Elbasani Plus

QFPP Elbasan pjesë e një projekti kombëtar për modernizimin e arsimit profesional, Krenar Xhemali: Investim tek aftësitë digjitale të instruktorëve

Qendra e Formimit Profesional Publik Elbasan vijon të konsolidojë pozicionin e saj si një nga institucionet më aktive në vend në fushën e formimit profesional, duke u bërë pjesë e një tjetër projekti me rëndësi kombëtare dhe akademike.

Instituti i Studimeve Evropiane, pranë Universitetit të Tiranës, në bashkëpunim me Drejtorinë Rajonale të Formimit Profesional Publik të qarkut Elbasan, zhvilloi takimin e parë në kuadër të projektit PTI 2026, me temë: “Krijimi i një modeli për ngritjen e kapaciteteve të burimeve njerëzore të QFPP përmes arsimit digjital – Rast studimor, qarku Elbasan”.
Projekti mbështetet nga Ministria e Arsimit dhe Sportit dhe Agjencia Kombëtare e Kërkimit Shkencor dhe Inovacionit (AKKSHI).
Projekti synon të forcojë kompetencat digjitale të instruktorëve të formimit profesional, duke ndërthurur kërkimin shkencor me teknologjinë dhe metodat bashkëkohore të mësimdhënies.

Ai konsiderohet një hap i rëndësishëm drejt modernizimit të arsimit profesional dhe përafrimit të tij me standardet evropiane.
Nën drejtimin e Krenar Xhemalit, QFPP Elbasan është shndërruar në një institucion model, i përfshirë vazhdimisht në projekte kombëtare dhe ndërkombëtare, duke sjellë risi në procesin e mësimdhënies dhe duke investuar në rritjen e kapaciteteve profesionale të stafit dhe kursantëve.

Gjatë takimit u prezantuan objektivat, metodologjia dhe rezultatet e pritshme të projektit, i cili parashikon hartimin e një manuali për aftësitë digjitale të instruktorëve, krijimin e platformave dhe burimeve digjitale, organizimin e trajnimeve për stafin e QFPP Elbasan, si dhe publikime shkencore.
Pjesëmarrja në këtë projekt është një tjetër dëshmi e rolit që QFPP Elbasan po luan në zhvillimin e arsimit profesional në Shqipëri, duke e kthyer institucionin në një pikë referimi për inovacionin, bashkëpunimin akademik dhe përgatitjen e profesionistëve sipas kërkesave të tregut të punës dhe standardeve të Bashkimit Evropian.

Guri bie mbi një automjet në lëvizje në aksin Librazhd–Përrenjas, dyshohet për një viktimë

Një ngjarje e rëndë është regjistruar mbrëmjen e sotme në aksin rrugor Librazhd–Përrenjas, ku një gur i shkëputur nga mali ka goditur një automjet që po qarkullonte.
Sipas informacioneve paraprake, drejtuesi i mjetit udhëtonte i vetëm dhe mbeti i bllokuar brenda automjetit pas goditjes. Në vendngjarje kanë mbërritur menjëherë shërbimet e Policisë, ambulanca dhe forcat zjarrfikëse.
Burime nga vendi i ngjarjes bëjnë me dije se dyshohet për një viktimë, por deri në këto momente nuk ka ende një konfirmim zyrtar nga autoritetet.
Policia pritet të dalë me një njoftim zyrtar për të sqaruar rrethanat e plota të ngjarjes dhe gjendjen e drejtuesit të automjetit.

EKSKLUZIVE / Vokli Laroshi në qendër të merkatos, klube nga Ballkani dhe Azerbajxhani në garë për portierin shqiptar

Nga Fatmir Popja
Merkatoja verore sapo ka nisur, por një nga emrat shqiptarë që po tërheq vëmendjen e klubeve jashtë vendit është portieri Vokli Laroshi. Pas përfundimit të bashkëpunimit me SC Gjilani, gardiani 24-vjeçar është kthyer në një nga lojtarët më të kërkuar në tregun rajonal.
Burime pranë futbollistit bëjnë me dije se Laroshi ka marrë disa oferta konkrete, ndërsa interesi më i madh vjen nga klube elitare të Maqedonisë së Veriut. Në garë janë futur edhe skuadra ambicioze nga Azerbajxhani, të cilat synojnë të sigurojnë shërbimet e portierit shqiptar për sezonin e ri.
I lindur më 6 gusht 2001 dhe me një gjatësi prej 1.89 metrash, Laroshi konsiderohet një portier modern, me refleks të shkëlqyer, siguri në daljet ajrore dhe aftësi të spikatura në organizimin e repartit mbrojtës. Pikërisht këto cilësi e kanë bërë një emër të vlerësuar nga trajnerë dhe skautë në rajon.
Karrierën e nisi te akademia Shkëndija Durrës, ndërsa debutimin në futbollin profesionist e bëri me Turbinën, ku u afirmua si një nga portierët më premtues të kampionatit shqiptar.
Paraqitjet e tij i hapën dyert e Partizanit, ku fitoi eksperiencë në një klub me objektiva të larta dhe standarde profesionale. Më pas u rikthye te Turbina, për të vijuar karrierën në Kosovë me Llapin, ekip me të cilin luajti edhe në kompeticionet evropiane.
Sezoni i fundit me SC Gjilani ishte ndër më të mirët në karrierën e tij. Laroshi ishte një nga pikat më të forta të skuadrës, duke konfirmuar statusin e tij si një prej portierëve më cilësorë shqiptarë të brezit të ri.
Në nivel ndërkombëtar, ai ka qenë pjesë e ekipeve kombëtare U17, U19 dhe U21 të Shqipërisë, duke fituar eksperiencë të rëndësishme në arenën ndërkombëtare.
Tashmë, në moshën vetëm 24-vjeçare, Vokli Laroshi ndodhet përballë një prej momenteve më të rëndësishme të karrierës. Interesi nga klubet e Ballkanit dhe Azerbajxhanit tregon se paraqitjet e tij nuk kanë kaluar pa u vënë re, ndërsa transferimi i radhës pritet ta ngrejë në një tjetër nivel.
Vendimi për klubin e ri pritet të merret në ditët në vijim, por një gjë është e sigurt: emri i Vokli Larosh*t është ndër më të nxehtët e kësaj merkatoje verore.

Aksident në Elbasan/ Motori përplaset me një furgon pranë Shkollës së Muzikës

Një aksident rrugor është regjistruar pak çaste më parë në qytetin e Elbasanit.
Sipas informacioneve të para, një motor është përplasur me një furgon pranë Shkollës së Muzikës.
Ende nuk dihen shkaqet e aksidentit, ndërsa nuk ka informacion zyrtar për gjendjen e personave të përfshirë në përplasje.
Në vendngjarje ka mbërritur policia, e cila do të kryejë veprimet hetimore për të zbardhur rrethanat e aksidentit.

Aksident tragjik në autostradën Tiranë - Durrës. Përmbyset autobuzi. 4 persona humbin jetën, 7 të plagosur në gjendje të rëndë.