Pathian thu

I TANA HLUTE HRIA LA, CHUMI ANG CHUAN NUNG RAWH

"Krista an hmuhsitna chu Aigupta ram rote ai chuan sum ropui zawkah a ruat a; lawmman pek tur chu a thlir thin avangin" Heb 11:26.

I tan engnge pawimawh ber? I nunah i ngaihhlut thil pathum emaw pali emaw engte nge?

Duhthlanna khauh tak i siam tur hetah hian a awm: Pathian ngaihhlutte thlang la, khawvel ngaihhlut ni lovin. Mosia pawh khan a nun sawi danglam thei thutlukna kha a siam a. Chuvang chuan Pathian pawh khan a hmang a ni.

Hebrai 11:26-ah chuan, "Krista an hmuhsitna chu Aigupta ram rote ai chuan sum ropui zawkah a ruat a; lawmman pek tur chu a thlir thin avangin' a ti.

Mosia khan thutlukna hlu tak a siam a. A nunah eng kha nge hlu tih a tifiah a. A tana hlu ber thil a hria a ni.

Ka ngaihhlut thil pathumte awlsam takin ka sawi thei- rinawmna, inngaihtlawmna leh thil phalna. Heng thil pathumte hmang hian ka nun ka siam ang tiin hun rei tak liam tawhah khan thutlukna ka siam a, a chhan chu hruaitu nihna kawngah thang hlauhawm pathumte laka damdawi a nih vang a ni.

I nunah pawimawh i tihte i sawi thei em? I thei lo a nih chuan, chumi ang chuan i nung thei hauh lovang.

Ni khat dang i liam tir leh hmain, han thu vang vang la han inngaihtuah la, "Engnge ka tan pawimawh ber le?" tiin. Ziak chhuak teh, a chhan chu i tana pawimawh i hriatfiah hma chuan nunpui tur i nei lo a ni.

Hei hi eng vangin nge a pawimawh em em? I nuna thil pawimawh i thlan fel loh chuan, midangin an thlansak ang che. An duhnaah an nawr che anga, an ngaihhlut ang zawngin i nung ang a, nangma ngaihhlut ang pawh ni lovin.

Engnge i tan pawimawh ber tih i hriat a, chumi anga i nun chuan, Pathianin a hmang chein, mal pawh a sawm ngei ang che.

Ngaihtuah zui atan

Eng te nge i nuna pawimawh i tih pathumte chu?

Engtin nge i tihfiah theih ang?

Engtin nge i nuna hmang turin ke i pen ang?

I MALSAWM DAWNTE HI MIDANGTE TAN A NI

"Mi tinin thilpek in hmuh ang zelin Pathian khawngaihna tinreng enkawltu thate angin, chung chuan rawng inbawl tawn theuh rawh u" 1 Pet 4:10.

Kan theihna te hmanga kan intanpui tawn hian, Pathian chawimawiin a awm thin a. Bible chuan, "Mi tinin thilpek in hmuh ang zelin Pathian khawngaihna tinreng enkawltu thate angin, chung chuan rawng inbawl tawn theuh rawh u" a ti. (1 Pet 4:10)

Pathian hian engemaw thawh ve thin turin a duang che a. I hlawkna tur chauhin thiamna leh theihna a pe lo che a. Midangte hlawkna turin a pe che a. Chutiang bawkin, midangte theihna kha i hlawkna tur a ni ve tho a ni.

Midangte hi ka thiam loh lam zawngah an zeihawi em em thin hi ka lawm thin. Entirna atan, sum vawn lam hi ka thiam lo hle a. Tin, khawl lam khawih thiam tak takte pawh hi ka lawmpui thin. Tul viau pawh nise kan motor carburetor pawh ka siam thiam lova. Khawiah nge a awm pawh ka hre lovang!

Mitin hian theihna hrang theuh kan nei a.

Pathianin theihna min pek pakhat chu Pathian Thu sawi a, midangte hriatthiam tura sawifiah hi a ni a. Chu theihna ka hman chuan, malsawmna i lo dawng thin a ni.

Mahse, thil pawimawh chu hei hi a ni: nang pawhin theihna i nei ve tih hi. Midangte malsawmna turin engtin nge i hman ve le? Chutiang ila ti ngai lo a nih chuan, engtikah nge i tih tan ang?

Pathian atanga theihna i dawn i hman loh chuan, midangte bumin an awm thin. I theihna leh thiamna te midang tana i hman chuan, malsawmna a dawng a, Pathian chawimawiin a awm thin.

Ngaihtuah zui atan.

Pathianin eng malsawmna nge a pek che?

Engtin nge midangte rawngbawlna atan i hman? Engtin nge Pathianin midangte malsawmna tura hmang tur chein min duh?

Pathian chawimawia a awmna turin, i nunah tute puihna nge i dawn theih?