COD - Center For Openness And Dialogue

Tema globale e CreativeMornings për muajin korrik është COMPETITION, rreth së cilës do të flitet në 253 qytetet në botë, që aplikojnë këtë projekt prej vitit 2008.
Në Tiranë kemi ftuar Lenida Halilaj, psikologe, analiste dhe moderatore mediatike, e cila do të ndajë me ne eksperiencën e saj kreative dhe profesionale rreth kësaj teme.

“Për mua, konkurrenca është një pjesë e natyrshme e zhvillimit njerëzor që na shoqëron që në vitet e para të jetës. E hasim në shkollë, ku mësojmë të krahasojmë rezultatet tona me të tjerët, dhe më vonë në çdo mjedis ku kërkohet performancë dhe përkushtim.
Si pedagoge, kam parë se konkurrenca mund të motivojë rritjen dhe përmirësimin, por edhe se sa e rëndësishme është të mos e lidhim vlerën personale vetëm me rezultatin.
Në të njëjtën kohë, puna ime në media dhe në futboll më ka vendosur përditë pranë një prej mjediseve më konkurruese, ku suksesi matet vazhdimisht dhe ku presioni për të performuar është i pranishëm në çdo nivel. Këto dy përvoja më kanë bërë ta shoh konkurrencën jo thjesht si garë me të tjerët, por si një proces të vazhdueshëm mësimi, përshtatjeje dhe zhvillimi personal.”

Lenida Halilaj është pjesë e Departamentit të Marrëdhënieve me Publikun në Federatën Shqiptare të Futbollit, ku ushtron detyrën e zëdhënëses dhe moderatores televizive. Puna e saj fokusohet në marrëdhëniet me median, komunikimin publik dhe përfaqësimin institucional, duke kontribuar në iniciativa komunikimi në media tradicionale dhe platforma digjitale.
Ajo është diplomuar për Psikologji në Universitetin e Tiranës dhe prej nëntë vitesh është e angazhuar në mësimdhënie në të njëjtin universitet. Krahas angazhimit akademik, ajo ka zhvilluar më tej interesin e saj për komunikimin, sjelljen njerëzore dhe mënyrën se si individët dhe institucionet ndërveprojnë me hapësirën publike.
Gjatë viteve, ajo ka bashkëpunuar gjithashtu me organizata të ndryshme joqeveritare në projekte dhe nisma që trajtojnë çështje sociale, edukimin, zhvillimin e komunitetit dhe përfshirjen sociale.

Eventi do të mbahet të premten, datë 17 korrik, ora 10:00, te Libraria BABEL.

Tema globale e CreativeMornings për muajin qershor është CURATE, rreth së cilës do të flitet në 256 qytetet në botë, që aplikojnë këtë projekt prej vitit 2008.
Në Tiranë kemi ftuar Klodi Mengri, Konsulente Imazhi & Art Director, e cila do të ndajë me ne eksperiencën e saj kreative dhe profesionale rreth kësaj teme.
“Curate is my birthmark.
Curate është eksperienca që kam zgjedhur të masteroj në këtë përvojë jete, është momenti kur ajo që je dhe ajo që shfaq nga jashtë takohen në harmoni. Curate është përzgjedhje me qëllim dhe krijim kuptimi.
Si filozofi jete, curate është kujdes i ndërgjegjshëm; të jetosh me vetëdije, duke zgjedhur me kujdes mendimet, marrëdhëniet, mjedisin, stilin personal dhe mënyrën se si prezantohesh në botë.
Curate është aftësia e një komuniteti për të njohur atë që ka vlerë, për ta kultivuar, ruajtur dhe shprehur në mënyrë autentike. Curate është përzgjedhja e vetëdijshme e vlerave, historive, talenteve dhe aspiratave që përfaqësojnë më mirë identitetin tonë kolektiv.
Për mua, curate është procesi i rritjes, njohjes dhe arti i të jetuarit të eksperiencës në tre dimensione.
Curate. Një fjalë që mban brenda një dashuri të madhe dhe një vlerë universale: harmoninë. Atë që kuptohet në çdo gjuhë, në çdo shtresë shoqërore dhe në çdo vend. Atë që lëmë pas si trashëgimi dhe vlerë.”

Që prej vitit 1993, sipërmarrëse e suksesshme në industrinë e bukurisë dhe imazhit. Drejtore imazhi në TV Klan dhe ABC News për 7 vite. Drejtore imazhi në produksione të rëndësishme televizive, revista dhe evente kombëtare.