OusSeif CS

السلام عليكم ..
نشفا وحد المرة كنت صادفت تعليق يقول فيه بالمعنى : "الآلة برمجها مبرمج لأداء أشياء معينة بطريقة معينة يحددها هو"

التعليق تاعو تاع إنسان مطلع ... صح ماهوش غالط ... بصح كي جا الذكاء الإصطناعي و مع التطور الكبير ديالو ... تبدلت الحكاية هادي كامل ولازمو يدير ميزاجور

إذا .. الموضوع هو ... ما الفرق بين البرمجة التقليدية و البرمجة باستعمال تقنيات الذكاء الإصطناعي ؟

الإجابة هي :
قبل سنوات و قبل ثورة الذكاء الإصطناعي كانت البرمجة عبارة عن كتابة أكواد codes خاصة بكل حالة ممكنة من حالات الإستخدام ... يعني يبرمجو يقولو ..
إلاكان صرات هاكدا ...... دير هاكدا ......
وإيلا ماصراتش دير هاكدا ....
If ... else
و يبقى يكتب يكتب يكتب ههه بصح حتى لوين ؟ ... مستحيل يقدر يكتب كل الحالات الممكنة بالنسبة لبعض المهام والمشاكل المستعصية ... هنا جا الذكاء الإصطناعي و قالو أنا هو الحل ... أنا نعطيك تقنيات باش ماتتعبش

إذا باستعمال تقنيات الذكاء الإصطناعي أصبح بامكان المبرمج أن يبرمج قدرة على التعلم و الفهم apprentissage ... بدل أن يكتب جميع الإحتمالات بيده ... هو فقط يمرر حجما هائلا من المعلومات الوافرة على الأنترنت big data على تلك القدرة على التعلم ... وحدها تتعلم ههه شغل كيما إنسان يخلق صغير مبعد يجرب يجرب و هاكدا و يتعلم ... و ديجا تعريف الذكاء الإصطناعي هو محاكات لصفات الذكاء الخاصة بالإنسان أو الحيوان (هناك تقنيات مستوحات من النمل ... من الطيور ... من الضفاضع ههه من كلش) او من الطبيعة ... المهم ذكاء

يعني باختصار ... الآلة أصبحت أكثر تحررا من ذي قبل ... لكن ليس إلى درجة التحرر التام 😁 فعقل الإنسان خلق عظيم و هي مجرد محاكات لأجزاء منه ... ديجا عليه راهي تدور الدنيا 😅 هذا جواب تاني للي يخافو الآلة تديلهم بلاصتهم ... خصك برك تخدم عقلك اللي أذكى من عقلها ... تخلي روحك انت تروضها و تستعملها لصالحك ... ماشي تديلك بلاصتك ... ساو ... مهمى كان تخصصك حاول التعود على استعمال الأدوات الحديثة على غرار chatGPT و أمثاله من الأدوات الكثيرة و المتنوعة و ابقى على اتصال بالمجال ... مع تراكم المعارف من خلال كل تجربة استعمال تمر بيها ... مع مرور السنوات ماتلقاش روحك متأخر على مواكبة التطور لأنو راح تتخلط على ما أعتقد 🤣 و تبقى انسان فعال و بالتالي تكون ليك حاجة و بالتالي تلقى الخدمة 😁 (الأسطر الأخيرة عبارة عن رأي شخصي)