Authentic Myanmar Outbound Tours

🇱🇻 RIGA, Latvia
Jurmala beach

ဒီနေ့က Riga မြို့ရဲ့ မရောက်ဖူးသေးတဲ့ နေရာသစ်တွေရယ် Baltic Sea ကို လျှောက်လည်တဲ့ နေ့ပါ

ကျွန်မတို့ဟာ “Alberta iela” လမ်းတစ်လျှောက်ကို စတင် ခြေချပါတယ်
အခု ကျွန်မ ရေးပြမယ့် လမ်းတွေကို “လမ်းမပေါ်က ပြတိုက်တွေ” လို့ တင်စားချင်ပါတယ် … တိုက်အကြီးကြီးတွေ တန်းစီ တည်ရှိနေတာ ဖြစ်ပြီး ပန်းခက်တွေ အမျိုးသမီးတွေ ရုပ်ထုတွေ ပန်းအညွန့်အခက်တွေနဲ့ တိုက်တွေ ဝရံတာတွေ နံရံတွေကို တန်ဆာဆင်ထားတာတွေ တွေ့ရပါမယ်

ဒီနိုင်ငံရဲ့ ဘာသာ စကား နဲ့ ယခု ဗိသုကာ ကို “Jugendstil” လို့ အမည်တွင်ပါတယ်

ဆက်လက်ပြီး “Elizabetes iela” “Antonijas iela” လမ်းတလျှောက် သွားတဲ့အခါ ၂၀ ရာစုအစောပိုင်းက ယခု လက်ရာတွေကို ပုံစံ အမျိုးစုံနဲ့ တွေ့ရပါမယ်

သိတ်လှလွန်းတဲ့ လက်ရာတွေ ပေါင်းစုံထားတာမို့ ကြည့်မဝလို့ နောက်တစ်ကြိမ် ထပ်လျှောက်ပြီး သွားကြည့်ရပါတယ်

Riga မြို့ရဲ့ အမှတ်တရ အရောင်းဆိုင်တွေမှာ ကြောင်အနက်ပုံ အိတ်တွေ ရောင်းချလေ့ရှိပါတယ်
ကြောင်လေးတွေရှိနေတာဟာ လာဘ်ကောင်းတဲ့ အပြင် အိမ်ဟောင်းတွေကို စောင့်ရှောက်တယ်လို့ မြို့သားတွေက ယုံကြည်ကြပါတယ်

“Ukrainas iela” လမ်းမတလျှောက် ကို လျှောက်လေ့လာတဲ့အခါ ယူကရိန်း သံရုံးကိုလည်း တွေ့ရတယ်
လမ်းထဲက ဆေးတက္ကသိုလ်အဆောက်အဦးကြီးရဲ့ နံရံကြီးပေါ်မှာ ရရှားသမ္မတ ပူတင်ပုံကြီးကို ရုပ်ပြောင်ပြုလုပ်ပြီး ချိတ်ထားပါတယ်
ပိုပြီး စိတ်ဝင်စားစရာကောင်းတာက ရရှား သံရုံး ကလည်း လမ်းတစ်လမ်းထဲမှာ ရှိနေတာပါ

“Ukrainas iela” အမည်ရတဲ့ ဒီလမ်းက မြို့မှာ အဟောင်းဆုံး လမ်း ဖြစ်ပါတယ် ခြေလှမ်း တလှမ်းချင်း သွားပြီး ကြည့်ရတဲ့ အထိကို လှပတဲ့ အဆောက်အဦးတွေကို တွေ့ရပါမယ်

တချို့သော အဆောက်အဦးတွေဟာ နာမည်ကြီး ဗိသုကာ မှာ နာမည်ကြီးတဲ့ ဂျုးလူမျိုး ရရှား ပညာရှင် Mikhaïl Eisenstein ရဲ့ ဒီဇိုင်းတွေ ဖြစ်ပါတယ်

Riga မြို့ဟောင်း လေ့လာရေး ခရီးစဉ်မှာ သမိုင်းကြောင်း နဲ့ ဆက်စပ်တဲ့ “ကြောင်အိမ်” ကို
အရောက်သွားပါ
ဒီ အိမ်ကြီးကို ၁၉၀၉ ခုနှစ်မှာ ကုန်သည်ကြီး Mr Blumer ဆောက်လုပ်ခဲ့တာပါ

အိမ်အမိုးထိပ်တစ်ခုစီမှာ ကြောင်နက်တစ်ကောင်ဆီ ထုဆစ် ထားခဲ့တယ် ကြောင်တစ်ကောင်ကို ရှေ့ဘက်မှာ ထုဆစ်ထားခဲ့ပြီး နောက်ကြောင်တစ်ကောင်ကို နောက်ပြန်ထုထားခဲ့တယ်

အဲ့ဒီ့ခေတ်အခါက သွင်းကုန် ထုတ်ကုန် ဌာန က သူ့ကို လုပ်ငန်း ပါမစ် မထုတ်ပေးလို့ အရွဲ့တိုက်ခဲ့တာလို့ သိရတယ်

