The Knowledge Vault
Share
31/01/2025
ဂရင်းလန် (သို့မဟုတ်) ကမ္ဘာ့အကြီးဆုံးကျွန်း
ဂရင်းလန်ကျွန်းသည် ကမ္ဘာ့အကြီးဆုံးကျွန်းဖြစ်ပြီး မြောက်အမေရိကတိုက်၏ အရှေ့မြောက်ဘက်တွင် တည်ရှိပါတယ်။ ဒိန်းမတ်နိုင်ငံ၏ ကိုယ်ပိုင်အုပ်ချုပ်ခွင့်ရဒေသဖြစ်သော်လည်း ပထဝီဝင်အနေအထားအရ မြောက်အမေရိကနှင့် ပိုမိုနီးစပ်ပါတယ်။ ဂရင်းလန်ကျွန်းသည် ကျယ်ပြန့်သောရေခဲပြင်များ၏ သဘာဝအလှတရားများကြောင့်ထင်ရှားပြီး ကမ္ဘာ့အအေးဆုံးနေရာများထဲမှ တစ်ခုအပါအဝင်ဖြစ်ပါတယ်။
ဂရင်းလန်ကျွန်း၏ ဧရိယာသည် ၂.၁၆ သန်း စတုရန်းကီလိုမီတာကျယ်ဝန်းပါတယ်။ ကျွန်း၏ ၈၀% ခန့်သည် ရေခဲပြင်များဖြင့် ဖုံးလွှမ်းနေပါတယ်။ ဂရင်းလန်ကျွန်း၏ အမြင့်ဆုံးတောင်မှာ Gunnbjorn Fjeld ဖြစ်ပြီး ၃,၇၀၀ မီတာမြင့်ပါတယ်။
ဂရင်းလန်ကျွန်း၏ ရာသီဥတုသည် အလွန်အေးပြီး ဆောင်းရာသီတွင် အပူချိန်သည် အနုတ်၅၀ ဒီဂရီစင်တီဂရိတ်အထိ ကျဆင်းနိုင်ပါတယ်။ နွေရာသီတွင်မူ နေရောင်ခြည်ရရှိပြီး အပူချိန်သည် ၁၀ ဒီဂရီစင်တီဂရိတ်ခန့်သာ ရှိပြီး ကျွန်း၏ တောင်ပိုင်းဒေသများတွင် ရေခဲများ အရည်ပျော်လေ့ရှိပါတယ်။
ဂရင်းလန်းကျွန်းသည်အေးမြတဲ့ရာသီဥတုရှိပေမယ့် နွေရာသီတွင် မြက်ပင်၊ မှော်ပင်နဲ့ ချုံပုတ်ပင် အချို့ကို တွေ့နိုင်ပါတယ်။။ ဒါ့အပြင် ဝင်ရိုးစွန်းဝက်ဝံ၊ ဖျံ၊ ဝေလငါးနဲ့ အာတိတ်မြေခွေးတွေလို တိရစ္ဆာန်တွေလည်း ရှိပါတယ်။
ဂရင်းလန်ကျွန်း၏ လူဦးရေသည် ၅၆,၀၀၀ ခန့်သာရှိပြီး အများစုမှာ ကျွန်းတွင် နှစ်ပေါင်း ထောင်ချီကာ နေထိုင်ခဲ့သော ဌာနေတိုင်းရင်းသား Inuit
လူမျိုးများဖြစ်ပြီး ကမ်းရိုးတန်းဒေသများတွင် နေထိုင်ကြပါတယ်။ Nuuk မြို့သည် ဂရင်းလန်ကျွန်း၏ မြို့တော်ဖြစ်ပြီး အကြီးဆုံးမြို့လည်းဖြစ်ပါတယ်။ဂရင်းလန်းကျွန်းတွင် မြို့ရွာများကို ကားလမ်းမီးရထားလမ်းများ ဖြင့်ဆက်သွယ်ထားခြင်း မရှိပါ။ ထိုသို့မရှိခြင်းမှာ မြေမျက်နှာသွင်ပြင်ကြမ်းတမ်းသောကြောင့် ဖြစ်ပါတယ်။ ခရီးသွားလာမှုကို အများအားဖြင့် လှေ၊ လေယာဉ် သို့မဟုတ် ခွေးစွတ်ဖားလှည်း ဖြင့်ပြုလုပ်ကြပါတယ်။
ဂရင်းလန်းကျွန်းသားများတွင် ထူးခြားသော ယဉ်ကျေးမှုများ ပိုင်ဆိုင်ကြပါတယ်။ အများစုမှာ ငါးဖမ်းခြင်း၊ အမဲလိုက်ခြင်းကဲ့သို့သော ရိုးရာလုပ်ငန်းများကို ဆက်လက်လုပ်ကိုင်နေကြပါတယ်။ ရုံးသုံးဘာသာစကားများမှာ ဂရင်းလန်းဘာသာနှင့် ဒိန်းမတ်ဘာသာဖြစ်သော်လည်း အင်္ဂလိပ်ဘာသာစကားကိုလည်း ပြောဆိုနိုင်ကြပါတယ်။
ဂရင်းလန်ကျွန်း၏ စီးပွားရေးသည် ငါးဖမ်းလုပ်ငန်း၊ သတ္တုတူးဖော်ရေးနှင့် ခရီးသွားလုပ်ငန်းတို့အပေါ် အဓိကမှီခိုနေပါတယ်။ ဂရင်းလန်းကျွန်း၏ ရေခဲမြစ်များ၊ ရေခဲတောင်များနှင့် သဘာဝတောရိုင်းတိရစ္ဆာန်များကို ကြည့်ရှုလိုကြသော ခရီးသွားများကြောင့် ကျွန်း၏ခရီးသွားလုပ်ငန်းမှာ တိုးတက်နေပါတယ်။
ဂရင်းလန်ကျွန်းသည် သဘာဝအလှနှင့် ထူးခြားသော ယဉ်ကျေးမှုတို့ဖြင့် ပြည့်နှက်နေသော ဒေသဖြစ်ပါတယ်။ သို့သော် ရာသီဥတုပြောင်းလဲမှုနှင့် သဘာဝပတ်ဝန်းကျင် ထိခိုက်မှုများကြောင့် ဂရင်းလန်ကျွန်း၏ အနာဂတ်မှာ စိန်ခေါ်မှုများလည်း ရင်ဆိုင်နေရပါတယ်။
Click here to claim your Sponsored Listing.
Category
Website
Address
Yangon
