Ayar Shwe Pyi

ရန်ကုန်-ဘန်ကောက် ၉ နာရီအရောက်သွားလာနိုင်မည့် လမ်းမစီမံကိန်းကြီး
----------------------------------------------------
ရန်ကုန်မှ ဘန်ကောက်သို့ မော်တော်ယာဉ်ဖြင့် ၉ နာရီအရောက်သွားလာနိုင်မည့် လမ်းမကြီးစီမံကိန်းကို အာရှဖွံ့ဖြိုးရေးဘဏ် (ADB) ချေးငွေ အကူအညီဖြင့် စတင်နေပြီဖြစ်ကြောင်း ဆောက်လုပ်ရေးဝန်ကြီးဌာနမှ သိရသည်။
ပဲခူး-ကျိုက်ထို အမြန်လမ်းမကြီးစီမံကိန်းကို ADB မှချေးယူသော အမေရိကန်ဒေါ်လာ ၄၈၃ ဒသမ ၈ သန်းဖြင့် ဖောက်လုပ်သွားမည်ဖြစ်သည်။ ယင်းစီမံကိန်းပြီးစီးသွားပါက လက်ရှိ ၁၆ နာရီကြာခရီးမှ ၉ နာရီကြာခရီးသို့ ပြောင်းလဲသွားမည်ဖြစ်သည်။
ရန်ကုန်-သီလဝါမှ ထိုင်းနိုင်ငံဘန်ကောက်အထိ မော်တော်ယာဉ်ခရီးမိုင် ၅၇ဝ ခန့်ရှိကြောင်း၊ မြန်မာနိုင်ငံမှ ကျိုက်ထီးရိုးစေတီတော်နှင့် ရွှေတိဂုံစေတီတော်ကို ထိုင်းနိုင်ငံသားများက ဖူးမြော်ရန်ဆန္ဒရှိကြသလို မြန်မာနိုင်ငံသားများကလည်း မြဘုရားကို ဖူးမြော်ချင်ကြကြောင်း၊ ထို့ကြောင့် ဘန်ကောက်မှ ရန်ကုန်သို့ ၉ နာရီနှင့်ရောက်လိုလျှင် ရန်ကုန်-သီလဝါမှ မြဝတီနယ်စပ်အထိ ၄ နာရီခွဲဖြင့် ရောက်ရှိနိုင်ရန်လိုအပ်ကြောင်း၊ ထိုင်းနိုင်ငံဘက်ကလည်း မြဝတီ-မဲဆောက်နယ်စပ်မှ ဘန်ကောက်အထိ ၄ နာရီခွဲနှင့် ရောက်ရှိနိုင်ရန် လိုအပ်ကြောင်းများကို ADB အစည်းအဝေးများတွင် နှစ်နိုင်ငံတာဝန်ရှိသူများက ဆွေးနွေးခဲ့ကြကြောင်း သိရသည်။
သီလဝါဆိပ်ကမ်းမှ ဘန်ကောက်အထိ ယာဉ်မောင်းချိန် ၉ နာရီတည်းဖြင့် သွားလာရာတွင် မြို့များကို ဖြတ်သန်းသွား၍မရနိုင်သောကြောင့် မြို့ရှောင်လမ်းများကို ဖောက်လုပ်နေခြင်းဖြစ်ပြီး ယခုအခါ ဖောက်လုပ်ဆဲ မြို့ရှောင်လမ်းအချို့သည် ပြီးစီးတော့မည်ဖြစ်သည်။
''မြို့တွေထဲကသွားရင် ရန်ကုန်မြို့အထွက် ထောက်ကြန့်ကတည်းက ယာဉ်ကြောပိတ်ဆို့မှုကို စတင်ကြုံရမှာဖြစ်တယ်၊ မော်တော်ယာဉ်တွေ၊ မော်တော်ဆိုင်ကယ်တွေ၊ အနှေးယာဉ်တွေနဲ့ ရောထွေးပြည့်နှက် နေတဲ့ အခြေအနေဖြစ်တော့ ၉ နာရီတည်းနဲ့ သွားလာဖို့ဆိုတာမဖြစ်နိုင်ဘူး။ ဒါကြောင့် ပဲခူး-ကျိုက်ထို အမြန်လမ်းမကြီးအပြင် အခြားမြို့ရှောင်လမ်းတွေလည်း