Eden Insurance Service

"အသက်အာမခံလျော်ကြေး လိမ်လည်မှု"

မူရင်းတင်ပြသူ Kyaw Kyaw (တောင်ငူ)....

တစ်နှစ်ကျော်ကာလ အတွင်းမှာ ကွယ်လွန်ခဲ့သူ (၃) ယောက် အတွက် အာမခံ လျော်ကြေးငွေ ထုတ်ယူတဲ့သူဟာ တစ်ဦးတည်း ဖြစ်နေတဲ့ ထူးခြားဖြစ်ရပ်တစ်ခု အသက်အာမခံကုမ္ပဏီကြီး တခုမှာ ဖြစ်ပွားခဲ့ပါတယ်။
ပိုပြီး ထူးခြားတာက အဲ့ဒီသူက သူတို့ (၃) ဦးစလုံးရဲ့ ဇနီး ဖြစ်နေတာပါ။ သေဆုံးခဲ့သူ အားလုံးဟာ သူတို့ရဲ့ အသက်အာမခံပေါ်လစီထဲမှာ အကျိုးခံစားခွင့် (ဆက်ခံခွင့်ရှိသူ) နေရာမှာ သူတို့ ဇနီးကို ထည့်ထားခဲ့ကြတာပါ။

ပထမ ခင်ပွန်းဆုံးပါးလို့ အသက်အာမခံလျော်ကြေးငွေ ထုတ်အပြီး ၆ လ အကြာမှာ ဒုတိယခင်ပွန်းအတွက် အသက်အာမခံလျော်ကြေးငွေကို ထပ်မံထုတ်ယူခဲ့ပါတယ်။ နောက် ၆ လလောက်အကြာမှာလည်း တတိယခင်ပွန်းဆုံးပါးသွားလို့ Claim လုပ်ကာ အသက်အာမခံလျော်ကြေးငွေ လာရောက်ထုတ်ယူပြန်ပါတယ်။

အသက်အာမခံကုမ္ပဏီကလည်း ဒီဖြစ်စဥ်ကို သင်္ကာမကင်း ဖြစ်ခဲ့ကြပါတော့တယ်။ ဒါကြောင့် အဆိုပါ Case ကို အသက်အာမခံကုမ္ပဏီက စီမံခန့်ခွဲသူကိုယ်တိုင် ကိုင်တွယ်အဖြေရှာဖို့ ဆုံးဖြတ်လိုက်ပြီး ထိုအမျိုးသမီးနှင့် လက်ထပ်လိုက်ပါတယ်။

အဲ့ဒီချိန်ကစပြီး သူမနဲ့ အတူ သွားလာနေထိုင်ရာမှာ အရာရာကို သတိထားစောင့်ကြည့်နေခဲ့ရပါတယ်။ အခန့်မသင့်လျှင် သူရဲ့အသက်ပါ စတေးရနိုင်တဲ့ အခြေအနေမျိုးပါ။ ဒီကာလအတွင်း အမျိုးသားနာမည်နဲ့ အသက်အာမခံပေါ်လစီတစ်စောင် ထားရှိဖြစ်ခဲ့ပြီး အကျိုးခံစားခွင့်နေရာမှာ သူမကို ထည့်သွင်းခဲ့ပါတယ်။ သူက သူ့ဇနီး ကျွေးမွေးသည့် အစားအသောက်များကိုလည်း စားဟန်ပြုပြီး သိုဝှက်သိမ်းဆည်းကာ ဓာတ်ခွဲခန်းသို့ ပို့ပေးခဲ့ပါတယ်။

အဲ့လိုနဲ့ တစ်လကျော်လောက်မှာ သဲလွန်စ တစ်ခု ရလာပါတော့တယ်။ သူမ ကျွေးသည့် ပေါင်မုန့်မှာ လက်မ တစ်စိတ် (0.1 inch) ခန့် ရှိတဲ့ ဆံပင်စ အနည်းငယ်ကို နေ့စဉ် တွေ့ရခြင်း ဖြစ်ပါတယ်။ ပမာဏ အနည်းငယ်သာ ဖြစ်သော်လည်း အစာအိမ်အတွင်းသို့ နေ့စဉ်ရောက်ရှိလို့ ၆ လအချိန်ဆိုပါက အန္တရာယ်ပေးနိုင်ကြောင်းကို သိရပါတယ်။

(ဆံပင်ကား ခန္ဓာကိုယ်၌ အခိုင်မာဆုံးဖြစ်သည်။ ရုပ်အလောင်းများ၌ အသားအရိုးတို့ ဆွေးမြေ့သည့်တိုင် ဆံပင်များမှာ ခိုင်ခန့်နေဆဲဖြစ်သည်။ ဆံပင် (ကြိုး) အချင်း (0.5) လက်မ ရှိလျှင် အလေးချိန် တစ်တန်ကို ကောင်းစွာ တောင့်ခံနိုင်သည် ဆို၏။)

