Aimene Scents

السلام عليكم..
عشاق العطور ان شاء الله تكونوا بخير و على خير ..
اليوم جبتلكم موضوع مهم في عالم العطور و حاجة لي كل عاشق للعطور لازم يعرفها لي هي "الهرم العطري" ولا بالانجليزية "perfume pyramid"
مالا تبعوا معايا للاخير نعرفوا واش هو هاذ الهرم و الفرق بين المستوايات تاعوا واش معناها مصطلح "نونات" ؟

كيما نعرفوا كامل كل عطر يمتلك تركيبة و ريحة خاصة بيه لي تخلينا نميزوا هاذ العطر عن عطور اخرى ..هاذ التركيبة تتضمن مستخلص لمزيج من المكونات الطبيعية مثل : الزهور ،الفواكه ،الاعشاب ،الجلود ...الخ
و لي بدورها تتألف من 3 مستويات تسمى "نوتات العطر" او "هرم العطر"
بمعنى اخر نوتات العطر هي الهرم لي تستقر عليه المكونات حسب وزنها اكان في قمة التركيبة ، او في الوسط ، او في القاعدة (الصورة توضح المعنى اكثر)
و هنا نقولوا انو النوتات العليا تحوي مكونات خفيقة الوزن ، اما النوتات الوسطى فتضم مكونات اثقل بقليل ، و المكونات الثقيلة تتواجد في القاعدة او النوتات السفلى.

واش هو الفرق بين النوتات ؟
كيما قلنا النوتات هي 3 مستويات ، تختلف حسب الوزن و وقت التبخر بعد استعمال العطر .

النوتات العليا "Top notes" : هادي النوتات تكون في القمة و تكون فيها مكونات خفيفة الوزن كيما الحمضيات و الفاكهة الاعشاب ..
و تتبخر رائحتها بعد حوالي 15 دقيقة من استعمال العطر

النوتات الوسطى "middele notes" : تكون في وسط الهرم و فيها مكونات ذات وزن اكبر مثلا الياسمين ، الورد ، النيرولي ...
تتبخر رائحتها من 20 الى 60 دقيقة من نثر العطر

النوتات القاعدية "base notes" : هادي تكون في قاعدة الهرم و فيها المكونات الاثقل لي تدوم لما يقارب 6 ساعات مثل الاخشاب ، العود ، البخور ،الباتشولي ...

ان شاء الله تكونوا لقيتوا افادة و نتلاقاو في مواضيع اخرى باذن الله .