Edward Edilbi

عندما تعجب بسيارة معينة مثلاً، تجد نفسك انك تراها كل يوم وفي كل لحظة!
في الحقيقة أنت كنت تراها كل يوم ولم يتغير أي شيء، إلا أنك وبطريقة غير مباشرة جعلت دماغك يهتم بها أكثر من اي تفاصيل اضافية.
الحقيقة أن هناك الكثير من الفرص التي تصادفك يومياً، ولكن دماغك لايهتم لها بكونك لم توجهه لذلك. منذ اليوم ابدأ ببرمجة دماغك لتتناسب مع أهدافك، وانتظر المفاجآت.

الأكتئاب شي عادي والحل بيبدأ من عندك

مكتئب ؟ حاسس بملل بحياتك ؟ حاسس الامور يلي عم تساويها مالها قيمة ؟
نازل اشعرة او نازل كتابة ببوستات فش خلق ليل نهار ؟
دوبارتك عنا ..

كتير من #السوريين نتيجة لوضع البلد او وضعهم خارج البلد ووجودهم في حالة من الغربة والامور يلي مو متعودين عليها عم يحسو بكتير من هي الاعراض .. ويمكن اكتر

هاد الشي طبيعي .. هاد الشي بسموه باجنابيا اكتئاب !!
يمكن نحنا كشرقيين ومن وضع مجتمعاتنا الطبيب النفسي هو خيار غير موجود ع القائمة ..
بينما الاجنبي بشكل عام لازم يكون عندو جلسات دورية حتى لو مالو حاسس بهل الشي ..

لانو الصحة النفسية بتأثر بشكل مباشر وغير مباشر ع الصحة العقلية والجسدية ..
وطبيعي من الشي يلي عم نعيشو كشعب سوري نكون معرضين لهي الامور ولو مو حاسين فيها ..

مالي طبيب نفسي ولا مختص, بس يمكن شخص عاش تجربة وقرا كتير عن امور ممكن تساعد .. لهيك حبيت شاركم بعض النقاط يلي ممكن تساعد .. وتذكر الاكتئاب عادي يصيبك وحلو ببلش من عندك انت بس ..

١- الابتعاد عن العادات السيئة:
مسيك ورقة وقلم وسجل كلشي ساويتو او بتساويه بشكل روتيني باخر اسبوعين
عميل قائمة بالامور السيئة أو العادات الغير مفيدة بحياتك يلي لازم تغيرها او تستبدلها وحاول تغير
شي مو سهل اكيد .. كل المطلوب منك باول فترة انك تحاول ..

٢- الرياضة:
الرياضة ولو كانت المشي يوميا لفترة جيدة حتساعدك تتخلص من التوتر والضغط يلي عايشو

٣- عادات جديدة:
حاول تقوم بامور جديدة خارج روتينك اليومي ..
كليوم حط قائمة بالشغلات الجديدة يلي عم تساويها وحسيت براحة خلالها .. ساويها هي جزء من روتين حياتك اليومي
الاكل الصحي حتى لو مالك مقتنع بأثر ع نفسيتك, خفف سكريات ومنبهات واتبع نظام صحي وخليه عادة عندك ..

٤- اجتمع مع الناس وابتعد عن العزلة
كل ما بتقضي وقت لحالك صافن بالحيطان عم تندب حظك كل ما بتزيد حالتك, خالط اصدقائك ولو حسيتون بنفس المود ابتعد عنون شوي لتمشي امورك ورجاع حاول تساعدون, بدل ما تضيع وقت ع الفيسبوك استغلو لتلاقي ايفنتس حوليك ممكن تحضرها وتستفيد

٥- التطوع والعمل المجتمعي:
مافي احساس اقوى من الشعور بالرضى عن النفس لما بتساعد غيرك, مهما كنت بعيد وغير جاهز نفسيا جرب, شوي شوي حتحس بشعور لا يوصف, ما بتعرف كيف تتطوع ؟
قريبا #دوبارة حتعطيك خيارات للتطوع, بس بكل الاحوال مساعدة الناس حتى لو بنشر بوستات مفيدة ممكن تفيد الناس حوليك هية بداية جيدة ..

٦- لا تخجل انك تطلب المساعدة من اي شخص حوليك, اي شخص بتثق فيه حكيلو وحاول تفضفض .. بس لا تروح كتير بهل الاتجاه لانو سلاح ذو حدين احكي وفضفض بس لا تكتر مشان ما يضل عقلك ضمن هي الدوامة وخلي الشخص يلي معك يذكرك بالعادات والامور الجيدة يلي بدك تعملها

٧- ابتسم :) وذكر نفسك عبر ملاحظات ممكن تحطها ع البراد بين كتبك ع موبايلك تذكرك انو انت قوي والحياة حلوة وانك قادر تطلع من هالدوامة

٨- يمكن مالو خيار مطروح للجميع, بس للبعض الراحة النفسية ممكن تكون ضمن صلاتك وعلاقتك بربك ..

بالاخير كل هالحكي بلا ارادة ما بفيد .. خلي ارادتك قوية ولا تستسلم من اول سقوط ..
مافي شي اسمو فشل .. في شي اسمو تجربة غير ناجحة وفي نجاح ..(فيك ترجع لبوستنا حول دائرة الفشل هون https://goo.gl/e8aFRr)

وبنصح تشوفو هالفيديو لئيتلكم ياه مترجم بعنوان الكلب الاسود (The Black dog)


بلش اول خطواتك بمشاركة هالمنشور مع اصدقائك وفيدهم كمان ..

