Renaissance Institute

ကိုဗစ်-၁၉ ကာလအတွင်း စည်ပင်သာယာရေးရငွေများကို စီမံခန့်ခွဲခြင်း
-------------------------------------------------------------------------------

ကိုဗစ်-၁၉ကပ်ရောဂါ၏ ဆင့်ကဲသက်ရောက်မှုများကြောင့် ကမ္ဘာ့နိုင်ငံအသီးသီး၌ နိုင်ငံရေးဖြစ်စဉ်အပါအဝင် လူမှုစီးပွားဘဝကဏ္ဍအသီးသီးတွင် ရုန်းကန်ရမှုများနှင့် ရင်ဆိုင်ရလျက်ရှိပါသည်။ မြန်မာနိုင်ငံတွင်လည်း ကိုဗစ်-၁၉ ကူးစက်ရောဂါ ပျံ့နှံ့မှုကို တားဆီးထိန်းချုပ်နိုင်ရန် ပြည်ထောင်စုအစိုးရအပါအဝင် တိုင်းဒေသကြီးနှင့်ပြည်နယ် အစိုးရများမှ မူဝါဒများချမှတ်ဆောင်ရွက်နေကြသော်လည်း ကပ်ရောဂါ၏ နောက်ဆက်တွဲ သက်ရောက်မှုများကို အလုံးစုံထိန်းချုပ်ဟန့်တားနိုင်ရန်မှာ စိန်ခေါ်မှုများနှင့် ပြည့်နှက်နေဆဲဖြစ်ပါသည်။
မြန်မာနိုင်ငံရှိ စည်ပင်သာယာရေးအဖွဲ့များအနေဖြင့် ကိုဗစ်-၁၉ကပ်ရောဂါနှင့် ကာလရှည်ရင်ဆိုင်ရဖွယ်ရှိသည့် ယခုကဲ့သို့ အနေအထားတွင် ပြည်သူ့ဝန်ဆောင်မှုလုပ်ငန်းများ ဆောင်ရွက်နိုင်ရန် လိုအပ်သည့် လုံလောက်သော ရငွေများ ရရှိနိုင်ရန် အခွန်ကောက်ခံခြင်းလုပ်ငန်းများကို မည်သို့ဆက်လက်ဆောင်ရွက်ကြမည်ဆိုသည်နှင့်စပ်လျဉ်း၍ ထိရောက်သော မူဝါဒများချမှတ်ဆောင်ရွက်သင့်ကြောင်းကို ယခုစာတမ်းတွင် အကြံပြုတင်ပြထားပါသည်။
“ စိန်ခေါ်မှုမှန်သမျှကို ပြေလည်စေရန် ဖြေရှင်းပေးနိုင်သည့် တစ်ခုတည်းသော မူဝါဒဖြေရှင်းချက်ဟူ၍ မရှိနိုင်ပါ ” ဆိုသည့် လက်တွေ့ကျမှုအပေါ်တွင် ဤမူဝါဒစာတမ်းပါ ဖြစ်ရပ်နမူနာပုံစံများကို အခြေခံတည်ဆောက်ထားခြင်း ဖြစ်ပါသည်။ ကိုဗစ်-၁၉ ကပ်ရောဂါ၏ သက်ရောက်မှုကြောင့် လူမှုစီးပွားဘဝနစ်နာရမှုများနှင့် ကြုံတွေ့နေရသည့် မြို့နေပြည်သူများနှင့် မြို့ပြဝန်ဆောင်မှုလုပ်ငန်းများဆက်လက်ဆောင်ရွက်နိုင်ရန် ခိုင်မာတောင့်တင်းသည့် ရန်ပုံ ငွေတစ်ရပ် လိုအပ်လျက်ရှိသည့် စည်ပင်သာယာရေးအဖွဲ့များအကြား လက်တွေ့အလုပ်ဖြစ်နိုင်သည့် မူဝါဒတစ်ရပ် ကို ချမှတ်နိုင်ရန်မှာ ကပ်ရောဂါကာလတွင် ဦးစားပေးစဉ်းစားသင့်ကြောင်းကို ယခုမူဝါဒစာတမ်းတွင် အခွန်အမျိုး အစားအလိုက် ပြည့်စုံစွာ နှိုင်းယှဉ်တင်ပြထားပါသည်။

မူဝါဒစာတမ်းအပြည့်အစုံကို အောက်ပါ link တွင် မြန်မာ၊ အင်္ဂလိပ်နှစ်ဘာသာဖြင့် ဝင်ရောက် ဖတ်ရှုနိုင် ပါသည်။
https://rimyanmar.org/en/publication/managing-municipal-revenues-time-covid-19