PDF Insight

အမျိုးအစားသစ်တပ်မတော်နဲ့ ပြန်ပေးဂိုဏ်းစစ်တပ်

(၁ )ရက်နေ့ထုတ် ဂျပန်နိုင်ငံက ရိုမီယူရီသတင်းစာမှာ " စစ်တပ်ဟာ ဒေါ်အောင်ဆန်းစုကြည်ကို အဆုံးအထိ လွှတ်ပေးရန်ရည်ရွယ်ချက်မရှိဘူးလို့ ကျွန်တော်တို့ယုံကြည်ကြောင်း " SCEF ခေါင်းဆောင်များက ပြောတာကို ဖော်ပြခဲ့တာဖြစ်တယ်၊ စစ်အစိုးရရဲ့ ၂၀၀၈ ခုနှစ် ဖွဲ့စည်းပုံအောက်မှာ နိုင်ငံတည်ဆောက်လို့ မရပါဘူး၊ ဒေါ်အောင်ဆန်းစုကြည်နဲ့ပူးပေါင်းပြီး ဖက်ဒရယ်နိုင်ငံသစ်တစ်ခု တည်ဆောက်သွားမှာပါလို့ SCEF ခေါင်းဆောင်များကပြောသွားတာပါ၊ ဒီစကားတွေက မင်းအောင်လှိုင်ရဲ့ TIME မဂ္ဂဇင်းနဲ့ တွေ့ဆုံပြီး မြင်းအီးပေါက်သလို တတွတ်တွတ် တဖွတ်ဖွတ် ပြောသွားတာတွေအပြီးမှာ ပေါ်ထွက်လာတဲ့ သတင်းဖြစ်ပါတယ်၊ သူကအဲသလို ပေါက်ပန်းစျေး ပြောနေတာတာတွေကို TIME က ဘယ်ဖော်ပြပါ့မလဲ၊ အဲတော့ စိတ်ဆိုးပြီး သူပြောတာတွေ သူပိုင်တဲ့မီဒီယာတွေက ပြန်ဖော်ပြတယ်၊ အဲတော့မှ ပိုဆိုးတော့တာ၊ သူ့က တိုင်းသူပြည်သားတွေအပေါ် ဖခင်လိုသဘောထားဆက်ဆံတယ်ဆိုပဲ၊ ပြည်သူတရပ်လုံးက ဒေါ်အောင်ဆန်းစုကြည်ကို အမေတယောက်လို တန်ဖိုးထား လေးစားသမှုနဲ့ အမေစုလို့ ခေါ်ကြတာကို ကြိတ်ပြီး မနာလိုနေပုံရပါတယ်။

မင်းအောင်လှိုင်ပြောတာတွေရဲ့ အနှစ်ချုပ်ကို သုံးသပ်ရင် သူတို့ဟာ စစ်တပ်အသွင်ဆောင်ထားတဲ့ ပြန်ပေးဂိုဏ်းကြီးတခုသာဖြစ်တာ ပေါ်လွင်နေပါတယ်၊ ပထမတချက်အနေနဲ့ ဒေါ်အောင်ဆန်းစုကြည် လွတ်မြောက်ရေးက သူ့အပေါ်မှာသာ မူတည်ကြောင်းပြောတယ်၊ အဓိပ္ပါယ်က အမေစုက နွေဦးတော်လှန်ရေးကို မထောက်ခံပါဘူးလို့ ပြောစေချင်တာ၊ အဲဒါဆိုလွှတ်ပေးမယ်ပေါ့၊ အဲဒါဆို မဲစာရင်းမှားတာတို့ ဘာတို့ဆိုတာတွေက အလကားပြောတာပေါ့၊ နောက်တချက်အနေနဲ့ " ဒေါ်အောင်ဆန်းစုကြည် လွတ်ငြိမ်းချမ်းသာခွင့်ရနိုင်ဖို့ကတော့ ကျွန်တော်တို့ဘက်ကလဲ ပြန်စဥ်းစားရမယ့် အကြောင်းရင်းတွေ ပေါ်လာရင်တော့ အပြောင်းအလဲရှိနိုင်တာပေါ့ " လို့ပြောသွားတာ၊ ဒါကတော့ တိုင်းမ်မဂ္ဂဇင်းကတဆင့် US အစိုးရကို ထည့်လိုက်တဲ့ စကားပေါ့၊ US ဘက်ကသာ ဆန်ရှင်တွေဖြုတ် သူ့ကို နိုင်ငံ့ခေါင်းဆောင်ကြီးတယောက်လို အသိမှတ်ပြုဆက်ဆံခဲ့မယ်ဆိုရင်, -- ဆိုတာနဲ့ ရပ်ထားပြီး မျှားတဲ့သဘော၊ စစ်တပ်က ပြန်ပေးသမားလိုလုပ်နေတာက ကြာပါပြီ၊ အားလုံးလဲသိနေကြပေမယ့် ဒီတခါကတော့ သူတို့ကိုယ်တိုင်က ဝန်ခံလိုက်တဲ့သဘော ဖြစ်သွားတာပါပဲ။

