February

- ဓညင်းသီး နှင့် ကျန်းမာရေး

မင်္ဂလာပါခင်ဗျာ…. ဒေါက်တာရဲ ဖြစ်ပါတယ်။

ဓညင်းသီး (Djenkol Bean) ဆိုတာ ကျွန်တော်တို့ မြန်မာနိုင်ငံအပါအဝင် အရှေ့တောင်အာရှ နိုင်ငံတွေမှာ အများဆုံးပေါက်ရောက်ပြီး လူကြိုက်များတဲ့ အသီးတစ်မျိုးပါ။ သူ့မှာ ထူးခြားတဲ့ အနံ့ပြင်းပြင်းလေးရှိပြီး ငါးပိရည်လေးနဲ့ တို့စားမလား၊ ပြုတ်ပြီး ဆီလေး၊ ဆားလေးနဲ့ပဲ နယ်စားမလား အရမ်းကို ထမင်းမြိန်စေတဲ့ အစားအစာပါ။ ဒါပေမယ့် သူ့ဆီမှာ ဆိုးရွားတဲ့ အဆိပ်တစ်ခုလည်း ကိန်းအောင်းနေတယ်ဆိုတာကို မမေ့ပါနဲ့။

ဓညင်းသီးမှာ ဆေးပညာအရ Djenkolic Acid လို့ခေါ်တဲ့ အမိုင်နိုအက်ဆစ်တစ်မျိုး ပါဝင်ပါတယ်။ ဒီအက်ဆစ်ဟာ ရေမှာပျော်ဝင်ဖို့ အရမ်းခက်ခဲပါတယ်။

ကျွန်တော်တို့ ဓညင်းသီးကို စားလိုက်တဲ့အခါ အဲဒီ အက်ဆစ်တွေက သွေးကြောထဲကနေတစ်ဆင့် ကျောက်ကပ်ဆီကို ရောက်သွားပါတယ်။ ဆီးလမ်းကြောင်းထဲ ရောက်တဲ့အခါ အဲဒီ Djenkolic acid တွေက ချွန်ထက်တဲ့ "ပုံဆောင်ခဲ (Crystals)" လေးတွေအဖြစ် ပြောင်းသွားပါတယ်။ အဲဒီ ပုံဆောင်ခဲလေးတွေက ကျောက်ကပ်နဲ့ ဆီးပြွန် သွေးကြောလေးတွေကို ထိုးဆွပြီး ပိတ်ဆို့ပစ်လိုက်တဲ့အတွက်
* ခါးနဲ့ ဆီးစပ် တဝိုက် ပြင်းထန်စွာ နာကျင်ခြင်း
* ဆီးသွားရ ခက်ခဲခြင်း၊ ဆီးကျင်ခြင်း
* ဆီးထဲ သွေးပါခြင်း
* အချိန်မီ မကုသရင် ရုတ်တရက် ကျောက်ကပ်ပျက်စီးခြင်း (Acute Kidney Injury - ရှားပါးဆေးပညာအခေါ် Djenkolism) ဖြစ်စေပြီး အသက်အန္တရာယ် ထိခိုက်စေနိုင်ပါတယ်။

❌ ဘယ်သူတွေ လုံးဝ မစားသင့်ဘူးလဲ?
* ကျောက်ကပ်ရောဂါ ရှိသူများ - ကျောက်ကပ်အားနည်းနေသူတွေ၊ ကျောက်ကပ်စွမ်းဆောင်ရည် ကျဆင်းနေသူတွေအတွက် ဓညင်းသီးက အဆိပ်အတောက်လို ဖြစ်နိုင်လို့ လုံးဝ ရှောင်သင့်ပါတယ်။

* ဆီးကျောက်တည်ဖူးသူများ - ဆီးလမ်းကြောင်းမှာ ကျောက်တည်တတ်တဲ့ ရာဇဝင်ရှိသူတွေ၊ ဆီးလမ်းကြောင်း ပိုးဝင်နေသူတွေ အနေနဲ့ မစားသင့်ပါ။