ဒီလိုပဲ တရားရုံးရောက်ပြီး တရားရုံး အမိန့်အရ ကြောင်အရုပ်ကို ရှေ့ဖက် ပြန်လှည့်ပေးခဲ့ရတယ်
ဒီသမိုင်းကြောင်းကတော့ လူတွေ ပါးစပ်ဖျား ရေပန်းစားခဲ့ပြီး ယနေ့အထိ ပြောစမတ်တွင်နေဆဲပေါ့

မြို့ထဲ လည်ပတ်ပြီးတဲ့အခါ Riga မြို့ရဲ့ စျေးကြီးကို လျှောက်လည်ကြပါတယ်
ဒေသထွက်စာတွေ အသီးအရွက် အသားငါးတွေ ရိုးရာ ပစ္စည်းတွေ အစုံရှိတဲ့ စျေးနေရာပါ
စျေးမြင်ကွင်းရဲ့ အဓိက highlight က အထူးသန့်ရှင်း သပ်ရပ်မှု့ နဲ့ အပြင်အဆင်ပါပဲ

စျေးထဲမှာ တံဆိပ်ကောင်းတွေ မလို့ နာမည်ကြီးတဲ့ငါးဥဗူးတွေ ဝယ်လာဖြစ်တယ်

နေ့လည်စာကို မြို့ဟောင်းမှာ စားကြပါတယ်

နေ့ခင်းပိုင်း ခရီးစဉ်က “Jurmala beach” ဘက်ကို ဦးတည်သွားကြပါတယ်

Jurmala beach က Riga မြို့နဲ့ ၁၅ မိနစ် ကားမောင်းရုံ နဲ့ ရောက်တဲ့ နေရာဖြစ်ပြီးတော့ Baltic Sea ရဲ့ အလှဆုံး နေရာပါ
ပင်လယ် ကမ်းစပ်ကို သွားတဲ့ လမ်းတစ်လျှောက်မှာ ပေ ၈၀ ကနေ ၁၂၀ ပတ်လည် သစ်သားအိမ်ဟောင်း
၂ ထပ် အိမ်တွေ အများကြီး ရှိတဲ့ ရပ်ကွက်ကို ဖြတ်သန်းရပါတယ်
အိမ်ဝယ်ယူသူတွေဟာ ဒီအိမ်ကြီးတွေကို ဖြိုချပြီး အသစ်ဆောက်ခွင့် မရှိပဲ အိမ်ကြီးကို ပြန်ပြင်ပြီးသာ နေခွင့် ရှိတာပါ နေရာ တစ်ခုကို ၁.၆ သိန်း ယူရိုခန့်ပဲ ရှိလို့ ခရီးသွားလုပ်ငန်းမှာ ရင်းနှီးမြုပ်နှံချင်တဲ့သူတွေ အကြိုက်တွေ့မယ့် နေရာပါပဲ

Jurmala ကမ်းခြေရောက်တော့ ရာသီဥတု မကောင်း နေရောက် အားနည်းတော့ ရေကူးတဲ့သူတွေ နည်းပါတယ် သို့ပေမယ့် ကမ်းခြေတစ်လျှောက် ဘောလီဘော ကစားနေကြတဲ့ လူငယ်တွေတော့ အများကြီးပေါ့
အထူးသဖြင့် ပင်လယ်ကို လှမ်းမြင်ရတဲ့ သစ်သား အိမ်ကြီးတွေက တစ်အား ခန့်ညားပါတယ်

ပင်လယ် ကမ်းခြေကို ရောက်တဲ့အခါ သဲအမျိုးအစားက ခရီးသွားကဏ္ဍမှာ အရေးကြီးပါတယ်
အရှေ့တောင် အာရှ နိုင်ငံတွေက နာမည်ရ ကမ်းခြေတွေက သဲတွေရဲ့ အရည်အသွေးကို ကျွန်မ အမြဲ စစ်ဆေးကြည့်မိပါတယ်
ငပလီက သဲတွေရယ် ဘာလီက ကျွန်းသေးသေးလေးတွေက သဲတွေရယ်ဟာ တစ်အားနုပါတယ်
Riga beach က သဲတွေက ကျွန်မ တွေ့ထိ ခံစားဖူးတဲ့ သဲတွေ အားလုံးထဲမှာ အနုဆုံးလို့ပဲ ကျွန်မကတော့ ယူဆပါတယ်

ကမ်းခြေ တစ်လျှောက် ခြေထောက် ရေစိမ် အသက်ရူ လမ်းလျှောက်ပြီးတဲ့ ညနေနှောင်းပိုင်းမှာ Riga မြို့ထဲမှာ ညစာ စားကြပြီးတဲ့အခါ ကျွန်မတို့ တနေ့တာ ခရီးစဉ် ပြီးဆုံးပါပြီ