တကယ်ကတော့ အဲဒါတွေရလဲ အမေစုကိုတော့ လွှတ်မှာမဟုတ်ပါဘူး၊ ပြန်ပေးသမားတွေလိုပါပဲ၊ ငွေလဲရရော ရှင်းပစ်လိုက်တာမျိုး၊ အသက်အရွယ် ကျန်းမာရေး အကြောင်းအမျိုးမျိုးး ပြလို့ရတာပဲမဟုတ်လား၊ ဒါကြောင့် SCEF ကသူတို့မှာ အမေစုကိုပြန်လွှတ်ဖို့ ရည်ရွယ်ချက်မရှိဘူးလို့ပြောတာ၊ သူတို့ထဲက ခေါင်းမာဂိုဏ်းတွေဖြစ်တဲ့ စိုးသိန်း၊ ခင်ရီ အုပ်စုတွေက အမေစုကို သူတို့ရဲ့ သေမင်းတမန်လို့ ယူဆထားကြတာ၊ သိန်းစိန် သန်းရွှေနဲ့ တပ်ထွက်တွေအားလုံးလဲ ဒီသဘောပါပဲ ၊ NLD ပြန်မလာနိုင်တော့ဘူးလို့ ခင်ရီက ဂုဏ်ယူစွာပြောခဲ့တာ မှတ်မိကြမယ်ထင်တယ်၊ ဒါကြောင့်ပဲ ဒီစာမျက်နှာမှာ အမေစုကို မိမိတို့လက်နဲ့သာ ကယ်တင်နိုင်မှာလို့ပြောခဲ့တာပါ၊ SCEF ခေါင်းဆောင်များကလဲ အမေစုနဲ့ လက်တွဲပြီး ဖက်ဒရယ်ပြည်ထောင်စုတည်ဆောက်မယ်လို့ ကမ္ဘာသိပြောခဲ့တာဖြစ်တယ်။

တကယ်တော့ စစ်တပ်ပြန်ပေးဂိုဏ်းကြီးရယ် သူနဲ့နွယ်တဲ့ပြန်ပေးဂိုဏ်းအငယ်တွေက တနိုင်ငံလုံး စိုးမိုးနေတာဖြစ်တယ်၊ သဌေးလဲမနေရ၊ ဆင်းရဲသားလဲမနေရ၊ ဆက်ကြေးပေး နေကြရတာဖြစ်တယ်၊ လုပ်ငန်းရှင်တယောက်ဆိုရင် မဟုတ်မှန်းသိသိနဲ့ PDF ကိုကူညီတယ်ဆိုတာမျိုးနဲ့ အဖမ်းပြလိုက်တော့ သိန်းတထောင်လောက်ပေးပြီး ပြန်ရွေးလိုက်ရပါလား၊ စစ်မှုထမ်းကင်းလွတ်ကြေး ပေးနေရတဲ့ ရွာသားတွေ သောင်းနဲချီ ရှိနေတယ်၊ အားလုံးက ငွေမပေးရင် ဖမ်းမယ်၊ ဒုက္ခပေးမယ်ဆိုတာမျိုး ခြိမ်းခြောက်ခံနေရတာဖြစ်တယ်၊ တပ်ရင်းတွေက လူပြည့်အောင် လူဝယ်တယ်၊ အဲဒါကို တပ်ထွက်တွေက ပျူတွေ လူမိုက်တွေနဲ့ပေါင်းပြီး မြို့ပေါ်က လူငယ်တွေလိုက်ဖမ်းပြီး ပြန်ရောင်းစားတယ်၊ ဒီလိုနိုင်ငံမျိုးကမ္ဘာမှာ ရှိပါ့မလား၊ ပြည်သူကို ဖခင်သဘွယ် အုပ်ချုပ်တယ်တဲ့ ခွေးပါးစပ်က နတ်စကားထွက်။

စစ်တပ်နဲ့ပေါင်းသူတွေရဲ့ဒုက္ခကလဲမသေးဘူး၊ NLD အလာဂျီဖြစ်ပြီး ဖောင်းထု၊ တချို့ခွဲထွက်၊ နောက်တော့ မင်းအောင် လှိုင် ဖိနပ်သွားပြီး လျာနဲ့လျက်ကြ၊ အဲဒီလူတွေလဲ စစ်တပ်က သုံးလို့ရသလောက်သုံးပြီးနောက်ဆုံးတော့ လုံခြုံရေးအကြောင်းပြပြီး အကျယ်ချုပ်ကျသွားတာပဲ၊ ဦးခင်မောင်ဆွေ ဦးသိန်းညွန့် အေးနုစိန် အားလုံး အကျယ်ချုပ်ပါပဲ၊ ကေကျုလဲ မကြာသေးဘူး သူ့ပါတီညီလာခံတောင် သွားတက်လို့မရတော့၊ အသံတလုံးမှ ထွက်ခွင့်မရတာ၊ ကဲ မှတ်ပြီလားလို့ပဲ မေးရတော့မယ်၊ အဖွားကြီးက ရှေ့ကပိတ်နေလို့ ကျွန်တော်တို့ လုပ်လို့မရတာဆိုတဲ့ ကေကျု၊ မိုးဟိန်းလို အရှက်မရှိပြောမယ်ဆိုရင်တော့ မောင်ကိုကိုကြီးအသံ ပြန်ကြားရပါမယ်၊ ဒါလဲ တစ်ခါနှစ်ခါပေါ့ ပြောစရာကုန်ရင် အကျယ်ချုပ် ပြန်နေပဲဖြစ်မှာပါ။