* ရေသောက်နည်းသူများ - နေ့စဉ် ရေလုံလောက်အောင် မသောက်တဲ့သူတွေဟာ ဆီးထဲမှာ အက်ဆစ်တွေ ပိုပြီးစုပုံလွယ်တာကြောင့် ရှောင်သင့်ပါတယ်။

* ကလေးငယ်များ - ကလေးတွေရဲ့ ကျောက်ကပ်က သေးငယ်ပြီး နုနယ်တဲ့အတွက် အနည်းငယ်စားမိရုံနဲ့ အလွယ်တကူ အန္တရာယ်ဖြစ်နိုင်ပါတယ်။

* ကိုယ်ဝန်ဆောင်သည်များ- သွေးထဲကို ရောက်သွားတဲ့ ဓညင်းသီးရဲ့ အဆိပ်တွေက အချင်းကနေတဆင့် ကလေးဆီကိုလည်း ရောက်ရှိသွားနိုင်တာကြောင့် ကလေးရဲ့ ကျန်းမာရေးကို ထိခိုက်စေနိုင်ပါတယ်။

✅ ဒါဆိုရင် ဘယ်လို စားပေးသင့်လဲ?
ဓညင်းသီးကို လုံးဝ မစားရဘူးလို့ မဆိုလိုပါဘူး။ စားတဲ့အခါ အန္တရာယ်ကင်းအောင် အောက်ပါအတိုင်း လုပ်ဆောင်ပါ-
* အစိမ်း လုံးဝ (လုံးဝ) မစားပါနဲ့ - အစိမ်းစားခြင်းဟာ အက်ဆစ်ဓာတ်ကို အပြည့်အဝ ခန္ဓာကိုယ်ထဲ ရောက်စေပါတယ်။

* ရေကြာကြာစိမ်ပါ (သို့) သေချာပြုတ်ပါ - ဓညင်းသီးကို မချက်ပြုတ်မီ ရေထဲမှာ ၂ ရက်၊ ၃ ရက်လောက် ကြာကြာစိမ်ထားပေးပါ။ (သို့မဟုတ်) ပြုတ်တဲ့အခါ ဆော်ဒါ (Baking Soda) အနည်းငယ် ထည့်ပြုတ်ပေးပါ။ အယ်လ်ကာလီ (Alkaline) ဓာတ်က Djenkolic acid ကို အလွယ်တကူ ပျော်ဝင်စေပြီး အဆိပ်အတောက် လျော့ကျစေပါတယ်။ ပြုတ်ရည်ကို လုံးဝ မသောက်ရပါဘူး။

* အများကြီး မစားပါနဲ့ - တစ်ခါစားရင် (၂) လုံး၊ (၃) လုံး ထက်ပိုပြီး မစားပါနဲ့။

* ရေများများသောက်ပါ - ဓညင်းသီးစားပြီးတဲ့ နေ့တွေမှာ ဆီးလမ်းကြောင်းထဲက အက်ဆစ်ဓာတ်တွေ အနည်မကျဘဲ ဆီးနဲ့အတူ ပါသွားအောင် ရေကို ပုံမှန်ထက် ပိုပြီး များများသောက်ပေးပါ။

