La min Lay

ပိုင်ရှင်မရှိတဲ့မြစ်ကို ရှာပါ။
ကိုယ့်အနီးအနားက လမင်းကိုပဲ ဖမ်းပါ။
အန္တရာယ်မရှိနိုင်တဲ့ အိပ်မက်ကိုပဲ မက်ပါ။

မလှည့်စားတတ်တဲ့အရိပ်မှာ ခိုပါ။
ကိုယ့်ကို တကယ်လာစေချင်လို့
ခင်းပေးတဲ့လမ်းကိုပဲ လျှောက်ပါ။
အတင်းလုယက် ဝင်စရာမလိုတဲ့တံခါးကိုပဲ ခေါက်ပါ။

အဆင့်အတန်း မခွဲတဲ့တိမ်ကို ရှာပါ။
ကိုယ့်ကို တကယ်ပြန်ကောင်းစေချင်တာ ကျိန်းသေတဲ့
ရာသီဥတုအောက်မှာပဲ ဖျားနာပါ။
ပြင်းထန်ပေမယ့် မယုတ်မာတဲ့
မုန်တိုင်းမျိုးတွေ့မှပဲ ' လွင့် ' ပါ ။

အကြံအစည်မရှိတဲ့ကြိုးကို ရှာပါ။
ကိုယ့်ကို မျက်နှာမငယ်စေတဲ့ ပြတင်းပေါက်ကနေပဲ ငေးပါ။
ထောင်ချောက် မဆင်ထားတဲ့ပုခုံးကိုပဲ မှီပါ။

အရောင်ခဏခဏမပြောင်းတဲ့
ကောင်းကင်အောက်မှာ နေပါ။
ကိုယ့်ကို တကယ်ကျစ်ကျစ်ပါအောင် ဆုပ်ထားမယ့်
နွယ်မှာပဲ အချည်နှောင်ခံပါ
သက်တောင်းသက်သာ ဖြစ်စေမယ့်နွံမှာပဲ နစ်ပါ ။

လွတ်လွတ်ကင်းကင်းရှိတဲ့ အရိပ်ကိုရှာပါ။
ကိုယ့်ကို ထပ်ပြီးမဖိနှိပ်မယ့် "ဝန် " ကိုပဲထမ်းပါ။
တွေ့သမျှ မြင်သမျှကို လှမ်းမခေါ်တတ်တဲ့
အမိုးအောက်မှာပဲ ခိုပါ ။

အဆိပ်မရှိတဲ့ကြယ်ကို ရှာပါ။
ကိုယ့်ကို တကယ်ဖိတ်ခေါ်တဲ့ တိမ်တွေဆီပဲ သွားပါ။
ပြန်လှည့်ကြည့်စရာမလိုတဲ့ မေတ္တာကိုပဲရွေးပါ ။

မာယာမရှိတဲ့အပင်ကို ရှာပါ။
ကိုယ်လက်လှမ်းမှီတဲ့နေရာက အပွင့်ကိုပဲခူးပါ
နောက်ဆံတင်းစရာမလိုတဲ့ ကြိုးကိုပဲချည်ပါ ။

ပြိုင်ဘက် မရှိတဲ့လှေကို ရှာပါ။
ကိုယ့်ကိုပျော်ရွှင်စေတဲ့ ရာသီဥတုမှာပဲနေပါ
အငြိုးအတေး မကြီးတဲ့ရေကိုပဲ သောက်ပါ ။

အဖော်မရှိတဲ့ ယုန်ကိုရှာပါ။
ကိုယ့်ကို လိုလိုလားလားရှိတဲ့ မြက်ခင်းပြင်ပေါ်မှာပဲ အိပ်ပါ ။
မျက်နှာပူစရာ မလိုတဲ့နံရံကိုပဲ မှီပါ ။

#𝘾𝙧𝙚𝙙𝙞𝙩
#မေတ္တာဖြင့်ပြန်လည်မျှဝေပါသည်
#လွတ်လပ်စွာကူးယူနိုင်ပါသည်