တပ်က လူဟောင်းတွေဆိုတာကတော့ အခွင့်ရေးလေး နေရာလေးပေးလိုက်ရင် ဂွေးတက်အောင် ကကြတော့တာပဲ၊ အခု ဦးအောင်မင်းဆိုရင် ဦးမူတူးဆေးဖောတို့နဲ့ ငြိမ်းဖိုရမ်ဆိုလား ပျော်ပျော်ကြီး ကျင်းပနေကြတာ၊ NCA ဟာ မားသားလောမို့ ဖျက်လို့မရဘူးဆိုပဲ သူက၊ သူ့အဖေက မားသားလောရော ဖားသားလောရော အကုန်ဖျက်ခဲ့တာ မေ့သွားပြီထင်တယ်၊ ၂၀၀၈ ချိုးဖောက်တာရော ၊ NCA ပျက်အောင်လုပ်တာရော စစ်တပ်ကလုပ်ခဲ့တာပဲ၊ ၄၇ ဥပဒေဖျက်တာ၊ မဆလဥပဒေဖျက်တာ သူတို့ပဲလေ၊ စစ်တပ်အာဏာ အသက်ဆက်ရေး၊ တပ်ချုပ်တယောက် အာဏာမြဲရေးအတွက် မားသားလောရဲ့ အမေဆိုလဲ ဖျက်မှာပါပဲ၊ (အာဏာရရေးကလွဲလို့ ဘာမူမှမရှိဆိုတာက စစ်တပ်ရဲ့မူပဲ)၊ တနေ့ကလားပဲ သက်ထွေးနိုင်ပို့စ်မှာ တော်လှန်ရေးအောင်နိုင်လားဆိုပြီး အရေမရအဖတ်မရတွေ ပြောကြတာတွေ့လိုက်တယ်၊ အဲဒီတပ်ထွက်က တပွဲမှမနိုင်တဲ့ စစ်တပ်က မုချအောင်ပွဲခံမှာလို့ ဆိုသဗျား၊ ပညာရှင်လိုလိုဘာလိုလို တယောက်ကတော့ ဘယ်ဘက်ကမှ မကောင်းသယောင်ပေါ့လေ ဆရာကြီးအထာနဲ့၊ ကျန်တယောက်ကလဲ NUG ဖောင်းထုဖို့သာ နှုတ်သွက်တာ၊ ဒီမှာတော့ တပ်ထွက်ဘောမကိုတောင် တောင်းတောင်းပန်ပန်နဲ့ ငြင်းချက်ထုတ်ရတဲ့ ဘဝ ရောက်နေတာ။

အဲတော့ ဒါတွေက တော်လှန်ရေးအပေါ် ဘာသက်ရောက်မှုမှ ရှိမှာမဟုတ်ပါဘူး၊ တိုင်းမ်မဂ္ဂဇင်း ဆောင်းပါးရှင်ရေးတဲ့ နောက်ဆုံးအပိုဒ်ကတော့ အရေးကြီးပါတယ်၊ သူပြောတာက ဘယ်ဘက်ကမှ မနိုင် နိုင်ဘူးဆိုတာပါ၊ အမှန်တော့ တော်လှန်ရေးက အခြေအနေရော စုဖွဲ့မှုရော ကောင်းတဲ့ဘက်မှာ ရှိပါတယ်၊ အမှားအယွင်းကလေး အနည်းငယ်ရှိရင်တော့ တဆိတ်ကို တအိပ်လုပ်ကြမယ့်သူတွေက တပ်ဘောမတင် မဟုတ်တာတော့ သိထားကြဖို့လိုပါတယ်၊ လက်တွေ့မြေပြင်မှာ ၉၀% လောက်က ကိုယ့်ဘက်က အောင်ပွဲပါ၊ SCEF ရဲ့ ရည်ရွယ်ချက်တွေအတိုင်း( အတော်ခက်ခဲပေမယ့်) ကွပ်ကဲမှုတခုထဲ့ တပ်တခုထဲပုံစံရောက်ဖို့ ကြိုးစားရမှာပါ၊ ဒါဟာ တကယ်တော့ အမျိုးအစားသစ် ဖက်ဒရယ်တပ်မတော်ပါပဲ၊ လွတ်လပ်ရေးခေတ်ဦးကာလက ဒီလိုပုံစံရှိခဲ့ဖူးတယ်၊ အခုတော့ အတွေ့အကြုံများတဲ့ တိုင်းရင်းသားခေါင်းဆောင်တွေကိုယ်တိုင် တပ်ထိပ်ပိုင်းကို ကိုင်တွယ်မှာဖြစ်လို့ ပိုပြီး အောင်မြင်လာစရာ ရှိပါတယ်၊ တိုက်ပွဲကြီးတိုက်နိုင်အောင် အင်အား ၅၀၀မှ ၂၀၀၀ လောက်အထိ လိုရင်လိုသလို စုစည်းနိုင်ရပါမယ်၊ အမျိုးအစားသစ် ဖက်ဒရယ်တပ်နဲ့ ခွန်နှစ်ဆွေး ရှစ်ဆွေး ဓါးမြတပ် ပြန်ပေးဂိုဏ်းနဲ့ တိုက်တာ ဘယ်သူနိုင်မလဲ ၊ အဖြေကရှင်းနေကြောင်းပါခင်ဗျား။ ။

