Eco Friendly Club

गणेशखिंडीत संशयास्पद कचरा!

तुकाराम मुंडेंच्या भीतीने टाकल्याची शक्यता?

​जुन्नर / सोलापूर : जुन्नर-माळशेज घाट परिसरातील निसर्गरम्य गणेशखिंडीमध्ये काही अज्ञात लोकांनी संशयास्पद कचरा आणि घाण टाकल्याचा प्रकार समोर आला असून, यामुळे पर्यावरणप्रेमींमध्ये तीव्र संताप व्यक्त होत आहे.

​हा परिसर अत्यंत निसर्गरम्य असून, येथील सौंदर्य पाहण्यासाठी आणि परिसरातील श्री गणेशाच्या मंदिराचे दर्शन घेण्यासाठी पर्यटक व भाविक येथे थांबतात. अशा पवित्र आणि सुंदर ठिकाणी हा कचरा टाकण्यात आल्याने परिसराचे विद्रुपीकरण झाले आहे.

​अन्न व औषध प्रशासनाची भीती?

​या कचऱ्याबाबत एक शक्यता वर्तवली जात आहे. सध्या अन्न व औषध प्रशासनाचे (FDA) वरिष्ठ अधिकारी तुकाराम मुंडे यांच्या धडक कारवाईचा धसका अनेकांनी घेतला आहे. त्यामुळेच त्यांच्या कारवाईच्या भीतीने तर हा संशयास्पद कचरा किंवा मुदत संपलेले साहित्य रात्रीच्या अंधारात इथे आणून टाकले नाही ना? अशी शंका उपस्थित केली जात आहे. अर्थात, यामागे अन्य काही कारणे देखील असू शकतात.

"सुंदर अशा गणेशखिंडीमध्ये काहीतरी संशयास्पद कचरा प्रकारातील घाण टाकल्याचे दिसून येत आहे. याकडे वन विभागाचे लक्ष आहे का? हे नेमके काय आहे आणि कोणी टाकले, याची तत्काळ चौकशी आणि तपास व्हायला हवा," अशी मागणी 'वसुंधरा मित्र' आणि 'इको फ्रेंडली क्लब'चे संस्थापक परशुराम कोकणे यांनी केली आहे.

पर्यटन आणि वन क्षेत्राचे नुकसान करणाऱ्या या घटकांचा शोध घेऊन वन विभाग आणि संबंधित प्रशासनाने तातडीने कारवाई करावी, अशी मागणी आता जोर धरू लागली आहे.