Orange Design

تصميم ملصقات لمنتج الشيبس لأحد الشركات خاصة بالصناعات الغذائية في الجزائر

: "هذاك لي يقولي راك تغلي.. لقيت لي يخدملي بـ2000 دج ولا 1500 دج"😑

نحب نقولك حاجة وانت أفهم مليح:
مجال التصميم الجرافيكي ماشي لعبة، ماشي غير رواح وقول خاصني تصميم تروح لمصمم هاوي حاشا لي مايستاهلوش يخدم بأبخص الاسعار يفتح تطبيق يخدملك فوطو وخلاص....التصميم هو واجهة مشروعك، وهو اللي يقرّر واش زبون يشري ولا يروح. هنا اطرح سؤال على نفسك علاش ؟؟ ابحث سقسي اهل المجال يفهموك

🔹 المصمّم المحترف: يخدم بفكرة، بدراسة، ببرنامج التصميم احترافي، وبخبرة. يعطيك هوية براند تبقى واقفة مع مشروعك سنين.
🔹 الهواة: يفتح Canva، يبدّل ألوان في قالب جاهز، ويعطيهالك على أساس "تصميم". لا دراسة للسوق، لا أساسيات، لا قيمة. منيش نطيح من قيمة ومميزات كانفا او لي يخدمو بيه .... بل هذوك لي لايفقهون في المجال ويقولك انا مصمم وتلقاه يطيح السوق لخاطرش هو مراهش عاطي قيمة لنفسو كيفاه يعطي قيمة للمجال ؟ هنا الكارثة العظمى
🚩 والمشكل الكبير من بعض العملاء :
كي تروح عند مصمم تقولو غالي بصح في المطبعة كي تروح عندهم يقولولك الطباعة تسقاملك ب "10 ملايين للكمية "، تخلّص وأنت تضحك وفرحان . اسأل نفسك باش تعرف الحقيقة
أما كي توصّل للمصمّم، لي قاعد ساعات طويلة قدام شاشة الحاسوب، يوجّع في ظهرو وعينيه وتطلب منو تصميم ، تبدأ تتمسخر في الاسعار !

🔎 والمضحك أكثر:
يجي عندي عميل يقولي: "عندي ليزيتيكات خدمتهم من قبل وماعجبونيش، حاب نعاودهم عندك لخاطر شاف الخدمة وعجباتو وقنع بيها " كي نقولو السعر يقولي: "غالي، لقيت لي يخدملهم 1500دج و 900 دج"
ها مالا روح عندو! ومن بعد كي ما يعجبوكش ، وتبقى تعاود وتعاود بنفس الاسعار الي عجبوك من قبل حتى تملّ وتخسر دراهمك … ساعتها راح تفهم الفرق بين مصمّم محترف يخدمك خدمة تدوم، وهاوي يعطيك حاجة ترجع وتبقى تعدل فيها كل مرة.وهذي اذا لقيت فيشي سورس تقدر تموديفي 🙃
الخدمة الاحترافية تخلّيك تفهم وحدك معنى فرق الأسعار بين الرخيص والغالي. وكذلك الخبرة من اصحاب المجال

✍️ الخلاصة واضحة:
– تقدر تخير لي يخدمو 100ميل وتبقى تخدم وتعاود
– وتقدر تخير مصمّم محترف من خلال اعماله يعطيك قيمة، براند، وواجهة تشرفك وتشرف مشروعك.ماتزيدش تحوس موراها

⚠️ وزيد كلمة أخيرة:
كي ما تعرفش مجال ماشي من مجالك، سقسي وتعلّم قبل ما تهدّر. ماشي تتبع الرخيص وتجي تطيّح من قيمة الخدمة.
كونك يا أيها العميل… شوية واقعي ومنطقي.

🚀 وبالمناسبة…
كي تلقى لي يخدمولك بفليكسي و1000 دج، روح عندو يخدملك ماشي تجي عندي نعطيك الاسعار تبدا تكسرلي راسي وتضيعلي وقتي والوقت ثمين ..ماعجباتكش الاسعار بكل اختصار انصرف ب احترام فقط وربي يعاونك
غير جهّز روحك: نهار تفهم قيمة التصميم الصح، راك تكون ضيّعت روحك مليار سنة ضوئية روطار.