လက်ရှိစစ်ရေးအခြေအနေကို ခြုံငုံသုံးသပ်နိုင်ဖို့ PDF Insight ကို ဖတ်ရှုပါ။

“အဓမ္မ စစ်သားစုဆောင်းမှုရန် ရင်ဆိုင်လာရတဲ့ အမျိုးသမီးတွေရဲ့ဘဝ”

စစ်တပ်အာဏာသိမ်းပြီး ၅ နှစ်ကျော်လာချိန်မှာ စစ်တပ်ဟာ အမျိုးသမီး ပြည်သူ့စစ်မှုထမ်းသင်တန်းတွေပါ ဖွင့်လာတဲ့အတွက် စက်ရုံအလုပ်ရုံတွေနဲ့ အလုပ်ဌာနတွေမှာ အလုပ်လုပ်နေကြရတဲ့ အမျိုးသမီးတွေရဲ့ လုံခြုံရေးအခြေအနေဟာ စိုးရိမ်ရေအမှတ်ကို ရောက်ရှိလာခဲ့ပြီဖြစ်ပါတယ်။

စစ်မှုထမ်းဥပဒေကြောင့် တိုင်းပြည်ရဲ့ လူမှုစီးပွားတရပ်လုံး ကြီးမားတဲ့ သက်ရောက်မှုတွေ ရှိနေချိန်မှာ အာဏာသိမ်းစစ်တပ်က အမျိုးသမီးစစ်မှုထမ်းသင်တန်းကိုပါ ထပ်တိုးဖွင့်လှစ်လာတာကြောင့်လည်း အမျိုးသမီးတွေအနေနဲ့ သူတို့ရဲ့ လုံခြုံရေးအခြေအနေဟာ စိုးရိမ်ရေအမှတ်ကို ရောက်ရှိလာခဲ့တာဖြစ်ပါတယ်။

စက်တင်ဘာလကုန်ပိုင်းနဲ့ အခုအောက်တိုဘာလဆန်းပိုင်းမှာဆိုရင် ရန်ကုန်မြို့တော်က စက်ရုံအလုပ်ရုံတွေနဲ့ အလုပ်ဌာနတွေမှာ အလုပ်လုပ်ကိုင်နေတဲ့ အမျိုးသမီးတွေဟာ တက္ကစီအငှားယာဉ်တွေနဲ့ ရောက်လာတတ်တဲ့သူတွေရဲ့ အတင်းအကျပ် ပေါ်တာဆွဲ ဖမ်းဆီးခံရတာတွေနဲ့ ရင်ဆိုင်နေရတယ်လို့ မြန်မာနိုင်ငံစက်မှု၊ လက်မှုနှင့် ဝန်ဆောင်မှု လုပ်ငန်းပေါင်းစုံ အလုပ်သမားသမဂ္ဂများအဖွဲ့ချုပ် - MICS-TUsF နဲ့ မျက်မြင်တွေ့ရှိခဲ့သူတွေက ပြောပါတယ်။

ရန်ကုန်တိုင်း လှိုင်သာယာမြို့နယ်မှာရှိတဲ့ WHN အထည်ချုပ်စက်ရုံက ဝန်ထမ်းအမျိုးသမီးတဦးကို တက္ကစီအငှားယာဉ် ရောက်လာတဲ့ လူတချို့က အတင်းအကျပ် ကားပေါ်ဆွဲတင်ပြီး ပေါ်တာဆွဲဖို့ ကြိုးပမ်းမှုတခု စက်တင်ဘာ ၂၄ ရက်နေ့က ဖြစ်ခဲ့တယ်လို့ MICS-TUsF က ထုတ်ပြန်ထားပါတယ်။

