BloomFields..The pre-school

परंपरेची शिदोरी आणि संस्कृतीचा गंध घेऊन
BloomFields..The pre-school चे वार्षिक स्नेहसंमेलन यंदाही आनंद, उत्साह आणि अभिमानाच्या वातावरणात दिमाखात पार पडले. या स्नेहसंमेलनाने केवळ एक कार्यक्रम न राहता, महाराष्ट्राच्या लोकसंस्कृतीचा जिवंत सोहळा साकारला.

यावर्षीची संकल्पना होती - “महाराष्ट्राची लोकधारा”.
रामप्रहरी येणाऱ्या वासुदेवाच्या मधुर हाकेने कार्यक्रमाचा श्रीगणेशा झाला आणि त्यानंतर भूपाळी, महाराष्ट्र गीत, अभंग-भजन, भारूड, जागरण-गोंधळ, शौर्याने ओतप्रोत पोवाडा आणि ठसकेबाज लावणी अशा लोककलेच्या रंगांनी रंगमंच सजला.
चिमुकल्या कलाकारांनी सादर केलेल्या या लोककलेच्या अविष्काराने प्रमुख पाहुणे, पालकवर्ग, हितचिंतक आणि उपस्थित प्रेक्षक मंत्रमुग्ध झाले. बालकांच्या चेहऱ्यावरील आनंद, निरागस भाव आणि आत्मविश्वास पाहून प्रत्येकाचे मन भरून आले.

या स्नेहसंमेलनाचे आणखी एक वैशिष्ट्य म्हणजे यावर्षीपासून सुरू करण्यात आलेला “महादेववाडी भूषण” पुरस्कार. महादेववाडी परिसरातील सामाजिक, शैक्षणिक, सांस्कृतिक, अध्यात्मिक व राजकीय क्षेत्रात निःस्वार्थपणे कार्य करणाऱ्या भूमिपुत्रांचा गौरव करण्याचा हा अभिनव आणि प्रेरणादायी उपक्रम आहे.

या वर्षीचा पहिला मानाचा पुरस्कार अशा व्यक्तिमत्त्वाला देण्यात आला, ज्यांनी शून्यातून विश्व उभे केले. अत्यंत प्रतिकूल परिस्थितीतून शिक्षण पूर्ण करून “Eagle Eyes Bouncer and Guard Services” या संस्थेच्या माध्यमातून सुमारे ५,००० युवक-युवतींना रोजगाराची संधी उपलब्ध करून देणारे, आणि भविष्यातही हजारो हातांना काम मिळावे या ध्येयाने कार्यरत असलेले, थोर गणेशभक्त — आमचे स्नेही, संस्थापक व CEO श्री. Manesh Ghule Patil (मनेश शंकरराव घुले पाटील) यांना “महादेववाडी भूषण” पुरस्काराने गौरविण्यात आले.

या प्रसंगी संकल्प सामाजिक संस्था, ढगाई ग्रामविकास संस्था तसेच सामाजिक क्षेत्रात उल्लेखनीय कार्य करणारे आमचे बंधू श्री. उमेश कोंढाळकर यांची उपस्थिती कार्यक्रमाची शोभा वाढवणारी ठरली.

हा संपूर्ण सोहळा यशस्वी होण्यासाठी शाळेतील शिक्षिका सौ. सपना बोटे, सौ. अंकिता श्रीवास्तव आणि सौ. विजयामावशी आल्हाट यांनी पडद्यामागे अथक मेहनत घेतली. कार्यक्रमाचे सुयोग्य नियोजन शाळेच्या संस्थापिका सौ. हेमलता घुले आणि मुख्याध्यापिका सौ. नुतन बडदे यांनी अत्यंत कौशल्याने केले. नेहमीप्रमाणे संस्थापक श्री. निलेश घुले आणि श्री. संदीप बडदे यांनी मार्गदर्शनाची भक्कम साथ दिली. तसेच कु. आर्या घुले आणि कु. वेदांत बडदे यांनी पालकांसाठी छान प्रश्नोत्तरी घेऊन कार्यक्रमात रंगत आणली.

“ही शाळा केवळ शिक्षण देणारी नसून संस्कार घडविणारी संस्कारशाळा आहे,” असे गौरवोद्गार प्रमुख पाहुण्यांनी काढले. यावेळी गेल्या वर्षभरात शाळेत राबविण्यात आलेल्या विविध शैक्षणिक, सांस्कृतिक व सामाजिक उपक्रमांची माहितीही उपस्थितांना देण्यात आली.

संस्कार, संस्कृती आणि समाजभान यांची सांगड घालणारे हे स्नेहसंमेलन उपस्थित प्रत्येकाच्या मनात एक सुंदर आठवण ठरून राहिले.