Tiny Tales

अमरावती, परभणी, पालघर, पुणे, रायगड, नंदुरबार, गडचिरोली, नाशिक, हिंगोली, अशा भरपूर जिल्ह्यांमध्ये शिक्षक आणि खास करून अंगणवाडीच्या ताईंसोबत काम करतोय!
या प्रकल्पामुळे आपण कधी नावही न ऐकलेल्या गावांमध्ये फिरता येतं, वेगवेगळ्या माणसांना भेटता येतं, ही आम्हाला आमच्या कामातली सगळ्यात आवडणारी गोष्ट आहे.

नाटकाच्या माध्यमातून आपण मुलांसोबत काम कसं करू शकतो, गोष्टी-पुस्तकं यावर किती नवनव्या पद्धतीने काम होऊ शकतं, नाटक आणि शिक्षण याच्या मदतीने
मोकळेपणानं मुलांना बोलतं कसं करू शकतो ते बोलीभाषेतून हळूहळू पुस्तकांकडे कसं नेऊ शकतो आणि सोबत, चित्र, रंग यांचा मेळ घालत मुलांसोबतचं काम कसं करू शकतो अशा विषयांवर प्रात्यक्षिक करून बघत काम होतं.

खरंतर या ताईंसोबत नाटकाच्या, गोष्टींच्या अंगानं काम करायला जातो आणि या कामासोबत भरपूर प्रेम, त्यांच्या गोष्टी, गाणी घेऊन येतो.
बाकीच्यावेळेस जपून, सावरून वागणाऱ्या, सगळ्यांचा विचार करणाऱ्या ताया जेव्हा कार्यशाळेत मनसोक्त नाचतात, गातात, कसलाच विचार न करता बिनधास्त बोलतात तेव्हा त्यांचं हे दुसरं रूप बघताना फार भारी वाटतं.
लकबी टिपणाऱ्या, आमची नक्कल करून दाखवणाऱ्या, घरची काम करून, बस बंद असताना ४०-५० किलोमीटर प्रवास करत येऊनही जोरजोरात हसणाऱ्या, पदर खोचून आरडाओरडा करत नाचणाऱ्या, खड्या आवाजात गाणी गात रात्र जागवणाऱ्या तायांना भेटणं हीच खूप भारी गोष्ट असते.

सुरूवातीला अनोळखी असणाऱ्या ताया, हळूहळू त्यांच्या मनातल्या गोष्टी सांगतात. काम करत असतानाची गमतीची गोष्ट म्हणजे त्या हे सगळं स्वतःच्या आयुष्याशी जोडून बघतात. आवाजातली पट्टी शिकवताना स्वतःशी कोण कुठल्या पट्टीत बोलतं हे शोधतात. आता घरातून येणारा नवऱ्याचा आवाज सुद्धा कुठल्या पट्टीत आहे, हे त्या ओळखतात. भावना समजून घेताना त्यांच्याशी कोण कसं बोलतं हे आठवून ती वाक्य जोडून पाहतात.

‘क्वेस्ट’ ही संस्था गेले अनेक वर्ष या अंगणवाडीच्या सेविकांसोबत ‘पालवी’ प्रकल्पाच्या माध्यमातून काम करतेय. त्यांच्यातल्या अनेक छोट्या गोष्टी पारखून बळ देतेय. क्वेस्ट सारख्या संस्थेमुळं अशा नवनवीन ठिकाणी जाऊन काम करता येतं! हे सगळं काम खूप कमाल आहे. कामाच्या निमित्तानं भटकताना भेटणारी ही माणसाचं काम करत राहण्यासाठी ऊर्जा देतात.
Video shot, edited and all the publicity handled by:



QUEST Kalpesh Samel Pratiksha Khasnis Tushar Marade Nilesh Marade Pralhad Kathole Kishor Kathole Harshal Kathole Earthian Art Foundation fans