ဖောက်လုပ်ဖို့လိုအပ်လာတာပါ။ အခုကျိုက် ထိုမြို့ရှောင်လမ်းဖောက်လုပ်နေတာ မြေသားလုပ်ငန်းတော့ ပြီးစီးသွားပြီ။ မကြာခင်မှာ လေးလမ်းသွားလမ်း အဖြစ် ပေါ်ထွန်းလာတော့မယ်''ဟု ဆောက်လုပ်ရေးဝန်ကြီးဌာန လမ်းဖောက်လုပ်ရေးမှ အင်ဂျင်နီယာ တဦးကရှင်းပြသည်။ ထို့အပြင် သထုံမြို့ရှောင်လမ်းကို ဒုံသမိတံတားမှစကာ သထုံမြို့၊ ကျိုက်ကော် သိမ်ဆိပ်တို့ကိုရှောင်ကွင်း၍ ဘီးလင်းမြို့အနီးမှ ဖောက်လုပ်သွားမည်ဟုလည်းဆိုသည်။
ရန်ကုန်-ဘန်ကောက် အမြန်လမ်းမကြီးပြီးစီးသွားလျှင် ရန်ကုန်မြို့ အရှေ့ဘက်အခြမ်းရှိ သန်လျင်၊ သုံးခွ၊ ခရမ်းမြို့နယ်များ၊ သနပ်ပင်၊ ပဲခူး၊ ကျိုက်ထိုမြို့တို့သည် စီးပွားရေးစင်္ကြံလမ်းမအသစ်အဖြစ် ပေါ်ထွက် လာမည်ဖြစ်ပြီး လက်ရှိဖွံ့ဖြိုးပြီးဖြစ်သော ရန်ကုန်၊ ထောက်ကြန့်၊ လှည်းကူး၊ အင်းတကော်၊ ပဲခူးစင်္ကြံ လမ်းပိုင်းနှင့် ဟန်ချက်ညီစွာ ဖွံ့ဖြိုးလာမည်ဖြစ်သည်။ အဆိုပါလမ်းပိုင်း၏ အကျိုးကျေးဇူးကြောင့် ရန်ကုန်တိုင်း GDP သည် မြန်မာနိုင်ငံ GDP တွင် ၃၃ ရာခိုင်နှုန်းအထိပါဝင်လာနိုင်မည်ဖြစ်ပြီး နိုင်ငံအတွင်းဆက်စပ် သွားလာမှုသာမက ကုန်သွယ်မှုပမာဏတွင်လည်း တနှစ်လျှင် ပျမ်းမျှအမေရိကန်ဒေါ်လာ ၅ ဒသမ ၄ ဘီလီယံ ရှိလာမည်ဖြစ်သည်။
မြန်မာနိုင်ငံ ဒုတိယအများဆုံး ကုန်သွယ်ဘက် ထိုင်းနိုင်ငံနှင့် မဟာမဲခေါင်ဒေသတွင်းနိုင်ငံများဖြစ်ကြသော လာအို၊ ကမ္ဘောဒီယား၊ ဗီယက်နမ်နိုင်ငံများကပါ မြန်မာနိုင်ငံအတွင်းဖြတ်သန်း၍ သီလဝါဆိပ်ကမ်းမှတဆင့် အခြားပြည်ပနိုင်ငံများသို့ ကုန်စည်များလွယ်လင့်တကူ စီးဆင်းနိုင်မည်ဖြစ်သောကြောင့် နိုင်ငံဖြတ်ကျော် ကုန်သွယ်မှုများနှင့် သယ်ယူပို့ဆောင်ရေးလုပ်ငန်းများကြောင့် လမ်းဖြတ်သန်းသွားလာအသုံးပြုခများ၊ အခြား အခွန်အခများလည်း ရရှိလာမည်ဖြစ်ကြောင်းသိရသည်။
၎င်းစီးပွားရေးစင်္ကြံလမ်းမအသစ်ကြီးနှင့်အတူ လမ်းဘေးဝဲယာတွင် စီးပွားရေးဇုန်များ၊ သိုလှောင်ရုံများနှင့် ကုန်းတွင်းဆိပ်ကမ်း (Dry Port) များလည်းပေါ်ပေါက်လာနိုင်ပြီး အလုပ်အကိုင်အခွင့် အလမ်းများစွာ ရရှိလာနိုင်ကြောင်း သုံးသပ်နေကြသည်။
Crd..
