Htet Kaung Kin Total Logistics Solutions

ပို့ကုန်လိုင်စင်
ပြန်လည်လျှောက်ထားရမည်ဟု အသိပေး

ရန်ကုန်၊ မေ ၂
ပို့ကုန်လုပ်ငန်းတွေအားလုံး ပုံမှန်အတိုင်း Automatic Licensing နဲ့ Non-Automatic Licensing စနစ်တို့နဲ့ လျှောက်ထားရယူပြီးမှ ဆောင်ရွက်ရမယ်လို့ ကုန်သွယ်ရေးဦးစီးဌာနက ကြေညာလာပါတယ်။

ကုန်သွယ်ရေးဦးစီးဌာနအနေနဲ့ ပို့ကုန်လိုင်စင်တွေကို Myanmar Tradenet 2.0 နဲ့ ခွင့်ပြုနေခြင်းမှ မတ်လ ၂၈ ရက်နေ့မှာ ဖြစ်ပွားခဲ့တဲ့ မန္တလေးငလျင်ဒဏ်ကြောင့် အင်တာနက်ချိတ်ဆက်မှု စနစ်တွေ ပြတ်တောက်ခဲ့ရတယ်လို့ ဆိုပါတယ်။

အဆိုပါကာလအတွင်း ပို့ကုန်လုပ်ငန်းတွေ အဆင်ပြေချောမွေ့စွာ ဆောင်ရွက်နိုင်ရေးအတွက် ၂၀၂၅ ခုနှစ်၊ ဧပြီလ ၁ ရက်နေ့မှ ၃၀ ရက်နေ့အထိ ပို့ကုန်လိုင်စင်လျှောက်ထားဖို့ မလိုကြောင်း ကြေညာခဲ့ပါတယ်။

ထိုအတွက်ကြောင့် ပို့ကုန်လုပ်ငန်းရှင်တွေအနေနဲ့ အကောက်ခွန်လုပ်ထုံးလုပ်နည်းနဲ့အညီ ထုတ်ကုန်ကြေညာလွှာနဲ့ တိုက်ရိုက်ဆောင်ရွက်ခွင့်ရှိကြောင်း ထုတ်ပြန်ခဲ့ပါတယ်။

ထုတ်ကုန်ကြေညာလွှာ တင်သွင်းသူတွေအနေနဲ့လည်း ထုတ်ကုန်ကြေညာလွှာ တင်သွင်းရာမှာ ကြေညာလွှာရဲ့ Note 1 အကွက်မှာ ကုန်သွယ်ရေးဦးစီးဌာနရဲ့ သတင်းလွှာ (၁/၂၀၂၅) အရ တင်ပို့ခြင်းဖြစ်ပါသည်လို့ ဖော်ပြပြီး ပို့ကုန်လိုင်စင်မပါရှိဘဲ ထုတ်ကုန်ကြေညာလွှာ တင်သွင်းဆောင်ရွက်ခွင့်ရှိခဲ့ကြောင်း သိရပါတယ်။

အခုတော့ ပို့ကုန်လုပ်ငန်းတွေအားလုံး ပုံမှန်အတိုင်း လိုင်စင်လျှောက်ထားရယူပြီးမှ ဆောင်ရွက်ခွင့်ရမှာဖြစ်လို့ တင်သွင်းလိုတဲ့ ထုတ်ကုန်ကြေညာလွှာမှာ လိုင်စင်ဖြည့်စွက်ကြေညာခြင်း၊ လိုင်စင် Balancing ဆောင်ရွက်ခြင်းတို့ကို အရင်လုပ်ငန်းစဉ်တွေအတိုင်း ဆောင်ရွက်ရမယ်လို့ အကောက်ခွန်ဦးစီးဌာန၊ MACCS ဌာနခွဲက ကြေညာထားပါတယ်။

Credit
သတင်း - BETV Business

Whatapps for quick ROQ