❗️ဘယ်အချိန် ဆေးရုံ/ဆေးခန်း အမြန်သွားပြသင့်လဲ?
ဓညင်းသီး စားပြီးနောက် ၂ နာရီ ကနေ ၁၄ နာရီ အတွင်း အောက်ပါ လက္ခဏာတွေထဲက တစ်ခုခု ပြလာပြီဆိုရင် ဆေးရုံ၊ဆေးခန်းကို ချက်ချင်း သွားပြဖို့ လိုအပ်ပါတယ်-
* ခါးတစ်လျှောက် သို့မဟုတ် ဆီးခုံတဝိုက် ပြင်းထန်စွာ ထိုးအောင့်ပြီး နာကျင်ခြင်း။
* ဆီးသွားလျှင် အရမ်းနာကျင်ခြင်း (သို့မဟုတ်) ဆီးထဲတွင် သွေးပါခြင်း။
* ဆီးသွားချင်သော်လည်း ဆီးလုံးဝ မထွက်တော့ခြင်း၊ ဆီးသွားရခက်ခြင်း။
* ပျို့ခြင်း၊ အန်ခြင်း။

💡အကြံပြုချက်
"အစားအသောက်ဆိုတာ တန်ဆေး လွန်ဘေးပါ။ ဓညင်းသီးဟာ မြန်မာတို့ရဲ့ အကြိုက် ရာသီစာဖြစ်ပေမယ့် မိမိရဲ့ ကျောက်ကပ်လေးတွေကို မထိခိုက်အောင် စနစ်တကျ ပြုတ်ချက်ပြီး ချင့်ချိန်စားသုံးကြဖို့ တိုက်တွန်းချင်ပါတယ်။"

မိတ်ဆွေတို့ရော ဓညင်းသီး ကြိုက်ကြလား။
ဓညင်းသီးကို ဘယ်လိုစားသုံးလေ့ရှိကြလဲဆိုတာ ပြောပြခဲ့ကြပါဦးဗျ။
ဓညင်းသီး ကြိုက်တတ်တဲ့ ကိုယ့်သူငယ်ချင်းတွေ၊ မိသားစုဝင်တွေကိုလည်း အန္တရာယ်ကင်းကင်း စားတတ်အောင် ဒီ Post လေးကို Share ပေးလိုက်ကြပါဦးခင်ဗျ။