စက်တင်ဘာ ၂၄ ရက် ည ၇ နာရီ ၄၃ မိနစ်လောက်အချိန်မှာ လှိုင်သာယာမြို့နယ် စက်မှုဇုန် ၂၊ မြတောင်ဝန်ကြီးဦးမှိုလမ်းနဲ့ ဆရာစံလမ်းထောင့်၊ အမှတ် ၁၄၅/ခ မှာ ဖွင့်ထားတဲ့ WHN အထည်ချုပ်စက်ရုံက အထည်အရည်အသွေး ထိန်းသိမ်းရေးဝန်ထမ်း အမျိုးသမီး အလုပ်ကနေ အိမ်ပြန်လာချိန် ဗိုလ်ချုပ်ကားမှတ်တိုင်အနီးမှာ တက္ကစီတစီးနဲ့ ရောက်လာတဲ့ လူတချို့က အငှားယာဉ်ပေါ် အတင်းအကျပ် ဆွဲတင်တဲ့ဖြစ်ရပ် ရှိခဲ့ပါတယ်။

ကားပေါ်ဆွဲတင်ခံရတဲ့ အမျိုးသမီးက ပတ်ဝန်းကျင်ကို အော်ဟစ်အကူအညီတောင်းခဲ့သလို အနီးအနားမှာရှိနေတဲ့ အလုပ်သမားတွေနဲ့ ပြည်သူတွေကလည်း ဝိုင်းဝန်းအော်ဟစ်ခဲ့လို့သာ အဲဒီအမျိုးသမီး လွတ်မြောက်သွားခဲ့တာလို့ MICS-TUsF ရဲ့ အထွေထွေအတွင်းရေးမှူးချုပ် ဦးသက်နှင်းအောင်က သတင်းဌာနတွေကို ပြောထားပါတယ်။

ဒီဖြစ်စဉ်ကြောင့် WHN အထည်ချုပ်စက်ရုံက အမျိုးသမီးအလုပ်သမားတွေအပြင် အမျိုးသားဝန်ထမ်းတွေပါ စိုးရိမ်ခဲ့ကြပြီး အလုပ်သမားတွေ ညဘက်အချိန်ပိုဆင်းပြီး အိမ်ပြန်ရတဲ့အခြေအနေနဲ့ ပတ်သက်လို့ စက်ရုံတာဝန်ရှိသူတွေနဲ့ ဆွေးနွေးခဲ့ရတဲ့အထိပါပဲ။

အလုပ်သမားတွေကို အချိန်ပို OT ညဉ့်နက်တဲ့အထိ မခေါ်ဖို့နဲ့ တကယ်လို့ OT ကို ညဉ့်နက်တဲ့အထိ ခေါ်မယ်ဆိုရင် ဖြစ်ပေါ်လာတဲ့ ပြဿနာတွေကို တာဝန်ယူပေးဖို့ MICS-TUsF က တောင်းဆိုထားပေမယ့် စက်ရုံဘက်ကတော့ အလုပ်သမားတွေရဲ့ လုံခြုံရေးနဲ့ ပတ်သက်လို့ တာဝန်ယူမှု၊ တာဝန်ခံမှုမရှိဘဲ အထည်အော်ဒါတွေကို အကြောင်းပြပြီး အချိန်ပိုအလုပ်တွေ ဆက်လုပ်နိုင်အောင်သာ စီစဉ်နေတဲ့အတွက် WHN အထည်ချုပ်စက်ရုံက အလုပ်သမားတွေအနေနဲ့ စိုးရိမ်စိတ်တွေ မြင့်တက်နေပါတယ်။

MICS-TUsF ဘက်ကတော့ လှိုင်သာယာမြို့နယ်က အထည်ချုပ်ဝန်ထမ်းအမျိုးသမီး ပေါ်တာဆွဲ ဖမ်းဆီးခံခဲ့ရတဲ့ ဖြစ်စဉ်ကို မှတ်တမ်းတင်ထားပြီး အပြည်ပြည်ဆိုင်ရာ အလုပ်သမားအဖွဲ့ချုပ် - ILO ရဲ့ အလုပ်သမားရေးရာ ဆွေးနွေးပွဲတွေမှာ တင်ပြဆွေးနွေးသွားဖို့ ရှိနေပါတယ်။

လှိုင်သာယာမြို့နယ်က အထည်ချုပ်ဝန်ထမ်းအမျိုးသမီး ကားပေါ်ဆွဲတင်ခံရတဲ့ ဖြစ်စဉ်လိုပဲ မင်္ဂလာဒုံမြို့နယ်၊ ခရေပင်လမ်းခွဲမှာ အလုပ်ကပြန်လာတဲ့ အမျိုးသမီးတယောက်လည်း အောက်တိုဘာ ၁ ရက် ည ၇ နာရီဝန်းကျင်မှာ တက္ကစီကားပေါ်ကနေ ဆင်းလာတဲ့ အမျိုးသား ၃ ယောက်က ကားပေါ်ကို အတင်းအကျပ် ဆွဲတင်ခံရပြီး ပတ်ဝန်းကျင်ကို အကူအညီအော်တောင်းတဲ့အတွက် မျက်နှာကို လက်သီးနဲ့ ထိုးတာခံရသလို လည်ပင်းမှာ အစင်းရာတွေ ဖြစ်တဲ့အထိ အကြမ်းဖက်ခံခဲ့ရပါတယ်။

