phyu

ချစ်ခြင်းမေတ္တာမှာ
ညာလို့မရတာဟာ ပူပန်စိတ်ပဲ

ရာသီဥတု ပူတာက စပြီး
မုန်တိုင်းသတင်း ရှိတာအထိ
သူအဆင်ပြေပါ့မလားလို့ တွေးပူမိတယ်။

-ဖရော်ဆန်

အသက်တမျှ

လောကရေစီးကကြမ်းတယ်
မင်းက ငါးကလေးဆိုရင်တောင်
ငါစိတ်ပူနေမှာပါပဲ။

- ကေဇဝင်း

ကြယ်၊
ချစ်ခြင်းမေတ္တာ၊
ငြိမ်းချမ်းရေး၊
ကိုယ့်အရပ်နဲ့ မမှီတဲ့အရာတွေ
ချစ်မိပြီ။

-သုခမိန်လှိုင်

ဝေးပြီးနောက် သတိရခြင်းဟာ အနာဟောင်းလိုပဲ မိုးရွာတဲ့အခါ တိုင်းတစ်ဆစ်ဆစ်ကိုက်တယ်
ဖရော်ဆန်

အသည်း
အဆီဖုံးမှာပေါ့
ချစ်တမ်း မုန်းတမ်း ကစား
အထက်တန်စား
ရေပေါ်ဆီကိုမှ သွားချစ်တာကိုး။

_ဝင်းမြင့်

အဖေများနေ့အမှတ်တရ

​အမေ့နို့ရည်စက်တွေကိုမြင်ပြီး
အဖေ့ရဲ့ချွေးစက်တွေကိုမမြင်ခဲ့မိတာတောင်းပန်ပါတယ်အဖေ။
ကျွန်တော်တို့မိသားစုရဲ့ မဟာတံတိုင်းကြီးဟာအဖေပါလို့ပြောရင် ကျွန်တော်သံသယကင်းကင်းနဲ့ယုံနိုင်ပါပြီ။
အဖေ့ကိုချစ်တယ်မပြောရဲတာ ခွင့်လွှတ်ပါအဖေ။

-ကီရို

သူစိတ်ညစ်တဲ့အကြောင်း
ကြားတဲ့အခါ ကိုယ်ပါ စိတ်မောရပြီး
သူ့ရယ်သံတွေကို ကြားရတဲ့အခါ
ကိုယ်ပါ လိုက်ပြုံးမိတာဟာ
ချစ်ခြင်းမေတ္တာပဲ ။

-လင်းညီ

ခန္ဓာနဲ့ ဓနကိုသာ
အခြေပြုတည်ဆောက်ထားတဲ့
ချစ်ခြင်းတွေကြားမှာတော့
ငါတို့လိုကောင်တွေရဲ့
နံရိုးတစ်ချောင်းဟာ လစ်လပ်မြဲ ။

-ဇွဲမာန်ဦး

'ကိုယ်ရှိတယ်နော်'
အဲ့ဒီစကားလေးဟာ
အတော်လေးနွေးထွေးရတယ်။

လူဆိုတာ အနွေးဓာတ်လိုပါတယ်
ပင်ပန်းတာတွေ ဖြေဖျောက်ဖို့
ပျော်ရွှင်စရာတွေ မျှဝေခံစားဖို့
‌တစ်ယောက်အတွက် တစ်ယောက်က ရှိနေပေးတာဟာ
တကယ် ကြည်နူးစရာပါပဲ....။

-Leo

ပိုင်ဆိုင်မှာကို ပြပါဆိုရင်တော့
ဘာမှမရှိပါဘူး။ ဒါပေမဲ့...

ပိုင်ဆိုင်ချင်တာကို ပြပါဆိုရင်တော့
မင်းကိုပဲ လက်ညိုးထိုးပူဆာမိလိမ့်မယ်။

-Leo

သူမကဗျာ ကျွန်တော့်ရဲ့ထီလက် မှတ်လေးလိုဘဲ ဖြစ်နိုင်ခြေ နည်းပေမဲ့ တယုတယလေးနဲ့ သိမ်းထားမိဆဲဘဲ။

-Leo

ဟိုဟာလမ်းညွှန်
ဒီဟာလမ်းညွှန်
လမ်းညွှန်စာအုပ်တွေအလယ်မှာ
ကိုယ်သွားရမယ့်လမ်းကို
ကိုယ့်ဟာကိုယ်ပဲ ရှာဖွေရွေးချယ်ခဲ့ပါတယ်။

- လှသန်း