Good Shepherd Myanmar

ရှင်ပေတရုနှင့် ရှင်ပေါလု တို့၏ပွဲနေ့ကြီး
ဇွန်လ (၂၉) ရက်၊ ၂၀၂၆။

ယနေ့တွင် ကက်သလစ်အသင်းတော်သည် ဧဝံဂေလိတရားအတွက် မိမိတို့၏အသက်ကိုပင် စွန့်လွှတ်သက်‌သေခံခဲ့ကြသော ရှင်ပေတရုနှင့် ရှင်ပေါလု တို့၏ပွဲနေ့ကို ဝမ်းမြောက်စွာ ကျင်းပပါသည်။

ရှင်ပေတရုသည် သခင်ယေဇူးကို သိကျွမ်းသည်ဟု သုံးကြိမ်တိုင် ငြင်းဆိုခဲ့ဖူးသူ ဖြစ်ပြီး၊ ရှင်ပေါလုသည် တစ်ချိန်က ခရစ်ယာန်များကို ညှဉ်းပန်းနှိပ်စက်ခဲ့သူ ဖြစ်ပါသည်။ သို့သော် ရှင်ပြန်ထမြောက်တော်မူသော ခရစ်တော်နှင့် တွေ့ဆုံခြင်း၊ ဘုရားသခင်၏ ကျေးဇူးတော်ကို လက်ခံခြင်းတို့က သူတို့၏အသက်တာကို လုံးဝပြောင်းလဲစေခဲ့ပါသည်။

တစ်ဦးသည် ယုံကြည်ခြင်းအားနည်းခြင်းမှ သစ္စာရှိခြင်းသို့ ပြောင်းလဲခဲ့သလို၊ တစ်ဦးသည် ညှဉ်းပန်းသူမှ ဧဝံဂေလိတရား‌ တော်၏ အကြီးမြတ်ဆုံး သာသနာပြုတစ်ဦးအဖြစ် ပြောင်းလဲခဲ့သည်။ နောက်ဆုံးတွင် သူတို့နှစ်ဦးစလုံးသည် သခင်ယေဇူး၏ အသေခံခြင်းနှင့် ရှင်ပြန်ထ‌ မြောက်ခြင်းကို သက်သေခံရန်အတွက် မိမိတို့၏ အသက်ကိုပင် ပေးဆပ်ခဲ့ကြသည်။
ခရစ်တော်ကို အမှန်တကယ် ဆုံတွေ့သောသူ၏ အသက်တာသည် ကောင်းမွန်ခြင်းသို့ အမြဲပြောင်းလဲနိုင်ပြီး၊ ထိုသို့ပြောင်းလဲခြင်းသည် အခြားသူများအတွက် မျှော်လင့်ခြင်း၏ သက်သေဖြစ်လာနိုင်ပါသည်။

ဤပွဲနေ့တွင် ကျွန်ုပ်တို့လည်း ရှင်ပေတရုနှင့် ရှင်ပေါလုကဲ့သို့ ယုံကြည်ခြင်း၌ ကြည်ညိုခိုင်မာလျက်၊ အသက်ရှင်တော်မူသော ခရစ်တော်၏ သက်သေခံများအဖြစ် နေ့စဉ်အသက်ရှင်နိုင်ရန် ဆုတောင်းကြပါစို့။
ရှင်ပေတရုနှင့် ရှင်ပေါလု၊ ကျွန်ုပ်တို့အဖို့ငှာ ဆုတောင်းပေးတော်မူပါ။ အာမင်။

ကမ္ဘာ့ဒုက္ခသည်များနေ့ | ဇွန်လ (၂၀) ရက်
“Until everyone is safe.”

