SSF Mattanode

മനസ്സാക്ഷിയെ ഞെട്ടിപ്പിക്കുന്ന റാഗിംഗ് ദൃശ്യങ്ങളാണ്
കോട്ടയം ഗവൺമെന്റ് നഴ്സിംഗ് കോളേജിൽ നിന്ന് പുറത്തു വന്നത്. മനുഷ്യത്വം മരവിക്കുന്ന ക്രൂരത ചെയ്തു കൂട്ടിയത് ആതുര സേവന വിദ്യാർത്ഥികളാണ് എന്നത് കുറ്റകൃത്യത്തിന്റെ ഭീകരത വർദ്ധിപ്പിക്കുന്നു. റാഗിംഗിനിരയായവിദ്യാർത്ഥിയുടെ ദയനീയ നിലവിളി ഹൃദയത്തിൽ ഒരുത്തിരി നനവ് ബാക്കിയുള്ള ആരുടെയും കരളുലക്കും. കഴിഞ്ഞ കുറച്ചു കാലങ്ങളായി ഒട്ടും ആശാവഹമല്ലാത്ത വാർത്തകളാണ് വിദ്യാലയങ്ങളിൽ നിന്ന് കേട്ടുകൊണ്ടിരിക്കുന്നത്. തൃപ്പൂണിത്തറയിലെ 15 കാരന്റെ മരണത്തിൽ നിന്ന് റാഗിംഗിന്റെ സംശയ നിഴലുകൾ മായും മുമ്പേയാണ് കോട്ടയം ഗവൺമെന്റ് നഴ്സിംഗ് കോളേജിൽനിന്ന് കേരളം ഞെട്ടിയ നിലവിളി ഉയരുന്നത്.
വയനാട് വെറ്റിനറി കോളേജ് വിദ്യാർത്ഥിയായിരുന്ന സിദ്ധാർത്ഥിന്റെ റാഗിംഗ് മരണവും മറവിയിലേക്കടുത്തിട്ടില്ല.

ക്യാമ്പസിലേക്ക് പുതുതായി കടന്നുവന്ന ഒരു വിദ്യാർത്ഥി അപമാനത്തിന്റെയും പീഡനത്തിന്റെയും അറപ്പുളവാക്കുന്ന ക്രൂരമായ വിനോദങ്ങളുടെയും അനുഭവങ്ങളുടെ കൂർത്ത ആണിമുനകളിലൂടെ നടന്നു കയറണമെന്ന തിട്ടൂരങ്ങൾ ആരാണ് നമ്മുടെ വിദ്യാലയങ്ങളിൽ അടിച്ചേൽപ്പിച്ചത്. അനേകം പതിറ്റാണ്ടുകളായി
തലമുറകൾ കൈമാറുന്ന ഇത്തരം മാനസിക വൈകൃതങ്ങളുടെ ജീനുകളെ ആരാണ് നമ്മുടെ വിദ്യാർത്ഥികളിൽ കുത്തിവെക്കുന്നത്...

ക്യാമ്പസുകളിൽ ആധിപത്യമുള്ള വിദ്യാർത്ഥി യൂണിയനുകളുടെ നേതൃരംഗത്തുള്ളവർ തന്നെയാണ് പലയിടത്തും ഇത്തരം ക്രൂര കൃത്യങ്ങൾക്ക് മുന്നിൽ നിൽക്കുന്നതും മൗനാനുവാദം നൽകുന്നതും. അനേകം റാഗിംഗ് മരണങ്ങളും കുറ്റകൃത്യങ്ങളും ലഹരി ഉപയോഗങ്ങളും ക്യാമ്പസുകളിൽ നടമാടുമ്പോഴും അധികാരികൾ പാലിക്കുന്ന മൗനം തന്നെയാണ് ഇത്തരക്കാർക്കുള്ള ഇന്ധനം. കൊടും കുറ്റവാളികൾ പോലും അറക്കുന്ന പീഡനങ്ങൾക്ക് യാതൊരു വിധ മനസ്സാക്ഷിക്കുത്തുമില്ലാതെ ഇറങ്ങിപ്പുറപ്പെടാൻ എങ്ങനെയാണ് ഇവരുടെ മനസ്സ് പാകപ്പെടുന്നത്...?

റാഗിംഗ് പീഡനങ്ങൾക്കെതിരെ പ്രായോഗിക പരിഹാരങ്ങൾക്ക് വേണ്ടിയുള്ള ക്രിയാത്മക ഇടപെടലുകൾ നടത്താതെ കുറ്റകൃത്യത്തിന്റെ നടുക്കുന്ന ദൃശ്യങ്ങൾ പ്രചരിപ്പിക്കുന്നതിൽ മത്സരിക്കുകയാണ് നമ്മുടെ മാധ്യമങ്ങളും.
റാഗിംഗ് പീഡനങ്ങളും മരണങ്ങളും നടക്കുമ്പോൾ മാത്രം ഉണരുന്ന പൊതുബോധത്തിനും ഈ പാരമ്പര്യ കുറ്റകൃത്യത്തിൽ പങ്കുണ്ട്.

ഇനിയും പ്രതികരിക്കുന്നില്ലെങ്കിൽ,
നിസംഗതയോടെ എല്ലാം നോക്കി നിൽക്കുകയാണെങ്കിൽ,
നിസ്സഹായതയോടെ കൈമലർത്തുകയാണെങ്കിൽ അധികാരികളേ... എല്ലാം കൈവിട്ട് പോകും.

ഇനിയെത്ര നിലവിളികളുയർന്നാലാണ്,
കണ്മുന്നിൽ ഇനിയെത്ര ജീവനുകൾ പിടഞ്ഞു തീർന്നാലാണ്, പച്ചയിറച്ചിയിൽ കൂർത്ത കോമ്പസിന്റെ മുനകൾ ഇനിയെത്ര വൈകൃതങ്ങളുടെ വൃത്തങ്ങൾ വരച്ചാലാണ്, അക്ഷര മഷി പുരണ്ട പാഠപുസ്തകങ്ങളിൽ ഇനിയെത്ര കട്ട ചോര തെറിച്ചാലാണ്,ഇനിയെത്ര ചോര മരവിച്ച കാഴ്ചകൾ കണ്ടു മടുത്താലാണ് , ഈ അനീതിക്കെതിരെ നിങ്ങൾ വിരലുയർത്തുക...?

© SSF Kerala

SSLC/+2 കഴിഞ്ഞ പെൺകുട്ടികൾക്ക് റഗുലർ പഠനം. കാരന്തൂർ മർകസ് ക്യാമ്പസിൽ, ഹാദിയ ബിരുദത്തോടൊപ്പം ഭൗതിക പഠനം നടത്താം.