ဒါကြောင့် သက်ဆိုင်ရာ မှုခင်းတာဝန်ခံများက ယခင် ခင်ပွန်း ၃ ဦးရဲ့ ရုပ်အလောင်းတွေကို ပြန်ဖေါ်ယူစစ်ဆေးကြည့်လိုက်တဲ့အခါ အစာအိမ်နံရံများ၌ ဆံပင်စများစိုက်၍ သေဆုံးခဲ့ခြင်းဖြစ်ကြောင်း စစ်ဆေးတွေ့ရှိခဲ့ရပါတယ်။ ဒီလိုနဲ့ အဆိုပါအမျိုးသမီးကို ကြိုတင်ကြံစည်၍ လူသတ်မှုဖြင့် အရေးယူနိုင်ခဲ့ကြပါတယ်။
Reference: Internet

(၁)
ဖွံ့ဖြို့ပြီး နိုင်ငံတွေမှာ မိသားစုရှိသူတိုင်းအများစုဟာ အနည်းဆုံး အသက်အာမခံ ပေါ်လစီ တစ်စောင်တော့ ရှိထားကြပါတယ်။

(၂)
အသက်အာမခံထားရှိထားခြင်းရဲ့ အကျိုးကျေးဇူးတွေကို ကောင်းကောင်း သိရှိနားလည်ထားကြလို့ အိမ်ထောင်ရှိလာတဲ့အချိန် သားသမီးရလာတဲ့အချိန်တွေမျိုးမှာ အသက်အာမခံဟာ သူတို့အတွက် ကြိုတင်ပြင်ဆင်စရာတစ်ခုဖြစ်ပါတယ်။

(၃)
မိသားစုနောက်ရေးအတွက် အလွန်အရေးပါပြီး Financial Planning လုပ်ရမှာလည်း အသက်အာမခံကို ထည့်သွင်းစဉ်းစားကြပါတယ်။

ဒါကြောင့်လည်း ...
နောက်ဆက်တွဲဖြစ်ရပ်တွေအနေနဲ့ အသက်အာမခံရဲ့အကျိုးခံစားခွင့်တွေအတွက် အချင်းချင်း ခုတုံးလုပ်ကာ မရိုးသားတဲ့ အသက်အာမခံလျော်ကြေးတောင်းခံမှုတွေလည်း ပေါ်ပေါက်နေကြတာပါ။ ဒီလိုအခြေအနေမျိုးတွေ မဖြစ်ပေါ်ဖို့ အာမခံကုမ္ပဏီဘက်က လျော်ကြေးတောင်းခံမှုဖြစ်စဥ်တွေမှာ အတက်နိုင်ဆုံး လိုအပ်တဲ့ အချက်အလက် အထောက်အထားများ ပြည့်စုံအောင် စုဆောင်းစီစစ်ပါတယ်။ ပြည့်စုံမှန်ကန်ပြီဆိုတာနဲ့ လျော်ကြေးပေးချေမှု အမြန်ဆုံး ပေးနိုင်အောင် ဆောင်ရွက်ကြပါတယ်။ ဒါတောင်မှ ယခုလို မရိုးသားတဲ့ လျော်ကြေးတောင်းခံမှုမျိုးတွေဟာ အနည်းနဲ့အများ ရှိနေစမြဲပါပဲ။

မြန်မာနိုင်ငံမှာတော့ အသက်အာမခံရဲ့ အကျိုးကျေးဇူးတွေကို သိရှိမှုနည်းနေ၊ အာမခံထားရှိမှု နည်းနေသေးပြီး တဖက်မှာလည်း မရိုးသားတဲ့ လျော်ကြေးတောင်းခံမှုဖြစ်ရပ်မျိုးတွေ သိပ်မကြားမိသေးပါဘူး။ ရှေ့လျောက် ဖွံ့ဖြိုးတိုးတက်လာတာနဲ့အမျှ ဒီလိုဖြစ်ရပ်မျိုးတွေလည်း ရှိလာနိုင်ပါတယ်။

ခုချိန်မှာတော့ အသက်အာမခံရဲ့ အကျိုးကျေးဇူး အကျိုးခံစားခွင့်တွေကို ပိုမိုသိရှိလာအောင် အသုံးချတက်လာအောင်၊ မိသားစုအတွက် အသက်အာမခံရဲ့ အရေးပါပုံတွေကို ဦးစွာ သိရှိလာအောင် အသိပညာပေး Awareness လုပ်ပေးနေရတဲ့ ကာလတခုပဲ ရှိပါသေးတယ်။

#ကျော်ကျော် (တောင်ငူ)
#အာမခံအကြံပေး