လူတိုင်းသည် မိမိအိမ်ဟုခေါ်နိုင်သောနေရာတစ်ခု၊ လုံခြုံစွာနေနိုင်သောဘဝတစ်ခုကို လိုလားကြပါသည်။

သိုသော် ကမ္ဘာအနှံအပြားတွင် မိသားစုများစွာသည် မိမိတို၏နေရပ်အိမ်ကိုစွန့်ခွာရခြင်း၊ မသေချာသောလမ်းကြောင်းများကို ဖြတ်သန်းရခြင်း၊ မျှော်လင့်ချက်များကို ရင်ထဲတွင်သာ ဆုပ်ကိုင်ထားရခြင်းတိုကို တွေ့ကြုံနေရဆဲဖြစ်ပါသည်။

ယနေ့တွင် ကျွန်ုပ်တိုသည် ထိုဒုက္ခသည် မောင်နှမများအတွက် အထူးဆုတောင်းပေးကြပါစို။
သူတို၏ ခရီးလမ်းများတွင် လုံခြုံမှုရှိပါစေ။
သူတို၏ နှလုံးသားများတွင် ငြိမ်းချမ်းမှု ပြန်လည်တည်ရှိပါစေ။
သူတို၏ ဘဝများတွင် မျှော်လင့်ချက်အလင်း ပြန်လည်လင်းလက်ပါစေ။

"အိုဘုရားသခင်၊ ဒုက္ခအပေါင်းနှင့် အိမ်ယာမဲ့ခြင်းကို ခံစားနေရသော ဘုရားသခင်၏ သားသမီးများအားလုံးသည်
- လုံခြုံသောနေရာတစ်ခု၊
- ချစ်ခြင်းမေတ္တာရှိသော လူ့အဖွဲအစည်းတစ်ခုနှင့်
- ငြိမ်းချမ်းသော အနာဂတ်တစ်ခုကို ပြန်လည်တွေ့ရှိနိုင်ကြပါစေ။"

အာမင်။

ပဋိပက္ခများအတွင်း လိင်အကြမ်းဖက်မှုများ ပပျောက်ရေး အပြည်ပြည်ဆိုင်ရာနေ့ | ဇွန်လ (၁၉) ရက်

လူတစ်ယောက်၏ ဒဏ်ရာတိုင်းသည် အမြဲတမ်း မျက်စိဖြင့်မြင်နိုင်ကြသည်မဟုတ်ပါ။
တချို့သောဒဏ်ရာများသည် စိတ်နှလုံးထဲ၌ နှစ်ပေါင်းများစွာ တိတ်တဆိတ် နေထိုင်နေတတ်ကြသည်။

- သူတို့သည် စာရွက်ပေါ်ရှိမှတ်တမ်းတင်ထားသော ကိန်းဂဏန်း၊ ဒေတာများသာမဟုတ်ကြပါ။
- သတင်းခေါင်းစဉ်ကြီးတစ်ခုသာ မဟုတ်ကြပါ။
- သူတို့သည် မိသားစုဝင်တစ်ဦး၊ သူငယ်ချင်းတစ်ဦး၊ သားသမီးတစ်ဦး၊ မိခင်တစ်ဦး၊ လူသားတစ်ဦး တို့ဖြစ်ကြပါသည်။

နာကျင်မှုကို ဖျောက်ဖျက်ပစ်လို့ မရနိုင်သော်လည်း သူတို့အားစာနာနားလည်ပေးမှုဖြင့် နာကျင်မှုသည်လျော့ပါးစေနိုင်ပါသည်။ သိမ်ငယ်တိတ်ဆိတ်နေခြင်းများကို ချိုးဖျက်ပေးနိုင်ပါသည်။ သူတို့၌မျှော်လင့်ချက်များကို ပြန်လည်ရှင်သန်စေနိုင်ပါသည်။

ဤနေ့တွင် နာကျင်မှုကို သယ်ဆောင်နေကြသူအားလုံးအတွက် ဆုတောင်းရင်း လူသားတစ်ဦး၏ ဂုဏ်သိက္ခာကို လေးစားတန်ဖိုးထားသော ကမ္ဘာတစ်ခု တည်ဆောက်နိုင်ရန် မျှော်လင့်ကြပါစို့။