Milestone Guide

✅ Солонгос хэл, зөвлөгөө
✅ Солонгос дахь амьдрал
✅ Бүтээгдэхүүн захиалга, зууч

https://bsena0613.blogspot.com/
https://litt.ly/bsena0613
https://www.youtube.com/@bsena0613

31/03/2026

БНСУ-д ханиадны эм уусны дараа жолоо баривал хүлээлгэх шийтгэлийг чангарууллаа.

БНСУ-д ирэх 4 дүгээр сарын 2-ны өдрөөс эхлэн эм, бэлдмэл хэрэглэсэн үедээ тээврийн хэрэгсэл жолоодож байгаад баригдсан тохиолдолд хүлээлгэх хуулийн хариуцлагыг эрс чангаруулахаар боллоо. Үүнд энгийн ханиадны эм уугаад жолоо барих үйлдэл ч багтаж байгааг албаныхан анхааруулж байна.

Шийтгэлийн хэмжээ хэрхэн өөрчлөгдсөн бэ?
☑️ Өмнө нь: 3 жил хүртэлх хугацаагаар хорих эсвэл 10 сая вон хүртэлх торгууль ногдуулдаг байсан.
✅️ Шинэчлэгдсэнээр: 5 жил хүртэлх хугацаагаар хорих эсвэл 20 сая вон хүртэлх торгууль болж ялын хэмжээг нэмэгдүүлсэн.

Мөн уг зөрчлийг давтан гаргасан тохиолдолд илүү хүнд шийтгэл оногдуулах аж.

Энэхүү хуулийн өөрчлөлт нь үндсэндээ мансууруулах бодис хэрэглэсэн үеийн жолоодлогын хяналтыг сайжруулах зорилготой юм. Гэхдээ хуулийн дагуу шийтгэл ногдуулах гол шалгуур нь 'эмийн төрөл' бус, харин 'хэвийн жолоодлого хийх боломжтой эсэх' байх тул ердийн ХАНИАДНЫ ЭМ уусны дараа ч маш болгоомжтой байх шаардлагатай болж байна.
Ханиадны эмэнд ихэвчлэн агуулагддаг антигистамин хэмээх найрлага нь хүнийг нойрмоглуулж, анхаарал төвлөрөлтийг бууруулах үйлчилгээтэй байдаг. Хэрэв эмийн нөлөөнөөс болж биеэ хянах чадваргүй болох, хэвийн жолоодлого хийхэд хүндрэлтэй үедээ жолоо барих эсвэл осол гаргасан тохиолдолд хэргийн газарт урьдчилсан болон нарийвчилсан шинжилгээ авч, улмаар хуулийн хариуцлага хүлээлгэх үндэслэл болох юм.

Цагдаагийн байгууллага болон эрүүл мэндийн мэргэжилтнүүдийн зүгээс эмийн уутан дээр 'Нойрмоглуулж болзошгүй' (졸음 주의) гэсэн анхааруулга тэмдэглэгээ байвал жолоо барихаас зайлсхийх нь аюулгүй гэдгийг онцолж байна. Мөн аливаа эмийг уухын өмнө эмч, эм зүйчээс машин барьж болох эсэхийг заавал тодруулж байхыг жолооч нарт зөвлөлөө.