээр сарын 29-ний өдрийн хуралдаанаар хэлэлцэн шийдвэрлэсэн. Уг шийдвэр нь зөвхөн бүрэн цахилгаан автомашин (BEV) болон зай хураагуурт тулгуурласан, туулах зай уртасгагчтай цахилгаан автомашин (EREV)-д хамаарах бөгөөд Prius, Aqua зэрэг гибрид (HEV), залгадаг гибрид (PHEV) технологийн автомашинд хамаарахгүй.

Өөрөөр хэлбэл, ногоон улсын дугаарыг 100 хувь цахилгаан хөдөлгүүртэй автомашин (BEV) болон EREV төрлийн тээврийн хэрэгсэлд олгоно. EREV төрлийн автомашин нь цахилгаан хөдөлгүүрийг үндсэндээ ашиглах бөгөөд батарейг цэнэглэх зориулалттай бага оврын цахилгаан үүсгүүрийг нэмэлтээр суурилуулсан байдаг.

Уг үүсгүүр нь хүч дамжуулах системд шууд оролцохгүй бөгөөд зөвхөн шаардлагатай үед, тухайлбал цахилгаан эх үүсвэрээс хол нөхцөлд батарейг цэнэглэх зориулалтаар ажилладаг.
Иймээс “туулалтын зай уртасгагчтай” (range-extended) хэмээн нэрлэдэг. Ижил төрлийн тээврийн хэрэгсэлд бүс нутгийн бусад улс орнууд ногоон өнгийн улсын дугаар олгодог жишигтэй бөгөөд манай улсын хувьд зам, тээврийн салбарын эрхлэх асуудлын хүрээнд холбогдох шийдвэр гарч, ногоон улсын дугаар олгож эхлэх юм.

БОЛОВСРОЛЫН САЙД Л.ЭНХ-АМГАЛАН: 3000-ААС ДЭЭШ ХҮҮХЭДТЭЙ 40 ОРЧИМ СУРГУУЛЬ БАЙГААГ ЗАДАЛЖ, ТӨРӨЛЖСӨН АХЛАХ СУРГУУЛЬ, ЦЭЦЭГЛЭГ БАЙГУУЛНА

Уих-ын гишүүн, Боловсролын сайд Л.Энх-Амгалан Дэлхийн банкны суурин төлөөлөгч Таехюн Литэй уулзлаа.

Улаанбаатар хотод хүүхдийн ачаалал хэтэрсэн буюу 3000-аас дээш хүүхэдтэй 40 орчим сургууль байгааг задалж, төрөлжсөн ахлах сургууль, хотхоны бага сургууль, цэцэрлэг байгуулна.
Энэ бүх бүтцийн шинэчлэлд төсвийн мөнгийг хүлээх бус төр, хувийн хэвшлийн түншлэлийг нэмэгдүүлж, PPP загварыг ашиглах шаардлагатай.

Дэлхийн банктай хамтран эхний ээлжинд 20-30 сургуулийг бүрэн тоноглохоор төлөвлөж буй. Энэ хүрээнд ирэх 1 сарын хугацаанд төслийн талбайнуудыг эцэслэх, бусад талуудтай санхүүжилтийн бүтцийг тодорхойлохоор ажиллаж байна.

ХХААХҮЯ: МАХНЫ ЭКСПОРТ 2023 ОНООС ХОЙШ ӨСӨЖ, ТҮҮХЭН ДЭЭД ХЭМЖЭЭНД ХҮРЭЭД БАЙНА

Хүнс, хөдөө аж ахуй, хөнгөн үйлдвэрийн сайд Ц.Идэрбатын тушаалаар мах, махан бүтээгдэхүүний экспортыг нэмэгдүүлэх чиглэлээр ажлын хэсэг байгуулсан.

Энэ хүрээнд нэн тэргүүнд малын халдварт өвчний тархалтыг таслан зогсоох, мах, махан бүтээгдэхүүн экспортлох үеийн эрүүл ахуй, ариун цэврийн дүрэм, стандартуудыг сайжруулах, олон улсын жишигт нийцүүлэх ажлыг хийж байна.

Монгол Улсын махны экспорт 2025 оны эцсийн байдлаар 85,624 тоннд хүрчээ. Энэ нь өмнөх оноос 20 хувиар өссөн үзүүлэлт юм. Энэхүү өсөлтийн үр дүнд өнгөрсөн онд махны экспортын борлуулалтын орлого 345.3 сая ам.доллар болж дээд хэмжээнд хүрчээ.

2025 онд экспортолсон нийт махны 34,653 тонн нь адууны мах, 22,528 тонн нь боловсруулсан мах байжээ.

Манай улсын экспортын махны хамгийн том худалдан авагч нь БНХАУ бөгөөд нийт зах зээлийн 62 хувийг эзэлдэг. Харин экспортын махны 22 хувь нь Иран, Ирак зэрэг Булангийн орнуудад ногдож байна.

Цар тахлын нөхцөл байдлын улмаас буураад байсан махны экспорт сүүлийн хэдэн жилд эрчимжжээ. 2020-2022 онд экспортын хэмжээ дунджаар 45 хувиар буурч, 2022 онд 16.0 мянган тонн болтлоо багассан.

2023 оноос эхлэн экспорт огцом сэргэж, 80.4 мянган тоннд хүрсэн нь цар тахлын дараах түүхэн дээд үзүүлэлт болсон юм.