ခရမ်းစိုးမြင့်

Music Zone မြေနေရာကို နိုင်ငံတော်ပိုင်မြေအဖြစ် ပြန်လည်သိမ်းဆည်း
--------------------------------------------------
Music Zone မြေနေရာကို နိုင်ငံတော်ပိုင်မြေအဖြစ် ပြန်လည်သိမ်းဆည်းလိုက်ပြီဖြစ်ကြောင်းသိရသည်။
ဒီဇင်ဘာ၂၄ရက် သင်္ဃန်းကျွန်းမြို့နယ် ပြည်သူ့လွှတ်တော်ကိုယ်စားလှယ် ဦးရွှေလှဝင်းနှင့်သီးသန့်တွေ့ဆုံမေးမြန်းရာတွင် Dwave သတင်းဌာနသို့ တရားဝင်ပြောကြားခဲ့သည်။
"မြူးဇစ်ဇုန်ကေတီဗွီ ကိစ္စ လွှတ်တော်မှာ ကျွန်တော်မေးမြန်းတာကို ဝန်ကြီးဌာနက ဒီဇင်ဘာ ၁ရက်နေ့မှာ ဖြေကြားပါတယ်။အဲဒါကို လွှတ်တော်ကအကြောင်းကြားတဲ့စာကတော့ ကျွန်တော့်ဆီ ဒီဇင်ဘာ ၂၃ရက် မနေ့ကရောက်ပါတယ်။ ဝန်ကြီးဌာနကဖြေကြားစာထဲမှာပါတဲ့အရဆိုရင် ပြည်ထောင်စုကြံ့ခိုင်ဖွံဖြိုးရေးအသင်းအနေဖြင့်လျှောက်ထားပြိးနောက်ပိုင်းတွင် နိုင်ငံရေးပါတီအဖြစ်သို့ပြောင်းလဲဖွဲ့စည်းသွားခြင်း၊ အသင်း၏မူလဖွဲ့ ရည်ရွယ်ချက်ဖြစ်သော လူမှုရေးလုပ်ငန်းများ ဖော်ဆောင်ခြင်းမပြုဘဲ ပုဂ္ဂလိကလုပ်ငန်းများတို့ကို ထပ်ဆင့်ငှားရမ်းထားခြင်းတို့ကြောင့် ရန်ကုန်တိုင်းဒေသကြိးအစိုးရအဖွဲ့နှင့်ဆောက်လုပ်ရေးဝန်ကြီးဌာနတို့၏ မူဝါဒ လမ်းညွှန်များဖြင့်မြေအသုံးပြုခွင့်အားရပ်စဲပြီးအစိုးရမြေအဖြစ် ပြန်လည်သတ်မှတ်၍ မြေစီမံခန့်ခွဲမှုလုပ်ငန်းများကို ဆောင်ရွက်သွားမည်ဖြစ်ပါကြောင်း ကျွန်တော်တို့ပြန်ကြားပါတယ်''ဟု ၎င်းကပြောသည်။
မြူးဇစ်ဇုန်မြေနေရာသည် တရားမဝင်ကြောင်းကို ကိုဗစ်ဒုတိယလှိုင်းတွင် ကေတီဗွီဖွင့်လှစ်ရာမှ ကိုဗစ်ရောဂါပိုးကူးစက်မှုကြောင့် လူအများမှသိရှိလာခဲ့ခြင်းဖြစ်သည်။
၎င်းမြူးဇစ်ဇုန်နှင့် ဆက်စပ်၍ ကိုဗစ်ရောဂါပိုးကူးစက်ခံရသူလူ၉၀ကျော်ရှိခဲ့ပြီး ၎င်းပိုင်ရှင် ဦးဇော်မင်းနှင့်ဆိုင်မန်နေဂျာကို သဘာဝဘေးအန္တရာယ်စီမံခန့်ခွဲမှုဥပဒေဖြင့် အမှုဖွင့်အရေးယူခဲ့သည်။
-D-Wave- မှကူးယူဝေမျှဖော်ပြပါသည်။

ဒီဇင်ဘာလအတွင်း ပြည်တွင်း အမေရိကန်ဒေါ်လာ ငွေလဲလှယ်နှုန်း တဖြည်းဖြည်းပြန်တက်လာပြီး ဒီနေ့ ၁၆ ရက်နေ့မှာတော့ လဲလှယ်နှုန်း အမေရိကန် ၁ ဒေါ်လာကို ၁၃၇၀ ကျပ်နဲ့ KBZ bank ကနေ ကြေငြာထားပါတယ်။

ရပ်နားထားတဲ့ ပြည်တွင်းလေကြောင်းလိုင်းတွေ စတင်ပြန်လည်ပြေးဆွဲ
---------------------------------------------
ကိုဗစ် ၁၉ ကပ်ရောဂါ ကြောင့် စက်တင်ဘာ လတည်းက ရပ်နားထားတဲ့ ပြည်တွင်းလေကြောင်းလိုင်းတွေ ဒီဇင်ဘာ၁၆ရက်မှာပြန်လည်စတင်ပြေးဆွဲနေပါပြီ။
ပထမဆုံးခရီးစဉ်အဖြစ် Air kBZ လေကြောင်းလိုင်းက ရန်ကုန်-မြိတ် ခရီးစဉ်ကိုပြေးဆွဲခဲ့တာဖြစ်ပြီး ခရီးသည် ၁၂ ဦး ပါဝင်ခဲ့ပြီး မြိတ်ကနေ ရန်ကုန်ကိုပြန်စီးလာသူတွေလည်းရှိခဲ့ပါတယ်။
ဒါ့အပြင် ရန်ကုန်-စစ်တွေခရီးစဉ်ကိုလည်း Air KBZ ကဒီကနေ့မှာပြေးဆွဲခဲ့ပါတယ်။
မြန်မာအမျိုးသားလေကြောင်းလိုင်းကလည်း ရန်ကုန်-လွိုင်ကော်-ဟဲဟိုး-ကျိုင်းတုံ ခရီးစဉ်ကို ပြေးဆွဲခဲ့ပါတယ်။
ခရီးသည်တွေဟာ ၃၆ နာရီ အတွင်းစစ်ဆေးထားတဲ့ ကိုဗစ်၁၉ကင်းရှင်းကြောင်း ထောက်ခံချက်ပါမှလေယာဉ်စီးနင်းခွင့်ရမှာလည်းဖြစ်ပါတယ်။
-ဘီဘီစီမြန်မာပိုင်း-