The Key

Ահա Ես ձեզ հետ եմ ամեն օր, մինչև աշխարհի վերջը։ Մատթեոս 28․20

Լավ է, որ կա Նա, Ով «հավիտենական է», Ով անփոփոխ կերպով մեզ հետ է։ Ուրախալի է, որ առօրյա կյանքի անելիքների մեջ կա անխորտակելի ժայռ։ Ընկե՛րս, քեզ համար ժանգոտող, ցեցին զոհ գնացող, հնացող գանձեր մի՛ դիզիր, այլ ամբողջ սրտով փնտրի՛ր Նրան, Ով հավատարիմ է մնում քեզ հավիտյան։ Քո տունը մի՛ կառուցիր կեղծավոր աշխարհի երերացող ավազի վրա, այլ հույսդ դիր այդ ժայռի վրա, որը գալիք տեղատարափ անձրևների ու ուժգին հեղեղների մեջ չի դողա ու անսասան կմնա։

Ընկե՛րս, աղերսում եմ, գանձերդ պահիր միակ ապահով վայրում, որտեղ երբեք չես կորցնի․ Հիսուս Քրիստոսում։ Քո ողջ սերն ուղղի՛ր դեպի Նրա անձը։ Քո ամբողջ հույսը դի՛ր Նրա վրա, ողջ վստահությունդ՝ մաքրագործող արյան վրա։ Քո ողջ ուրախությունն արտահայտի՛ր Նրա ներկայությամբ, և պիտի ծիծաղես կորուստների վրա և չես վախենա մահից։ Հիշի՛ր, որ այգիների ու պարտեզների բոլոր ծաղիկները թոշնելու են իրենց ժամանակին, և գալու է օրը, երբ ոինչ չի մնալու՝ բացի սև ու սառը հողից։

Մահվան ոսկրոտ ձեռքը կմարի նաև քո մոմը։ Բայց, մոմը հազիվ մարած, ինչպիսի՜ երջանկություն կլինի արևի լույսը տեսնելը։ Քո և այն ամենի միջև, ինչ ունես, շուտով սև հեղեղ է անցնելու։ Միացրո՛ւ սիրտդ Նրա հետ, Ով երբեք քեզ չի լքի։ Վստահի՛ր Նրան, Ով քեզ հետ կանցնի փոթորկոտ, նենգ ընթացքը, Ով քեզ անվնաս կհասցնի երկնային ափին և երկնքում հավիտյան կնստեցնի Իր աջ կողմում։

Գնա՛, տրտմության որդի, և բոլոր ցավերդ դի՛ր Ընկերոջդ ոտքերի առաջ։ Քո բոլոր հոգսերը վտսահի՛ր Նրան, Ով երբեք չի թողնի քեզ ու թույլ չի տա, որ քեզ խլեն Իր ձեռքից։ Այդ Ընկերը Տեր Հիսուս Քրիստոսն է, Ով «երեկ, այսօր և հավիտյան նույնն է»։ «Ես ձեզ հետ եմ ամեն օր» սա սնունդ է, որը հագեցնում է իմ հոգին։ Մնացած բոլորը, եթե ցանկանում են, կարող են ինձ լքել։

Չ․ Սպերջեն