အဲဒီလို အကြမ်းဖက်ပြီး ကားပေါ်ဆွဲတင်တာကို အတင်းရုန်းကန်လို့ လွတ်ခဲ့ပေမဲ့ သူ့ရဲ့ လက်တော့ပ်၊ လက်ကိုင်ဖုန်း၊ ပိုက်ဆံအိတ်နဲ့ တခြားပစ္စည်းတွေကို တက္ကစီကားပေါ်ကသူတွေဆီ ပါသွားတယ်လို့ ဒီဖြစ်စဉ်ကို သိထားတဲ့သူက လူမှုကွန်ရက်စာမျက်နှာမှာ ရေးသားဖော်ပြထားပါတယ်။

အောက်တိုဘာ ၂ ရက်နေ့တုန်းကလည်း တာမွေမြို့နယ်၊ ကျောက်မြောင်းရပ်ကွက်ကနေ တက္ကစီငှားစီးလာတဲ့ အမျိုးသမီးငယ်တဦးလည်း ကျပ်သိန်း ၃၀၀ နဲ့ ပြန်ပေးဆွဲခံရမယ့်အရေးနဲ့ ကြုံခဲ့ရပါသေးတယ်။

သူမ ငှားစီးလာတဲ့ကား မီးပွိုင့်မိနေချိန်မှာ တက္ကစီကားရဲ့ တဖက်စီကနေ အမျိုးသားတဦးစီ တက်လာပြီး အမျိုးသမီးငယ်ရဲ့ ခေါင်းကို အဝတ်နဲ့အုပ်ကာ ငွေကျပ်သိန်း ၃၀၀ နဲ့ လာရွေးဖို့ အိမ်ကို ဖုန်းဆက်ခိုင်းချိန်မှာ သူ့အနေနဲ့ နိုင်ငံခြားသံရုံးမှာ အလုပ်လုပ်နေသူလို့ ပြောလိုက်ချိန်မှာတော့ တက္ကစီယာဉ်မောင်းနဲ့ ကားပေါ်တက်လာသူတွေဟာ ကားကို လှည့်ပတ်မောင်းနှင်ပြီး ကားပေါ်ကနေ ချပေးခဲ့တာပါ။

ဒီဖြစ်စဉ်တွေ မတိုင်မီ ဩဂုတ်လဆန်းပိုင်းတုန်းကလည်း လှည်းတန်းနဲ့ ကမာရွတ်မြို့နယ်တဝိုက်မှာ အမျိုးသမီးတွေကို ပစ်မှတ်ထားတဲ့ မသင်္ကာဖွယ်အမျိုးသားတဦးကို တွေ့ရှိခဲ့တာကြောင့် သတိထားသွားလာကြဖို့ လူမှုကွန်ရက်ပေါ်မှာ သတိပေးနှိုးဆော်မှုတွေ ထွက်ပေါ်ခဲ့ပါသေးတယ်။
ဒီဖြစ်စဉ်တွေကို ခြုံကြည့်မယ်ဆိုရင် အာဏာသိမ်းစစ်တပ်ရဲ့ ကာကွယ်ရေးဝန်ကြီး ဗိုလ်ချုပ်ကြီး တင်အောင်စန်းက စစ်မှုထမ်းအပတ်စဉ် ၅ မှာ အမျိုးသမီးတွေကိုပါ စစ်မှုထမ်းဖို့ ခေါ်ယူနိုင်ရေး တိုင်းစစ်ဌာနချုပ်တွေအားလုံးကို မေလ ၃၁ ရက်မှာ ညွှန်ကြားခဲ့တာရဲ့ နောက်ပိုင်း ဆက်တိုက်ဖြစ်လာတာပါ။

မှော်ဘီမြို့ အမှတ် (၄) အရာခံနှင့် အကြပ်ကြီးသင်ကျောင်းမှာ ဩဂုတ်လ ၁၀ ရက်နေ့က စဖွင့်တဲ့ အမျိုးသမီး ပြည်သူ့စစ်မှုထမ်းသင်တန်းကို ရောက်လာတဲ့ သင်တန်းသူတွေထဲက သင်တန်းသူအများစုဟာ ရန်ကုန်မြို့မှာရှိတဲ့ စက်ရုံအလုပ်ရုံတွေက အလုပ်သမားတွေလို့ မြန်မာ့စစ်ဘက်ရေးရာနှင့် လုံခြုံရေးဆိုင်ရာလေ့လာရေးအဖွဲ့ MDSI မှတ်တမ်းတွေအရ သိရပါတယ်။

အခုလို ဖမ်းဆီးတဲ့လုပ်ရပ်တွေဟာ ပေါ်တာဆွဲတာလို့ ယူဆပြောဆိုနေကြတာတွေ ရှိသလို စစ်မှုထမ်းကိစ္စကို အကြောင်းပြုပြီး ပြန်ပေးဆွဲငွေညှစ်တဲ့ လုပ်ရပ်လည်း ဖြစ်နိုင်တယ်ဆိုပြီး ဝေဖန်ပြောဆိုနေတာတွေလည်း ရှိနေပါတယ်။

