Commerce Posts

ایف بی آر افسر کا فرانس ویزا اسکینڈل بے نقاب، نجی افراد کو سرکاری وفد ظاہر کر کے ویزے دلوا دیے

واشنگٹن (24 جنوری 2026): ایف بی آر کے ایک اعلیٰ افسر کی جانب سے مبینہ طور پر نجی شہریوں کو سرکاری وفد کا رکن ظاہر کر کے فرانس کے ویزے حاصل کرنے کا اسکینڈل سامنے آ گیا ہے۔

رپورٹس کے مطابق دو افراد، کامران اور عامر شہزاد، کو سرکاری وفد کا حصہ ظاہر کرتے ہوئے فرانس کے ویزے کے لیے سفارتخانے کو آفیشل ای میل ارسال کی گئی۔ یہ ای میل ایف بی آر کے اعلیٰ افسر عتیق الرحمان کی جانب سے بھیجی گئی، جس کے بدلے مبینہ طور پر 53 لاکھ روپے وصول کیے گئے۔

الزام ہے کہ بھاری رقم کے عوض نجی افراد کو سرکاری ملازم ظاہر کر کے ویزے حاصل کیے گئے۔ تاہم دونوں افراد کو اسلام آباد ایئرپورٹ پر سفر سے قبل گرفتار کر لیا گیا۔

اس معاملے پر ایف آئی اے کے اینٹی کرپشن سیل نے ایف بی آر افسر سمیت دیگر ملزمان کے خلاف مقدمہ درج کر لیا ہے۔ ایف آئی اے کے مطابق رقوم بینک ٹرانزیکشن کے ذریعے منتقل کی گئی تھیں، جن کا ریکارڈ بھی حاصل کر لیا گیا ہے۔