Autostrada Hangar

Me kënaqësi mirëpritëm në Autostrada Hangar – Qendër për Art Bashkëkohor një delegacion nga Universiteti “Haxhi Zeka” i Pejës, përfshirë rektorin, prorektorët, dekanët, zëvendësdekanët dhe Drejtorin e UNI-NOVA.

Gjatë vizitës ndamë rrugëtimin e tonë, me fokus në programet edukative, rolin e artit bashkëkohor në mësim dhe kërkim, si dhe mundësitë për bashkëpunim me universitetin, veçanërisht në praktika për studentët, vizita studimore dhe pjesëmarrje në programe edukimi.

Vizita u realizua në kuadër të vizitës së tyre në Parkun e Inovacionit dhe Trajnimit (ITP) Prizren Faleminderit për interesimin e treguar dhe mezi presim bashkëpunime të ardhshme.

Foto: Erza Bata - Ekipi i Medias nga Autostrada Biennale

Kishim kënaqësinë që sot, në Autostrada Hangar – Qendra për Art Bashkëkohor, t’i mirëpresim producentë nga Los Angeles dhe Londra, të cilët po shqyrtojnë Ballkanin si rajon për xhirimet e projekteve të tyre të ardhshme filmike.

Kjo vizitë kishte për qëllim njohjen me potencialin që ofron Prizreni për prodhime ndërkombëtare, përmes ekosistemit kulturor dhe organizatave që veprojnë në qytet. Gjatë takimit, ndamë me ta rrugëtimin tonë, përvojën e ndërtimit të një platforme kulturore të hapur dhe të qëndrueshme, si dhe biseduam për mënyra të mundshme bashkëpunimi në të ardhmen në fushën e prodhimit filmik dhe kulturor.

Ndër producentët me përvojë ndërkombëtare që morën pjesë në këtë vizitë ishin Julianna Politsky, Marc Lorber, Emyr Glyn Rees, Grayson Stubbs, Ryan Hawkins dhe Philip Gilpin.

Nga organizatat vendore që morën pjesë në takim ishin Autostrada Biennale, Dokufest dhe Fondacioni Lumbardhi.

Foto: Erza Bata — Ekip i Medias nga Autostrada Biennale

75 nxënës nga shkolla fillore “Loyola” në Prizren kanë vizituar Autostrada Hangar – Qendrën për Art Bashkëkohor.

Gjatë vizitës, ata patën mundësinë të shohin nga afër ekspozitën aDigital Perspective, sjellë nga Instituti Italian i Kulturës , si edhe ekspozitën e 10-vjetorit të Autostrada Biennale

Ekipi i Autostrada Hangar i shoqëroi nxënësit nëpër hapësirat ekspozuese, duke i njohur me përmbajtjen, kontekstin dhe proceset krijuese që qëndrojnë pas veprave të prezantuara.

Vizita të tilla i ndihmojnë fëmijët të zhvillojnë imagjinatën, kureshtjen dhe mendimin kritik. Përmes takimit me artin bashkëkohor, ata mësojnë të lexojnë idetë vizualisht dhe të kuptojnë forma të ndryshme të shprehjes. Autostrada Hangar u ofron një hapësirë ku të mësojnë, krijojnë dhe ta shohin botën me sy të rinj.

Faleminderit për vizitën, interesin dhe kureshtjen.

Foto: Erza Bata, Ekipi i Medias Autostrada Biennale

Mbrëmë u hap në Autostrada Hangar ekspozita aDigital Perspective. Ishte kënaqësi ta mirëpresim këtë ekspozitë të organizuar nga Instituti Italian i Kulturës në Tiranë.

Dhjetë artistë nga Italia dhe Ballkani eksplorojnë kontradiktat dhe mundësitë e teknologjive të reja duke përdorur teknika tradicionale dhe qëllimisht jo-digjitale. Ekspozita sjell një reflektim të thellë mbi marrëdhënien me teknologjinë.

Hapja në Prizren është pjesë e projektit Italia Digitale, të promovuar nga dhe i përfshirë në programin e “Kryeqytetet e Krijimtarisë italiane në botë”.

Ekspozita do të jetë e hapur deri më 19 dhjetor. Ejani ta vizitoni!

Foto: Erza Bata - Ekip i Medias nga Autostrada Biennale

Ekspozitë nga Instituti Italian “aDigital Perspective” ku dhjetë artistë nga Italia dhe Ballkani ripërcaktojnë konceptin e artit digjital

📍 Autostrada Biennale Hangar, Prizren
🗓️ 13 nëntor – 19 dhjetor 2025
🕖 Përurimi: 13 nëntor, ora 19:00
🕓 Orari: Hënë – Premte, 10:00 – 17:00

Instituti Italian i Kulturës në Tiranë prezanton në Prizren ndalesën e fundit të ekspozitës aDigital Perspective, një ekspozitë në të cilën dhjetë artistë – gjashtë italianë dhe katër nga vendet e përfshira – eksplorojnë kontradiktat dhe mundësitë e teknologjive të reja, por duke përdorur teknika tradicionale dhe qëllimisht jo-digjitale.

Pas euforisë së ngjallur nga NFT-të dhe Inteligjenca Artificiale, artistët kanë filluar të ngrenë pikëpyetje rreth kuptimit të thellë të digjitalizimit, duke vënë në praktikë, në vend të sigurive optimiste, një qëndrim dyshues dhe reflektues.

Iniciativa, e ndërmarrë nga Institutet Italiane të Kulturës së Beogradit, Bukureshtit dhe Tiranës, dhe e kuruar nga Spazio Taverna, është pjesë e një projekti më të gjerë të diplomacisë kulturore, i cili synon forcimin e lidhjeve midis Italisë dhe vendeve të Ballkanit përmes artit bashkëkohor.

Ekspozita përfaqëson një mundësi të rëndësishme reflektimi mbi marrëdhënien me teknologjinë – jo përmes ekraneve dhe algoritmeve, por përmes gjuhës së pikturës, materies dhe performancës. Ajo shërben gjithashtu si një urë kulturore mes Italisë dhe Ballkanit, duke forcuar lidhjet historike dhe duke nxitur perspektiva të reja për bashkëpunim.

Artistët: Sanja Anđelković, Federica Di Pietrantonio, Alessandro Giannì, Laureta Hajrullahu, Ledia Kostandini, Numero Cromatico, Alice Paltrinieri, Ginevra Petrozzi, Jacopo Rinaldi, Mădălina Zaharia.

Hapja e ekspozitës në Prizren është pjesë e projektit Italia Digitale, të promovuar nga dhe i përfshirë në programin e “Kryeqytetet e Krijimtarisë italiane në botë”, një projekt që synon, përmes krijimtarisë dhe inovacionit, prezantimin e gjuhëve dhe rrymave të reja shprehëse që po transformojnë peizazhin kulturor.