စစ်မှုထမ်းဥပဒေကြောင့် တိုင်းပြည်ရဲ့ လူမှုစီးပွားတရပ်လုံး ထိခိုက်သက်ရောက်မှုတွေ ကြီးမားနေချိန် အမျိုးသမီးစစ်မှုထမ်းသင်တန်းကိုပါ ထပ်တိုးဖွင့်လှစ်လာတဲ့အတွက် အမျိုးသမီးတွေရဲ့ဘဝဟာ လုံခြုံရေးအခြေအနေ စိုးရိမ်နေရတဲ့ အနေအထားလို့ သုံးသပ်ရပါတယ်။

လက်ရှိစစ်ရေးအခြေအနေကို ခြုံငုံသုံးသပ်နိုင်ဖို့ PDF Insight ကို ဖတ်ရှုပါ။

"စစ်မှုထမ်းကြေးကနေ မဲနှိုက်စစ်မှုထမ်းစနစ် (သို့မဟုတ်) မန္တလေးမှာ လူအင်အားကို တိုက်ရိုက်ရှာလာပြီလား"

မန္တလေးမြို့မှာ စစ်မှုထမ်းရေးနဲ့ပတ်သက်ပြီး နောက်ထပ်ပြောင်းလဲမှုတခု ဖြစ်လာနေပါတယ်။ အခုနှစ်ကုန်ပိုင်းကစပြီး စစ်မှုထမ်းကြေး ကောက်ခံတော့မှာမဟုတ်ဘဲ စစ်မှုထမ်းရမယ့်သူတွေကို မဲနှိုက်ရွေးချယ်တော့မယ်ဆိုတဲ့ ညွှန်ကြားချက်အသစ် ထွက်လာတယ်လို့ သတင်းရပါတယ်။

ဒီသတင်းဟာ မန္တလေးမြို့မှာ ပြီးခဲ့တဲ့လတွေကတည်းက ဖြစ်ပေါ်နေတဲ့ စစ်မှုထမ်းမဲနှိုက်မှုတွေနဲ့လည်း တိုက်ရိုက်ဆက်စပ်နေပါတယ်။ စက်တင်ဘာလအတွင်း မန္တလေးမြို့မှာ ရပ်ကွက်အလိုက် ဒုတိယအကြိမ် စစ်မှုထမ်းမဲနှိုက်မှုတွေ ပြုလုပ်နေပြီး ကျောင်းသားတွေ၊ ယခင်က လူစားထိုးထည့်ထားသူတွေ၊ စစ်မှုထမ်းကင်းလွတ်ခွင့် ရရှိထားသူတွေပါ စာရင်းထဲ ပြန်ပါလာတယ်လို့ မြို့ခံတွေကို ကိုးကားပြီး သတင်းဖော်ပြထားပါတယ်။

စက်တင်ဘာ ၂၅ ရက်ထုတ် သတင်းတခုမှာလည်း မန္တလေးမြို့ရှိ မြို့နယ်တခုကို တလလျှင် စစ်မှုထမ်းရန် လူ ၄၅ ဦးနှုန်း စုဆောင်းဖို့ မဲနှိုက်ပြီး နံပါတ်စဉ် သတ်မှတ်ထားတယ်လို့ ဖော်ပြထားပါတယ်။ တချို့ရပ်ကွက်တွေမှာ တယောက်ကနေ ငါးယောက်အထိ ရွေးချယ်တာတွေရှိပြီး တဖက်မှာလည်း ပေါ်တာဆွဲဖမ်းဆီးမှုတွေ ဆက်လက်ရှိနေတယ်လို့ ဆိုပါတယ်။

ဒီနေရာမှာ စိတ်ဝင်စားစရာကောင်းတာက စစ်မှုထမ်းကြေးဆိုတဲ့ ငွေကြေးနဲ့ ရှောင်လွှဲနိုင်တဲ့ နည်းလမ်းတခုကနေ လူကိုယ်တိုင် စစ်မှုထမ်းရမယ့် စနစ်ဘက်ကို ပိုပြီးရွှေ့လာနေသလား ဆိုတဲ့အချက်ပါ။

အရင်က စစ်မှုထမ်းဆင့်ခေါ်မှုနဲ့အတူ အချို့ဒေသတွေမှာ စစ်မှုထမ်းကြေး၊ ထောက်ပံ့ကြေး စတဲ့ ခေါင်းစဉ်တွေနဲ့ ငွေကြေးကောက်ခံမှုတွေ ရှိနေခဲ့တယ်လို့ သတင်းတွေက ဖော်ပြထားပါတယ်။ ဩဂုတ်လအတွင်းကပင် စစ်မှုထမ်းကြေး ပေးထားသူတွေကိုပါ ပြန်လည်ဖမ်းဆီး ပေါ်တာဆွဲတာတွေရှိတယ်လို့ သတင်းရင်းမြစ်တွေက ဆိုထားပါတယ်။

