Misled Wanderer

පණිවිඩේ යැව්ව දැං වාහනේ ගෙනෙන්නට
මේ ළඟලු නවත්තං ඉන්නෙ මල්ලී
ආ ගමං පටවගෙන මේ ට්‍රොලියෙ මළු තුනයි
ලොකුම ලොකු පෙට්ටියයි යනව ඉගිලී

නැහැනෙ මට ඉවසිල්ල දකින තුරු අම්මාගෙ
මුහුණෙ මල් පිපෙන හැටි TV එක දැක්කාම
නංගිටත් හොඳයි දැං බලයි ඇස් කට ඇරං
ඇගේ හිත පිරෙනකං කොරියානු කොලු රෑං

කාලයක් කොරියාවෙ දුක දරා වෙහෙස වී
එකතු වුණු සල්ලි ටික වියදම් වුනත්
අම්මගේ නංගිගේ හිත පිරෙන සතුටු පොදි
ඇති නැවත යන දවසෙ හිත හැදෙන්ටත්

ආච්චිගෙ සීයාගෙ පින්තූර එල්ලාපු
මැද සාලෙ බිත්තියට TV එක හරියන්නෙ
ඒත් අප්පච්චිගේ හිත නරක් වුනෝතින්
කොහොමදෑ නිවාඩුවෙ සැනසිල්ලෙ මං ඉන්නෙ

ගෙට ගොඩ වුනා, සැම එක් වුනා
කැවිලි කා තේ බිබී අපි හිනැහුනා
ගෙනා මළු විවර වී තෑගි බෙදුනා
ගෙවී ගිය කාලයේ තතු කියවුනා

කාලෙකින් පිරිවරින් පිරී ගිය ගෙයි පොඩිය
පසෙක හිඳ අප්පච්චි තුටින් විඳිමිං
මගේ හිත කොනිති කන ඇවිටිල්ල තේරීද?
කැඳවමින් ඔහු වෙතට කලා මට සං.

"පුතේ අර මැද සාලෙ
එල්ලාපු පොටෝ දෙක
හෙට උදේ මයෙ කාමරේ එල්ලපං"

#පවුල #ගෙදර

මතක ගොන්නක සැඩ පහර විඳ
සිතුම් ගඟුලක දුක් සුසුම් මැද
හීන පොදියක් සිත්හි හිඳුවා
නුඹේ පදවිය මා ලැබූවා

ඒත්,

නොබෝ කලකට එපිට මාහට
සිටිය වාරුව එතෙර වූවා
මගේ තනියට ළඟ තබා ගිය
සෙවනැල්ලෙ බර සිතට ආවා

ඈත් ඇගෙ සිත් තනි නොතනියට
නුඹේ හිරු රැස් එළිය සෙව්වා
නුඔව 'ගොඩ දාගන්න' අදිටන
මෙතෙක් මා හට වාරු වූවා

අහෝ කම්ඵළ ලුහුබදියි මා!
සොබා මව් හට ඉඳහිටක එන
අසුබ සිතිවිලි පෙලක පිහිටට
ගෙයි නවාතැන් දෙන්ට වූවා

නිසල අරණේ ශ්වේත ගජ තෙද
නුඹේ තනියට දෙපස සිටුවා
තරණයට ජීවිතේ ගංදිය
වෙහෙස නොබලා හබල් ගැසුවා

🖤

හිමිදිරිය
නුවරු වැඩට
ළමුන් කියුමට
එළිදකින මොහොත

ඊටත් කලිං ඇහැරුණු
පෑං පෑං චූං පාං
තරඟෙට දුවන
මහා තාර පාර

රෝද දෙක
තුන හතර හය
වෛවාරණ මාදිලි
රථ පෙළහර

මං හිටියෙ මේවා බලාගෙන
පාර අයිනේ අළුත්ම තාලේ
වාහන හෝදන නඩත්තු වන
'car service' අංගනයක

කවලමේ කැකෑරෙන හීනද
මහ පාරෙ කලබලේ ද
තාක්ෂණයද සේවාවද
කොච්චර නවීනද?

ඒත් ඒ ඔක්කොටම එහා
මහ පාරද A/C කාමරේද
වගේ වගක් නැතුව
නොගිලිහෙන #අපේකම ❤️