16.09.2006

المجموعة ديالنا ما تأسساتش من أجل الشهرة، تأسسات على واحد المبدأ واضح: نكونو سند للفريق ديالنا فكل وقت وفكل مكان، ماشي غير فاش كيكون رابح ولا فاش كيكون الماتش كبير. دخلنا للكورفا باش نقدموا حبنا للفريق، باش نغنيو من القلب، باش نكونو القوة الخفية لي كتشجع اللاعبين فالميدان.

ولكن مؤخرًا بدات كتكثر واحد الظاهرة ماشي من ثقافتنا، وهي بعض الناس لي كيجيو للملعب غير باش يصورو "سطوري" ويبينو راسهم، وكيقلبو على اللقطة باش يبان قدام صحابو، وينساو علاش أصلاً كاينين تمام.

راه الكورفا ماشي بلاصة باش تبان، راه بلاصة باش تْبان نيتك، باش تبان خدمتك، باش تبان رجولتك وسط الجمهور، ماشي وسط كاميرا التليفون.

إلى كنتي فعلاً كتعتابر راسك عضو من هاد المجموعة، شجع بنية ، خليك وفيّ، وخلي التباهي للي ما عندو ما يعطي. راه حب الفريق ما كيتصورش، كيتحس.

"Victory or war "

ليس مجرد عبارة نرددها في المدرجات أو نكتبها على التوب، بل هو مبدأ حيّ نعيشه في تفاصيل حياتنا اليومية. فعندما نقول "Victory or War"، نحن لا نعبّر عن شعار فارغ، بل عن موقف يعكس رؤية واضحة: إمّا أن نحقق النصر بكرامة، أو نواجه الصعاب بثبات، دون تراجع أو تنازل. هذا المبدأ لا يقتصر على الملعب، بل يمتد ليشمل الدراسة، والعمل، والأسرة، وكل جانب من جوانب الحياة. الفرد الواعي داخل المجموعة هو من يدرك أن السلوغان رسالة مستمرة، تُعلّمنا الصبر، وتغرس فينا روح التحدي، وتربّينا على الوفاء للفكرة، أينما كنّا، وحيثما ارتحلنا.

راك دخلتي لحركية عندها مبادئ وقيم، ماشي غير ماتشات وتيفوات. باش تكون فعلاً فخور بالانتماء ديالك، خاصك تكون قد المسؤولية، واعي، ونافع للكروب ديالك.

ماشي معقول تغيّب على المدرسة، وتكذب على والديك باش تمشي للتيران، حيت العضو الحقيقي عارف شنو ليه و شنو لي عليه. كاين وقت للقراية، ووقت للتيران، ووقت للجلوس مع الوالدين وسماع كلامهم، حيت الرجولة ماشي هي تهرب باش تفرج فماتش، ولكن أنك تعرف دير توازن في حياتك .

الألتراس فكرة، والفكرة خاصها عقل ناضج، ماشي عقل هارب من الواقع.

نجاح الفرد هو من نجاح المجموعة.