အားလုံးပဲ ကျန်းမာကြပါစေ
ဒေါက်တာရဲ။

#ဒေါက်တာရဲ #ဓညင်းသီး

"ကျွန်တော်ကတော့ ခင်ဗျား ခြံစည်းရိုးဘေးမှာ စိုက်ထားတဲ့ အောင်မဲညိုသီး ပါ။ ဟင်းသီးဟင်းရွက်ဆိုင်ထက်လည်း နီးတယ်၊ ဝါသနာပါလို့ ဝယ်သောက်နေတဲ့ ဗီတာမင်အားဆေးတွေထက်လည်း ပိုနီးနီးလေးမှာ ဟောဒီလို တွဲလောင်းကျနေတာတောင် ခင်ဗျား တစ်ခါမှ ဆွတ်မစားခဲ့ဘူး။
​ခင်ဗျားက ဒီလိုပါပဲ... အစားအသောက် ပျက်ရင် ဘာစားရမှန်း မသိဘူးဖြစ်မယ်၊ ပင်ပန်းလာရင် ရာသီဥတုကို အပြစ်တင်မယ်၊ မျက်စိညောင်းလာရင် ဖုန်းစခရင်ကို ပုံချမယ်။ ပြီးရင်တော့ ဘာမှမဖြစ်သလိုပဲ ခပ်အေးအေး ဆက်နေတတ်ပြန်ရော။ ခန္ဓာကိုယ်က တကယ်ကြီး မခံနိုင်တော့မှ 'ဒီတလော ဘာလို့ ဒီလောက် နုံးနေရတာလဲ' ဆိုပြီး ညည်းတွားတတ်သေးတယ်။
​တကယ်တော့ ကျွန်တော်က ရှေးလူကြီးတွေ အမြတ်တနိုးစားခဲ့တဲ့ ဆေးဖက်ဝင် အစားအစာပါ။ စားလိုက်ရင်တော့ အရသာက ထူးထူးခြားခြား ဆန်းကြယ်မနေပေမဲ့ ခန္ဓာကိုယ်ကိုတော့ တိတ်တဆိတ် ပေါ့ပါးသွားစေတယ်။ ဓာတ်တိုးဆန့်ကျင်ပစ္စည်းတွေက သူ့အလုပ်သူ လုပ်မယ်၊ သွေးလေတွေက မှန်မှန်ကန်ကန် စီးဆင်းမယ်၊ ပင်ပန်းနေတဲ့ မျက်စိတွေက အလိုလို အနားရသွားမယ်။ အတင်းအကျပ် မဟုတ်သလို၊ လောစရာလည်း မလိုဘူး၊ ရှင်းပြချက်တွေ အများကြီးလည်း မလိုအပ်ဘူး။
​ဒါပေမဲ့ ခင်ဗျားက ကျွန်တော့်ကို လှည့်တောင်မကြည့်ဘူး။ ဘာလို့လဲဆိုတော့ ကျွန်တော်က ရိုးလွန်းလို့လား၊ ဒါမှမဟုတ် တန်ဖိုးကြီးကြီး ပေးဝယ်ရတာ မဟုတ်လို့လား။ အောင်မဲညိုသီး အနုလေးတွေကို ခူးဆွတ်၊ ရေနွေးဖျော၊ ကြက်ဥနဲ့ကြော်၊ ဒါမှမဟုတ် တို့စရာလေးလုပ်စားဖို့ကိုတောင် ခင်ဗျား ပျင်းနေခဲ့တယ်။
​ခင်ဗျားက စောင့်နေတာ... ခန္ဓာကိုယ်ကြီး ယိုယွင်းလာမှ၊ အဖိုးတန် အားဆေးတွေ ဝယ်သောက်ရမှ ကျေနပ်မယ့်လူစားမျိုး။ တကယ်တော့ ခန္ဓာကိုယ်ဆိုတာ မပျက်စီးခင်ကတည်းက ကြိုတင်ဂရုစိုက်လို့ ရတာပဲလေ။
​ရပါတယ်... ခင်ဗျား ကျွန်တော့်ကို မယုံလည်း ကိစ္စမရှိပါဘူး။ ဒါပေမဲ့ ကျွန်တော့်နာမည်ကိုတော့ မှတ်ထားလိုက်ပါ။ တစ်နေ့နေ့မှာ ခန္ဓာကိုယ်အတွက် ပေါ့ပေါ့ပါးပါးလေး လိုချင်လာတဲ့အခါ၊ ကိုယ့်ကိုယ်ကိုယ် ဂရုစိုက်ဖို့ သတိရလာတဲ့အခါ... အဲ့ဒီနေ့ကျရင် ခင်ဗျား သတိရလာလိမ့်မယ်။
​အောင်မဲညိုသီး... အဲ့ဒီမှာ တွဲလောင်းလေး ရှိနေခဲ့တာပဲ၊ ဒါပေမဲ့ ငါကိုယ်တိုင်ကသာ အဖိုးမတန်ဘူးထင်ပြီး မဆွတ်ခဲ့တာ' ဆိုတာကိုပေါ့။"