အဲဒီလိုအခြေအနေမှာ ငွေကြေးကောက်ခံမှုထက် လူအင်အားကို တိုက်ရိုက်ရယူတဲ့ မဲနှိုက်စနစ်ကို ပိုပြီးအသုံးပြုလာမယ်ဆိုရင် စစ်မှုထမ်းရေးဟာ “ငွေပေးပြီး ရှောင်လွှဲနိုင်တဲ့ကိစ္စ” ထက် “စာရင်းထဲပါလာရင် ကိုယ်တိုင်သွားရမယ့်ကိစ္စ” အဖြစ် ပိုမိုပြောင်းလဲလာနိုင်ပါတယ်။

တဖက်မှာလည်း စစ်မှုထမ်းစနစ်ကို ဆက်လက်အကောင်အထည်ဖော်နေတယ်ဆိုတာ ထင်ရှားပါတယ်။ ၂၀၂၆ ဩဂုတ်လမှာ ပြည်သူ့စစ်မှုထမ်း သင်တန်းအမှတ်စဉ် ၂၇ စတင်ခဲ့ကြောင်း ထုတ်ပြန်ထားပြီး စစ်မှုထမ်းဥပဒေကို ၂၀၂၄ ဖေဖော်ဝါရီ ၁၀ ရက်မှာ စတင်ကျင့်သုံးခဲ့ပါတယ်။

ဒါကြောင့် မန္တလေးမှာ ထွက်ပေါ်လာတဲ့ ရပ်ကွက်အဆင့် စာရင်းကောက်ယူမှု၊ မဲနှိုက်ရွေးချယ်မှု၊ ပေါ်တာဆွဲဖမ်းဆီးမှုနဲ့ စစ်မှုထမ်းသင်တန်းအဆင့်ဆင့်ကို ချိတ်ဆက်ကြည့်မယ်ဆိုရင် စစ်မှုထမ်းအင်အား လိုအပ်ချက်ကို ရပ်ကွက်နဲ့ မြို့နယ်အုပ်ချုပ်ရေးယန္တရားတွေကတဆင့် တိုက်ရိုက် ဖြည့်ဆည်းဖို့ ကြိုးပမ်းနေတဲ့ပုံစံကို တွေ့ရပါတယ်။

ဒါအပြင် အမျိုးသမီးတွေအပေါ် စစ်မှုထမ်းခေါ်ယူမှုနဲ့ပတ်သက်ပြီးတော့ သီးခြားသတိထားဖို့ လိုပါတယ်။ ပြီးခဲ့တဲ့ ဩဂုတ် ၁၁ ရက်မှာ စစ်ကောင်စီက ပြည်သူ့စစ်မှုထမ်းဥပဒေအရ အမျိုးသမီးတွေကို ခေါ်ယူခြင်း၊ သင်တန်းပေးခြင်း မရှိဘူးလို့ တရားဝင်ငြင်းဆိုထားပြီး လက်ရှိအမျိုးသမီး စစ်ရေးသင်တန်းတွေဟာ မိမိဆန္ဒအလျောက် လျှောက်ထားသူတွေအတွက်သာ ဖြစ်တယ်လို့ ပြောထားပေမဲ့ အခုလက်ရှိမှာတော့ အဓမ္မစုဆောင်းနေတယ်လို့ သတင်းတွေမှာ ဖော်ပြနေပါတယ်။

အဓိကအချက်ကတော့ စကစဟာ စစ်သားစုဆောင်းရာမှာ ငွေကြေးကောက်ခံမှု တခုတည်း မဟုတ်တော့ပဲ လူအင်အားအပ်ချက်ကို ဖြည့်ဆည်းဖို့အတွက် အခြားနည်းလမ်းမျိုးစုံနဲ့ အောက်ခြေရပ်ကွက်အထိ ဖိအားပေးစုဆောင်းလာနေပြီဆိုတာပဲဖြစ်ပါတယ်။

မန္တလေးမှာ မဲနှိုက်ရွေးချယ်မှုတွေ ထပ်မံဖြစ်ပေါ်လာတာ၊ မြို့နယ်အလိုက် သတ်မှတ်အင်အားနဲ့ စုဆောင်းဖို့ ကြိုးပမ်းတာနဲ့ ပေါ်တာဆွဲမှုတွေ ရှိနေတယ်ဆိုတဲ့ သတင်းတွေ ဆက်လက်ပေါ်ထွက်နေပါတယ်။

ဆိုလိုတာက စစ်မှုထမ်းကြေး ကောက်ခံပြီး “ငွေကြေးနဲ့ ဖြေရှင်းတဲ့နည်း” ထက် “ ပေါ်တာဆွဲတာ၊ မဲနှိုက်တာ စတဲ့ ပိုမိုပြင်းထန်တဲ့ စုဆောင်းတဲ့နည်း” တွေကို အသုံးပြုနေပြီဆိုတဲ့အချက်ပါပဲခင်ဗျာ။

လက်ရှိစစ်ရေးအခြေအနေကို ခြုံငုံသုံးသပ်နိုင်ဖို့ PDF Insight ကို ဖတ်ရှုပါ။