تبقو بخير #دوبرجي
www.dubarah.com

كل سنة وأنت تاج راسي Sanaa Al Chamaa

#دوبارة #سوريا

بعرف متذكرين ومحضرين كتير لعيد الأم ومابدكم مين يذكركم ..

بس كتير ناس بعيدة عن اهلا وصعب يكونو معها ..
لهيك دوبارة اليوم حبيت تعمل حملة

الفكرة بسيطة وسهلة:
- لاقي طريقة حلوة وبسيطة تعايد فيها والدتك
- صورها بشكل واضح (متل صورة البوست مثلاً)
- وبعتلنا ياها لننشرها ع صفحة دوبارة

وأكيد مالح ننسا الام السورية .. ام الشهيد .. ام المغترب .. ام المعتقل .. ام المعتر ..

تذكر أكيد في ام بتعرفها ماعندها مين يعايدها اليوم لا تنساها بطريقك بتلاقيها قد الدنية ..
واذا ما بتعرف حدا فريق ملهم التطوعي لسا مستمر بحملة يلي بلشناها من سنتين

فيك تزور صفحتهم لتساهم معهم بهدايا أو معايدات للامهات يلي مابقي عندهم مين يعايدهم ..

ناطريكم مع صور لافكار مبدعة متل ما عودتونا ..

مع المحبة #دوبرجي يلي مشتاق لامو ..
www.dubarah.com

دائرة الفشل ! عنوان يمكن سوداوي .. يمكن بلامس واقع ..
أو يمكن حرك شعور بشع بالبعض ..

اليوم دائرة الفشل هي موضوعنا .. هي الدائرة يلي عاملة بعبع لكتير
دائرة حابسة كتير ناس جواتها وخطيرة .. ومأثرة ع مجتمعات بحالها !!

بس بالنهاية هي دائرة وهمية .. قفص وهمي نحنا مندخلو بارادتنا او منستفيد منو

الفشل شو هو ؟ هل هو شي سيئ ؟ لأ الفشل شي طبيعي وجميل ولازم بحياتنا ..
الفشل هو مجرد محاولة غير ناجحة .. هو خبرة عم نكتسبها لخطوة تانية ناجحة
او يمكن فاشلة كمان .. مافي داعي ذكرك اديسون مخترع الكهربا كم الف مرة فشل
حتى اينشتاين وغيرون يلي ما حسنو يقدمو الامور الناجحة الا بالاستناد ع الفشل يلي سبقها

الفشل هو شي خطير لما منرسم براسنا انو هو خطير .. هو مشكلة لما منكتئب ومنعمل منو مشكلة داخلية .. وتخلينا نخلق ردود فعل خاطئة مبنية ع الوهم يلي رسمناه ..

تذكر الفشل لا يعني أنك لن تستطيع الوصول !
لا اكيد فيك ! الفشل يعني أنو لازم تلاقي طريق آخر للوصول!

الفشل لا يعني أنك أتلفت حياتك!
اكيد لأ ! الفشل يعني أن عندك حجة قوية للبداية من جديد!

مابدي استطرد اكتر بتعريف الفشل ع قد ما بدي نحكي بخطوات كيف نستفيد من الفشل لنعمل شي جميل, شي ناجح ومتل ما بدنا.

بدي منك تجيب ورقة وقلم وتكتب عليها انا فاشل لان:

- حدد الامور يلي فشلت فيها وحابب تكمل فيها.

- فكر بكل شغلة فشلت معك ليش فشلت ؟ عامل ذاتي ولا عامل خارجي ؟

- اذا عامل ذاتي فكر باخطائك .. صنفها وجرب تلاقي حلول بسيطة الها او استعين بصديق

- عامل خارجي .. فيك ترجع تحاول بوجودو؟ اذا فيك رجاع رسوم خطة وخطوات تمشي عليها .. ما بتحسن تتلافاها بعيد عنها حاول تجرب بعيد عنها .. او جرب شي جديد اذا مافيك

- حط ببالك قاعدة اساسية اذا لم يكن ما تحب احبب ما يكون حتى يكون ما تحب .. مالها معقدة ولا مفلسفة .. مو حابب وظيفتك ؟ مو هي المجال يلي بتحبو طيب شو تعمل ؟ حبها ونجاح فيها لتخلق فرصة تحسن فيها تساوي يلي بتحبو ..

- حط لنفسك اهداف شهرية .. اسبوعية .. يومية تنفذها وتنجح فيها ..

- خليك ايجابي .. انت مو حابب شغلك ؟ غيرك مو ملاقي شغل .. حميد ربك

- مو عيب تقع بمطب وتقع .. ارتاح وفكر صح وقوم من جديد ..

- كتوب هدفك ع اكتر من ورقة ملاحظات حطها باكتر من مكان ع البراد بين كتبك .. على كمبيوترك وموبايلك ..

- حفز نفسك, خلي صديقك المقرب يساعدك .. خبرو بهدفك وخليه يذكرك كل ما بعدت عن الطريق بهدفك لترجع عالطريق الصحيح.

والاهم من هاد كلو العزيمة, بس لما بتآمن انو الفشل هو خطوة نحو النجاح وهو شي مؤقت صدقني لح تقدر تعمل اي شي بدك.

الحديث طويل فيكم تضيفو اي شي بتلاقوه ايجابي وفادكم عبر تجربة شخصية
تذكر هي دائرة وهمية .. انت فيك تلغيها وترسم نجاحك بدالها.

مع المحبة #دوبرجي
www.dubarah.com