MON SOUNG


#အောင်မဲညို
#မေတ္တာဖြင့်ပြန်လည်မျှဝေပါသည်
#ကျန်းမာရေးဗဟုသုတရကြပါစေ

ကလေးပုံစံ အနားယူနည်း (Balasana) - သင့်ရဲ့ ခါးနဲ့ စိတ်ဖိစီးမှုကို ချက်ချင်းဖြေလျှော့ပေးမယ့် နည်းလမ်းကောင်း
ယောဂကျင့်စဉ်ထဲက ကလေးပုံစံ အနားယူတဲ့ (Balasana) ဟာ ရိုးရှင်းပေမယ့် သင့်ရဲ့ ကျောရိုးနဲ့ အာရုံကြောစနစ်အတွက် အံ့ဩစရာကောင်းတဲ့ အကျိုးကျေးဇူးတွေကို ပေးစွမ်းနိုင်ပါတယ်။ တစ်နေ့ကို မိနစ်အနည်းငယ်လောက် ဒီပုံစံအတိုင်း အနားယူပေးရုံနဲ့ ခန္ဓာကိုယ်ရဲ့ စိတ်ဖိစီးမှုတွေကို "Reset" လုပ်ပြီးသား ဖြစ်သွားစေမှာပါ။
ဒီလေ့ကျင့်ခန်းကြောင့် ရရှိမယ့် အကျိုးကျေးဇူး (၃) မျိုး-
၁။ ခါးနာဝေဒနာကို သက်သာစေခြင်း -
တစ်နေကုန် ထိုင်တာ ဒါမှမဟုတ် မတ်တပ်ရပ်တာကြောင့် ဖိသိပ်နေတဲ့ ကျောရိုးဆစ်တွေကို ပြန်လည်ပွင့်သွားစေပြီး ခါးရိုးအကြောညှပ်တာနဲ့ နာကျင်တာတွေကို သဘာဝအတိုင်း သက်သာစေပါတယ်။
၂။ စိတ်ဖိစီးမှုကို လျှော့ချပေးခြင်း -
နဖူးကို ကြမ်းပြင်နဲ့ ထိကပ်ပြီး အနားယူလိုက်တဲ့အခါ ခန္ဓာကိုယ်ရဲ့ အာရုံကြောစနစ်ကို ငြိမ်သက်သွားစေပါတယ်။ ဒါဟာ နှလုံးခုန်နှုန်းကို ပုံမှန်ဖြစ်စေပြီး စိတ်ပူပန်မှုတွေကို လျော့ကျစေတဲ့ သဘာဝအတိုင်း ပေးတဲ့ စိတ်ငြိမ်ဆေးတစ်ခွက်ပါပဲ။
၃။ အစာခြေစနစ်ကို ကောင်းမွန်စေခြင်း -
ဒီပုံစံအတိုင်း ဝမ်းဗိုက်နဲ့ ပေါင်ကို ထိကပ်ထားခြင်းက အတွင်းကလီစာတွေကို နှိပ်နယ်ပေးသလို ဖြစ်စေတာကြောင့် အစာကြေရင်ချောင်စေပြီး လေပွတာတွေကို သက်သာစေပါတယ်။
ပြုလုပ်နည်း အဆင့်ဆင့်-
• ဒူးထောက်ပြီး ခြေဖနောင့်ပေါ်မှာ ထိုင်ချပါ။
• ခန္ဓာကိုယ်ကို ရှေ့သို့ဖြည်းဖြည်းချင်း ငုံ့ချပြီး နဖူးကို ကြမ်းပြင်နဲ့ ထိထားပါ။
• လက်ကို ရှေ့သို့ဆန့်ထုတ်ထားနိုင်သလို၊ နောက်ဘက်သို့လည်း ချထားနိုင်ပါတယ်။
• ဒီပုံစံအတိုင်း ဖြည်းဖြည်းချင်း အသက်ရှူရင်း (၃) မိနစ်ကနေ (၅) မိနစ်ခန့်အထိ အနားယူပေးပါ။
သင့်ရဲ့ ခါးနဲ့ စိတ်ကို အနားပေးဖို့ ဒီနေ့ပဲ စမ်းသပ်ကြည့်လိုက်ပါ။
(မှတ်ချက် - ဒူးနာဝေဒနာ အပြင်းအထန်ရှိသူများနှင့် ကိုယ်ဝန်ဆောင်များအနေဖြင့် ကျွမ်းကျင်သူနှင့် တိုင်ပင်ပြီးမှ ပြုလုပ်သင့်ပါသည်။)

#ကျန်းမာရေးဗဟုသုတရကြပါစေ
#မေတ္တာဖြင့်ပြန်လည်မျှဝေပါသည်