Jamil.design.studio

فن خدمة ما بعد البيع للمصممين!

كثير مصممين بيفكروا إن بمجرد ما نبعت إيميل النسخ النهائية ونستلم الدفعة الأخيرة، القصة خلصت.
الحقيقة إن العلاقة الحقيقية مع العميل بتبلش من هون، وهون تحديداً بنكشف الفرق بين المصمم اللي بيشتغل مبدأ "زبون طيار" وبين المصمم اللي بيبني براند واسم بالسوق.

1. زر الـ "Send" هو بداية وليس نهاية
التسليم النهائي مو معناها "خلصنا وهات غيره". خدمة ما بعد البيع هي اللي بتخلي العميل يتذكرك بالخير لما حدا يسأله عن مصمم، وهي اللي بتخليه يرجع لك بمشاريعه الجاية.
الهدف مو بس نخلص الشغل، الهدف نترك أثر مهني بيثبت إنك شريك بالنجاح مو مجرد منفذ.

2. رسم الحدود, من أول الطريق.
أكبر غلط بيقع فيه المصمم هو عدم الوضوح بالتفاصيل من الأول . لحتى ما تلاقي حالك عم تعدل على لوجو صممتو من سنة وببلاش، لازم تكون واضح:
فاتورة التسليم:
مع الملفات، ابعت ملف صغير بيوضح شو اللي تم تسليمه، وشو اللواحق المتاحة.
فترة الصيانة:
عطي العميل فترة سماح (مثلاً 10 أيام أو أسبوعين) لأي خطأ تقني أو ملف ناقص. بعد هيك،
أي طلب بيعتبر "تعديل جديد" وبفاتورة جديدة. هيك العميل بيعرف إن وقتك اله قيمة.

3. ذكاء الرد: مو كل طلب يعني العميل عم يستغلك!

التعامل مع الطلبات المتأخرة فن، ولازم نصنفها لحتى نعرف نرد:
الخدمة السريعة :
عميل ضيع ملف أو بده نسخة PNG شفافة. هون خليك كريم، ابعتها بابتسامة وقله تكرم عينك، هي النسخة عندك، هالحركة البسيطة بتعمل مفعول السحر بولاء العميل.

التعديلات الجوهرية:
لما العميل يطلب يغير شي بالهوية بعد شهرين، الرد لازم يكون دبلوماسي: مثلاً, فكرة ممتازة، وممكن نطور الشغل ليتناسب مع طلبك الجديد.
هاد التعديل بيحتاج وقت وجهد إضافي خارج العقد الأساسي، وتكلفته رح تكون كذا.

كتيب الاستخدام :
أفضل شي بتقدمه للعميل هو دليل استخدام أو Brand Guidelines بسيط. هاد الكتيب بيجاوب على أسئلته قبل ما يسألها، وبريحك من اتصالات كيف استخدم اللوجو على خلفية سوداء؟.

4. حوّل وجع الراس لمصدر دخل:
لما تلاقي العميل طلباته كترت بعد التسليم، لا تتدايق.
هاد مؤشر إنه بحاجتك. بدل ما ترفض، اعرض عليه عقد دعم شهري أو باقة تعديلات. هيك أنت بتضمن دخل ثابت، وهو بكون مرتاح إنك موجود دائماً لدعم البراند تبعه.

5. لمسات المحترفين اللي بتخليك مميز عن غيرك
ترتيب البيت الداخلي: سلم ملفاتك بأسماء واضحة Logo_Vector, Social_Media_Version.
العميل لما يشوف الترتيب، بيحترم شغلك وما بيضيع بوسط الملفات.

قوة المتابعة مع العميل وسؤاله شو صار معك:
بعد شهر من الشغل، ابعت رسالة قصيرة: "حبيت اطمن كيف صدى الهوية البصرية الجديدة معكن؟.
هي الرسالة هي الطعم لمشاريع جديدة، وبتحسس العميل إنه مو مجرد رقم بحسابك البنكي.

https://www.instagram.com/jamil.tobah?igsh=dmU5c2Q4YTZhNjh2

https://www.facebook.com/jamildesignstudio


💜🇸🇾